အိန္ဒိယနိုင်ငံ မြို့တော် နူးဒေလီအနီးရှိ ဂါဇီရာဘတ်ခရိုင် တရားရုံးတွင် ကျားသစ်တစ်ကောင် ဝင်ရောက်သောင်းကျန်းခဲ့ရာ လူ ၁၀ ဦး ထက်မနည်း ဒဏ်ရာရရှိခဲ့ကြောင်း သိရသည်။
အသက် ၇ နှစ် သို့မဟုတ် ၈ နှစ်ဝန်းကျင် ရှိပြီဖြစ်သော ကျားသစ်အထီးသည် အင်္ဂါနေ့ကတည်းက ဂါဇီရာဘတ်ခရိုင် တရားရုံး အဆောက်အအုံထဲသို့ ဝင်ရောက်နေခဲ့သည်ဟု ယူဆရသော်လည်း ဗုဒ္ဓဟူးနေ့ရောက်မှသာ လူအများရှိရာသို့ ဝင်ရောက်တိုက်ခိုက်ခဲ့သည်ဟု အိန္ဒိယနေ့စဉ် သတင်းစာ ဟိန္ဒူစတန် တိုင်းမ် က ဖော်ပြထားသည်။
ကျားသစ်၏ တိုက်ခိုက်ခြင်းကို ခံခဲ့ရသော ညီအစ်ကိုသုံးဦးသည် တရားရုံးရှိ ဒုတိယထပ်တွင် စောင့်ဆိုင်းနေစဉ် ကျားသစ်က သူတို့၏ ရှေ့တည့်တည့်သို့ ရောက်ရှိလာခဲ့ကြောင်း ပြောကြားထားသည်။
“ကျွန်တော်တို့ တကယ် တုန်လှုပ်သွားတာ။ ကျားသစ်က ကျွန်တော်တို့ သုံးယောက်ကို လာတိုက်ခိုက်တော့ အောက်ထပ်ကို ဆင်းပြေးခဲ့ရတယ်” ဟု ဒဏ်ရာရရှိခဲ့သူ တန်ဗီး အာမတ်က ပြောသည်။
အွန်လိုင်းပေါ်တွင် ပျံ့နှံနေသော ဗီဒီယိုတွင်လည်း ဒါဇင်နှင့်ချီသော လူများသည် ကျားသစ်ရန်မှ ကာကွယ်ရန်အတွက် သံတံခါးရှိသော အခန်းထဲတွင် ပုန်းခိုနေသည်ကို ပြသထားသည်။
ကျားသစ်အား တောရိုင်းတိရစ္ဆာန် တာဝန်ရှိသူများက မေ့ဆေး သေနတ်များဖြင့် ပစ်ခဲ့ပြီးနောက် ည ၈ နာရီ ၁၅ မိနစ်ခန့်ရောက်မှသာ ဖမ်းဆီးနိုင်ခဲ့သည်ဟု တိုက်ခိုက်ခံရသူ ညီအစ်ကို သုံးဦးက ဆိုသည်။
ကျားသစ်သည် အဆောက်အအုံ၏ အခြားအလွှာများရှိ လူများကိုပါ တိုက်ခိုက်ခဲ့ကြောင်း ဂါဇီရာဘတ် တရားရုံး၏ စီမံခန့်ခွဲရေး အရာရှိက ပြောထားသည်။ ဒဏ်ရာရရှိသူ အားလုံးကိုလည်း ဆေးရုံသို့ ပို့ဆောင်ထားကာ အခြေအနေ တည်ငြိမ်လျက်ရှိကြောင်း သိရသည်။
ကျားသစ်သည်လည်း ဒဏ်ရာအများအပြား ရရှိထားသဖြင့် သစ်တောဌာနမှ တိရစ္ဆာန်ဆေးကု ဆရာဝန်များက ပဋိဇီဝဆေးများ၊ ဗီတာမင်များဖြင့် ကုသပေးလျက်ရှိပြီး ပြန်ကောင်းလာသည်နှင့် တစ်ပြိုင်နက် သင့်လျော်ရာ တောများသို့ ပြန်လွှတ်ပေးသွားမည်ဟု တာဝန်ရှိသူများက ပြောထားသည်။
Source: Independent
