ဖေဖော်ဝါရီ ၅ ရက်နံနက်ပိုင်းက တွံတေးမြို့နယ်ရှိ ရွှေမုယင်းဒေသအတွင်း ရန်ကုန်တိုင်းစစ်ဌာနချုပ်နှင့်မြန်မာ့စီးပွားရေးဦးပိုင်၊အများနှင့်သက်ဆိုင်သော ကုမ္ပဏီလီမိတက်တို့မှ ငါးမွေးမြူရေးလုပ်ငန်းများဆောင်ရွက်ထားရှိမှုအား နစက ဥက္ကဋ္ဌမှ ကြည့်ရှုစစ်ဆေးခဲ့သည်။
ရွှေမုယင်းဒေသအတွင်း ငါးမွေးမြူရေးလုပ်ငန်းများဆောင်ရွက်စေခြင်းသည် ရန်ကုန်တိုင်းအတွင်း ငါးလိုအပ်ချက်ပြည့်မီစေရန် ရည်ရွယ်ဆောင်ရွက်ခြင်းဖြစ်ကာ ရန်ကုန်တိုင်းတွင် လူဦးရေ ၉ သန်းခန့်ရှိပြီး လူတစ်ဦး တစ်ရက် ငါးအသား ၅ ကျပ်သားခန့်စားသုံးလျင်ပင် လိုအပ်ချက်များစွာရှိနေမည်ဟု ဆိုသည်။
“နေ့စဉ် ငါးလိုအပ်ချက်အတွက် ဧရာဝတီတိုင်းနဲ့တခြားတိုင်းနဲ့ပြည်နယ်တွေက တင်သွင်းနေရတာထက် မိမိတို့ဒေသအတွင်းမှာ ပြည့်မှီအောင် ထုတ်လုပ်နိုင်မယ်ဆိုရင် ပိုပြီးကောင်းမွန်လာမှာဖြစ်ပါတယ်”ဟု နစက ဥက္ကဋ္ဌကပြောသည်။
ဒေသခံများအနေဖြင့်လည်း ဈေးနှုန်းသက်သာစွာ ပြည့်ပြည့်ဝဝ ဝယ်ယူစားသုံးနိုင်မည်ဖြစ်၍ ငါးမွေးမြူရေးလုပ်ငန်းအား ထုတ်လုပ်မှုကုန်ကျစရိတ်နည်းစွာ အရေအတွက်များများရရှိစေရန်ဆောင်ရွက်ရမည်ဖြစ်ပြီး ထုတ်လုပ်မှုကုန်ကျစရိတ်သက်သာပါက ပြည်သူလူထု အကျိုးရှိမည်ဖြစ်ကာ အာဟာရပြည့်မီအောင်စားသုံးနိုင်မည်ဖြစ်၍ ငါးမွေးမြူရေးလုပ်ငန်းဆောင်ရွက်သည့် ဒေသ၏အကျိုးကိုလည်း ဖြစ်ထွန်းစေမည်ဟု ဆိုသည်။
“အဲဒီလိုဆောင်ရွက်နိုင်ဖို့ မွေးမြူရေးမြေဧရိယာတွေကို အကျိုးရှိရှိအသုံးချဖို့လိုပါတယ်၊ အထွက်နှုန်းတိုးစေဖို့အတွက် အစာပြည့်၀အောင်ကျွေးမွေးဖို့ အကောင်ရေပြည့်မီအောင်ထည့်သွင်းဖို့လို အပ်ပါတယ်၊ ငါးမျိုးတွေမှန်ကန်စွာ ရရှိဖို့အတွက် တိုင်းအစိုးရအဖွဲ့က တာဝန်ရှိသူတွေဟာ သက်ဆိုင်ရာဝန်ကြီးဌာနတွေနဲ့ချိတ်ဆက်ဆောင်ရွက်ကြရပါမယ် တခြားလိုအပ်တာတွေကိုလည်း အစိုးရကကူညီဆောင်ရွက်ပေးသွားပါမယ်”ဟု နစက ဥက္ကဋ္ဌကပြောသည်။
ထို့ပြင် အသေးစား၊အငယ်စားနှင့်အလတ်စား စီးပွားရေး (MSME) လုပ်ငန်းတစ်ခုဖြစ်သည့် တိရိစ္ဆာန် အစာထုတ်လုပ်ခြင်းလုပ်ငန်းများကိုလည်း အားပေးဆောင်ရွက်ရမည်ဖြစ်ပြီး ဒေသတွင်းရရှိသည့် ကုန်ကြမ်းများဖြင့် ထုတ်လုပ်နိုင်ရမည်ဖြစ်ကာ အခြားလိုအပ်သည့် တိရိစ္ဆာန်ဆေးဝါးများရရှိရန် ဆေးဝါးစက်ရုံများနှင့်ချိတ်ဆက်ဆောင်ရွက်ရမည်ဟု ဆိုသည်။
ထို့အတူ မွေးမြူရေးထုတ်ကုန်များ ဈေးကွက်သို့ လျင်မြန်စွာရောက်ရှိစေရန်နှင့်ဈေးနှုန်းသက်သာစေရန် သယ်ယူပို့ဆောင်ရေးလည်း အရေးကြီးကာ ထုတ်ကုန်အား ဈေးနှုန်းသက်သာစွာထုတ် လုပ်နိုင်သော်လည်း သယ်ယူပို့ဆောင်ရေးလမ်းကြောင်းရှည်လျားခြင်း၊ခက်ခဲခြင်းတို့ကြောင့် စရိတ်ကြီးမြင့်လာနိုင်၍ ကုန်ထုတ်လုပ်မှုလမ်းကြောင်းဆောင်ရွက်ရာတွင် စနစ်တကျကွင်းဆင်းစစ်ဆေးဆောင်ရွက်ရမည်ဟု ဆိုသည်။
“ရွှေမုယင်းဒေသကထွက်တဲ့ ငါးတွေကို ကနဦး ပထမအဆင့်သန့်စင်ပြီး အအေးခန်းပို့ဆောင်ရေးကားတွေသုံးပြီး ဈေးကွက်ကိုဖြန့်ချိနိုင်ဖို့ဆောင်ရွက်နိုင်ရပါမယ် စနစ်ကျနတဲ့ မွေးမြူရေးလုပ်ငန်းဖြစ်ဖို့လိုပြီး ဒေသနဲ့ဒေသခံတွေကို အကျိုးဖြစ်စေရပါမယ်”ဟု နစက ဥက္ကဋ္ဌကပြောကြားခဲ့သည်။
