နိုင်ငံခြားရေးဝန်ကြီးဌာန ပြည်ထောင်စုဝန်ကြီးဦးသန်းဆွေက မြန်မာသံရုံးနှင့်မြန်မာကောင်စစ်ဝန်ချုပ်ရုံးများ၌ စီးပွားရေးသံမှူးများအဖြစ်သွား ရောက်တာဝန်ထမ်းဆောင်မည့် ဝန်ကြီးဌာန ၅ ခုမှ အရာထမ်းများအား ဖေဖော်ဝါရီ ၁၀ ရက်နံနက် ၉ နာရီခွဲက နေပြည်တော်တွင်တွေ့ဆုံခဲ့ရာ နိုင်ငံတော်၏ စီးပွားရေးဖွံဖြိုးတိုးတက်ရန် ကြိုးစားပေးကြရမည်ဖြစ်ကာ မြန်မာနိုင်ငံ၏ စီးပွားရေးအား ဒေသတွင်းနိုင်ငံများ၌ ရှိသင့်ရှိထိုက်သည့်နေရာတွင် ဖြစ်ပေါ်လာရန် ရည်မှန်းဆောင်ရွက်ရမည်ဟု မှာကြားခဲ့သည်။
စေလွှတ်လိုက်သည့် စီးပွားရေးသံမှူးများသည် ဝန်ကြီးဌာန(၅)ခုမှ အလယ်အလတ်ဝန်ထမ်းများဖြစ်ကြသည်။
ဒေသတွင်းနိုင်ငံများ၏ စီးပွားရေးဖွံ့ဖြိုးတိုးတက်လာမှုများတွင် ယင်းနိုင် ငံ၏ လက်ရှိအခြေအနေတစ်ခုတည်းကိုမကြည့်ဘဲ နောက်ခံသမိုင်းကြောင်းများကိုလည်း လေ့လာရန်၊၎င်းတို့၏ စီးပွားရေးအမြင်များအားလေ့လာ၍ မိမိနိုင်ငံ၏ စီးပွားရေးအခွင့်အလမ်းများကို အကောင်အထည်ဖော်ရန်၊
ကမ္ဘာ့စီးပွားရေး၊ဒေသတွင်းစီးပွားရေးကို လေ့လာပေးရန်၊မြန်မာနိုင်ငံ၏ စီးပွားရေးအခွင့်အလမ်းများကို မိမိတို့ရောက်ရှိမည့် နိုင်ငံများတွင် စီးပွားရေးလုပ်ငန်းရှင်များ စိတ်ပါဝင်စားလာအောင် ကြိုးစားပေးရန်၊မြန်မာနိုင်ငံအနေဖြင့် အရင်းအမြစ် အခွင့်အလမ်းများစွာရှိကြောင်းကို ရင်းနှီးမြှုပ်နှံသူများ စိတ်ဝင်စားလာအောင် ဆွဲဆောင်စည်းရုံးရန်၊ရင်းနှီးမြှုပ်နှံသူများ၏ အကျိုးစီးပွားကို မိမိနိုင်ငံ၏ အကျိုးစီးပွားနှင့်ယှဉ်တွဲ၍ လုပ်ကိုင်လိုစိတ်ဖြစ်ပေါ်လာအောင်ဆောင်ရွက်ရန်၊
မြန်မာနိုင်ငံ၏ စီးပွားရေးဆိုင်ရာအချက် အလက်များကို သိရှိအောင်ဆောင်ရွက်၍ တာဝန်ကျသည့် သက်ဆိုင်ရာ နိုင်ငံ၏ စီးပွားရေးအချက်အလက်များကိုလေ့လာကာ မိမိနိုင်ငံ၏ စီးပွားရေးတိုးတက်လာစေရန် စီးပွားရေးသံမှူးများမှ အတွေးအမြင် ကျယ်ကျယ်ပြန့်ပြန့်သုံးသပ်ကာ အစီရင်ခံစာများ ရေးသားပေးပို့ရန် တို့ကိုမှာကြားခဲ့သည်။
