ဥရောပနိုင်ငံများဖြစ်ကြသည့် ဂျာမနီ၊ ဒိန်းမတ်နှင့် နယ်သာလန်တို့က ၎င်းတို့သည် ယူကရိန်းအား ပြန်လည်မွမ်းမံပြင်ဆင်ထားသော(refurbished) Leopard 1 တိုက်ပွဲဝင် တင့်ကား အစီးရေ ၁၀၀ ထက်မနည်း ထောက်ပံ့ပေးရန် စီစဉ်နေကြောင်း သိရသည်။ အဆိုပါတင့်ကားများကို ဂျာမန်စက်မှုလုပ်ငန်းများထံမှ အခြားနိုင်ငံများက တိုက်ရိုက်ဝယ်ယူမည်ဖြစ်ကြောင်း သိရသည်။
ဂျာမနီနိုင်ငံလုပ် Leopard 1 တိုက်ခိုက်ရေးတင့်ကား ၁၇၈ စီးအထိ ယူကရိန်းနိုင်ငံသို့ပို့ရန် ဂျာမန်စီးပွားရေးဝန်ကြီးဌာနနှင့် ကာကွယ်ရေး ဝန်ကြီးဌာနတို့က သဘောတူကြောင်း အင်္ဂါနေ့တွင် ပူးတွဲကြေညာချက်ထုတ်ပြန်ခဲ့သည်။
“Leopard 1A5 ပင်မတိုက်ပွဲဝင်တင့်ကား မည်ရွေ့မည်မျှကို ယူကရိန်းသို့ အမှန်တကယ် ပို့ဆောင်မည်ဆိုခြင်းမှာ လိုအပ်သော ပြုပြင်ထိန်းသိမ်းမှုလုပ်ငန်းအပေါ် မူတည်သည်” ဟု ထုတ်ပြန်ချက်တွင် ပါရှိသည်။
ယင်း ပူးတွဲကြေညာချက်သည် ဒိန်းမတ်နှင့် နယ်သာလန်တို့နှင့် ပူးတွဲကတိကဝတ်ပြုမှု၏ တစ်စိတ်တစ်ပိုင်းအဖြစ်ထွက်ပေါ်လာခြင်းဖြစ်သည်။ အဆိုပါ တင့်ကားများသည် ရုရှား၏တိုက်ခိုက်မှုကို ခံနိုင်ရည်ရှိရေးအတွက် ယူကရိန်းအား ပံ့ပိုးကူညီရန် ကြိုးပမ်းမှု၏ တစ်စိတ်တစ်ပိုင်းဖြစ်ကြောင်း အဆိုပါသုံးနိုင်ငံမှ ကာကွယ်ရေးဝန်ကြီးများက ပြောကြားခဲ့သည်။
လိုအပ်သော ထောက်ပံ့ပို့ဆောင်ရေးနှင့် လေ့ကျင့်ရေးများ ပံ့ပိုးပေးမည်ဟု သုံးနိုင်ငံ ပူးတွဲကြေညာချက်တွင် ဖော်ပြထားသည်။ ၎င်းတွင် “အပိုပစ္စည်းများနှင့် ခဲယမ်းမီးကျောက်များ” ပါဝင်ပါသည်။
နယ်သာလန်ကာကွယ်ရေးဝန်ကြီး Kasja Ollongen က Luhansk နှင့် Donetsk ၏ စစ်မြေပြင်များတွင် အနည်းငယ်ဟောင်းသော တင့်ကားများသည် သေချာပေါက်အသုံးပြုနိုင်ဆဲဖြစ်ကြောင်း အမျိုးသားရုပ်သံ NOS သို့ ပြောကြားခဲ့သည်။
“ဒါဟာ စမ်းသပ်ထားတဲ့ တင့်ကားတွေဖြစ်ပြီး၊ မွမ်းမံချိန်ညှိမှုတွေပြုလုပ်ထားကာ တိုက်ပွဲဝင်ရန် အဆင်သင့်ဖြစ်နေတာကြောင့် ယူကရိန်းနိုင်ငံသားတွေအတွက် သေချာပေါက် အသုံးဝင်မှာပါ” ဟုလည်း သူမက ပြောကြားခဲ့သည်။
