နိုင်ငံတိုးတက်ရန် ဆောင်ရွက်ရမည့်လုပ်ငန်းစဥ်များနှင့်ပတ်သက်၍ ဖေဖော်ဝါရီ ၉ ရက်မွန်းလွဲပိုင်းကပြုလုပ်သည့် ပြည်ထောင်စုအစိုးရအဖွဲ့အစည်းအဝေး(၂/၂၀၂၃)တွင် ၂၀၂၂-၂၀၂၃ ဘဏ္ဍာရေးနှစ်အတွင်း ဆောင်ရွက်ရမည့်လုပ်ငန်းများကို အချိန်မီပြီးစီးအောင် ဆောင်ရွက်ရမည်ဖြစ်ပြီး အစိုးရ၏ စီးပွားရေးလုပ်ငန်းများတွင် ဝင်ငွေနှင့်အသုံးစရိတ် မျှတမှုမရှိသည့် လုပ်ငန်းများရှိနေ၍ ဝင်ငွေနှင့်သုံးငွေ မျှတမှုရှိရန်လည်း ဆောင်ရွက်ရမည်ဟုနစက ဥက္ကဋ္ဌ၊ဗိုလ်ချုပ်မှူးကြီးမင်းအောင်လှိုင်မှ ပြောကြားခဲ့သည်။ တိုင်းပြည်အား အကောင်းဆုံးသောစောင့်ရှောက်ခြင်းသည် စီးပွားရေးမြှင့်တင်ပေးခြင်းပင်ဖြစ်၍ စီးပွားရေးမြင့်တက်အောင် ဆောင်ရွက်ရမည်ဟု ဆိုသည်။
ယခင် အစိုးရလက်ထက်က စီမံခန့်ခွဲမှုလွဲမှားမှုများကြောင့် အချို့နိုင်ငံပိုင်စီးပွားရေးလုပ်ငန်းများရပ်ဆိုင်းခဲ့ရခြင်း၊အချို့လုပ်ငန်းများသည် လုပ်ငန်းဆောင်ရွက်နိုင်မှုမရှိသော်လည်း လစာငွေပေးချေထားရခြင်းများနှင့်ထိန်းသိမ်းမှုကုန်ကျစရိတ်များ များစွာရှိနေကြောင်းပြောသည်။
ထို့ကြောင့် ရပ်တန့်ထားသည့် စက်ရုံများသည် နိုင်ငံ့အတွက်အရှုံးများသာဖြစ်၍ ပြန်လည်လည်ပတ်အောင် ဆောင်ရွက်ရမည်ဖြစ်ကာ ထိုသို့ ဆောင်ရွက်ရာတွင်လည်း အကုန်အကျအနည်းဆုံးနှင့်အကောင်းဆုံးဖြစ်အောင် ဆောင်ရွက်နိုင်ရန်၊ မလိုလားအပ်ဘဲ ငွေကြေးကုန်ကျမှုများမဖြစ်ပေါ်စေရေးအတွက် မှန်မှန်ကန်ကန်ဆောင်ရွက်ရမည်ဟု မှာကြားသည်။
“မှန်မှန်ကန်ကန် ဆောင်ရွက်ခြင်းမရှိရင် အရေးယူတာတွေကိုလည်း ဆောင်ရွက်နိုင်ပါတယ်၊ ဦးစီးခေါင်းဆောင်ရတဲ့ တာဝန်ရှိသူတွေအနေနဲ့ မိမိတို့ ရဲ့ လုပ်ငန်းတာဝန်များကို သိရှိအောင်ဆောင်ရွက်ပြီး မှန်ကန်တဲ့ လမ်းညွှန်ချက်တွေ ချမှတ်သွားဖို့လိုပါတယ်”ဟု နစက ဥက္ကဋ္ဌကပြောကြားသည်။
လာမည့်ကာလတွင် ပို့ဆောင်ရေး၊ပညာရေး၊ကျန်းမာရေးကဏ္ဍများကို ဦးစားပေးဆောင်ရွက်ရန်၊ လျှပ်စစ်ကဏ္ဍဖွံ့ဖြိုးတိုးတက်ရေးအား မဖြစ်မနေဆောင်ရွက်ရန်၊ပညာရေးတွင် KG 9 သင်ကြားပြီးမြောက်ချိန်တွင် အသက်မွေးဝမ်းကျောင်း ပညာရပ်များ ကူးပြောင်းသင်ကြားနိုင်ရန်၊နောင်ကျင်းပမည့် အခမ်းအနားများနှင့်ပတ်သက်၍ ဘာသာရေး၊နိုင်ငံရေး သက်ဆိုင်ရာကဏ္ဍအလိုက်အခမ်းအနားများအား ရိုးရာအစဉ်အလာမပျက် အနှစ်သာရပြည့်ဝစွာ ဆောင်ရွက်ရန်စသည့် တရားဥပဒေစိုးမိုးရေး၊တိုင်းပြည်စီးပွားဖွံ့ဖြိုးတိုးတက်ရေးအတွက် ဝန်ကြီးဌာနများအလိုက်ညှိနှိုင်းဆောင်ရွက်သွားကြရမည်တို့ကိုဆွေးနွေးပြောကြားခဲ့သည်။
တိုင်းပြည်သာယာဝပြော၍ ဝင်ငွေရှိနေပါက ၎င်းတို့၏ လူမှုဘဝမြင့်တက်လာမည်ဖြစ်ပြီး လူမှုဘဝမြင့်တက်လာပါက မိမိ၏လူမှုဘဝအား အထိခိုက်ခံအပျက်ဆီးခံမည်မဟုတ်တော့၍ ကောင်းမွန်သည့် Approach သွားမည်ဖြစ်ကာ မကောင်းသည့် Approach ဘက်သို့သွားမည်မဟုတ်တော့ဟု နစက ဥက္ကဋ္ဌကဆိုသည်။
