နစက ၏ အမျိုးသားရေးရည်မှန်းချက် နှစ်ရပ်မှာ တိုင်းပြည်သာယာဝပြောရေးနှင့်စားရေရိက္ခာဖူလုံရေးတို့ဖြစ်ကြောင်း ဖေဖော်ဝါရီ ၆ ရက်မွန်းလွဲပိုင်းက ဧရာဝတီတိုင်း၊ပန်းတနော်မြို့နယ်သို့ရောက်ရှိနေသည့် နစက ဥက္ကဌက ပြောကြားလိုက်သည်။
“အတတ်နိုင်ဆုံး ပြည်တွင်းရင်းနှီးမြှုပ်နှံမှုတွေနဲ့ လုပ်ငန်းတွေကို အောင်မြင်အောင် အကောင်အထည်ဖော်ဆောင်ရွက်ရပါမယ်၊ မွေးမြူရေးလုပ်ငန်းဟာ နိုင်ငံဖွံ့ဖြိုးတိုးတက်ရေးအတွက် များစွာ အထောက်အကူပြုပါတယ်၊ စီးပွားရေးလုပ်ငန်းတွေနဲ့ပတ်သက်ပြီး နိုင်ငံတော်က ကူညီအားပေးဖို့ ဖွံ့ဖြိုးတိုးတက်စေဖို့ အာမခံထားပါတယ်၊ ပူးပေါင်းစွမ်းအားနဲ့ နိုင်ငံ့စီးပွားရေးတိုးတက်စေရပါမယ်”ဟု နစက ဥက္ကဋ္ဌကပြောသည်။
အလုပ်အကိုင်အခွင့်လမ်းများစွာ ဖော်ပေးနေသည့်Global Earth Agro & Aqua Industry Public Co., Ltd ၏ လုပ်ငန်းဆောင်ရွက်နေမှုများအား နစက ဥက္ကဋ္ဌက သွားရောက်ကြည့်ရှုစစ်ဆေးစဥ်ပြောကြားခဲ့ခြင်းဖြစ်သည်။
ဧရာဝတီ တိုင်းဒေသကြီး၊ ပန်းတနော်မြို့ နယ်၊ မိုးကုတ်ဒီးဒုတ်ကွင်းအတွင်း၌ သိပ္ပံနည်းကျ အဆင့်မြင့်ခေတ်မီငါးသားဖောက်ခြင်းနှင့် မြန်မာနိုင်ငံတွင် အကြီးမားဆုံး ငါးမွေးမြူခြင်း၊ ကုန်ချောပြုပြင်ထုတ်လုပ်ခြင်း၊ ငါးပေါင်းမှုန့်နှင့် အစာတောင့်ထုတ်လုပ်ခြင်းတို့ပါဝင်သည့် အဆိုပါ စီမံကိန်းကြီးလုပ်ဆောင်နေသော ကုမ္မဏီ၏ဥက္ကဌမှာ ယုဇနဦးဌေးမြင့် ဖြစ်သည်။
သိပ္ပံနည်းဖြင့် ငါးတန် အထီး၊ အမ (Breeders) တစ်သိန်း နှစ်သောင်းကို ပြုစုထားရှိပြီး နေ့စဉ် ငါးသားပေါက် (ငါးမှုန်) သိန်း ၄၀ ကောင်ရေကို ထုတ်လုပ်လျက်ရှိကြောင်း၊ လက်ရှိ အချိန်တွင် ငါးသန်/ငါးဖြန်း ကောင်ရေ သိန်း ၂၅၀ ခန့်နှင့် အသားတိုးငါး ကောင်ရေ သိန်း ၂၅၀ ခန့်အား မွေးမြူထားရှိကြောင်း၊ စီမံကိန်းတစ်ခုလုံး ပြီးစီးပါက မြန်မာ့ရေလုပ်ငန်းစီးပွားရေးကဏ္ဍဖွံ့ဖြိုးတိုးတက်မှုနှင့် ဒေသအတွင်းရှိ တစ်ဦးချင်းစီ၏ ဝင်ငွေများလည်း တိုးတက်လာနိုင်မည်ဖြစ်ကြောင်းသိရသည်။
