စစ်ကိုင်းတိုင်း၊ ကောလင်းနှင့် ဘုတလင်မြို့တို့တွင် လက်နက်ကိုင်အဖွဲ့များ၏ လက်နက်ကြီးဖြင့် ပစ်ခတ်မှုကြောင့် ကိုရင် (၂) ပါးနှင့် ကလေး(၂) ဦး ထိမှန်ဒဏ်ရာရရှိခဲ့သည့် ဖြစ်စဉ်ဖြစ်ပွားခဲ့ကြောင်း သိရသည်။
ပြီးခဲ့သည့် ဖေဖော်ဝါရီ (၁၃) ရက် မွန်းတည့်ပိုင်းက လက်နက်ကိုင်အဖွဲ့ဝင်များမှ ခေါပြင်ချောင်း တံတားအနီးမှ ကောလင်းမြို့၊ ကောလင်းမြို့အတွင်းသို့ ဗုံးပစ်လောင်ချာများဖြင့် ပစ်ခတ်ခဲ့သည့်အတွက် ကောလင်းမြို့၊ ကျော်ဇေယျာရပ်ကွက်ရှိ သုနန္ဒာရာမ ဘုန်းတော်ကြီးကျောင်းအတွင်းရှိ သာသနာရေးဝန်ကြီးဌာန၊ အမှတ်(၂)ဘုန်းတော်ကြီးသင်ပညာရေးကျောင်းစာသင်ဆောင်ပေါ်သို့ ကျရောက်ပေါက်ကွဲခဲ့ကြောင်း သိရသည်။
ထိုသို့ ပေါက်ကွဲမှုကြောင့် စာသင်ဆောင်အတွင်း စာသင်ကြားနေသည့် ကိုရင်ရှင်အာသဖ(၁၄)နှစ်၊ ဝါတော်(၂)ဝါ၊ မောင်ဇင်ဝဏ္ဏဖြိုး(၁၃)နှစ်နှင့်မောင်ဝေလင်းအောင် (၁၄) နှစ်တို့တွင် ဗုံးသီးစထိမှန်ဒဏ်ရာများရရှိခဲ့ကြကြောင်း နစကဘက်မှ သတင်းထုတ်ပြန်သည်။
“အသင်းရုံးမှာ ထိုင်နေတုန်း ပေါက်ကွဲသံကြီးတွေကြားရတာနဲ့ လူနာတင်ကားတွေကို အဆင်သင့်လုပ်ထားလိုက်တယ်။ ဘုန်းကြီးကျောင်းမှာ ဒဏ်ရာရတဲ့လူတွေရှိတယ်ဆိုပြီး ဖုန်းသတင်းဝင်လာတာနဲ့ ချက်ျင်းသွားပြီးမြေပြင်ကုသတာတွေလုပ်ပေးပြီးတာနဲ့ ဆေးရုံကိုပို့ပေးခဲ့ပါတယ်။ စာသင်ဆောင်လည်း ပျက်စီးသွားတာတွေရှိတယ်”ဟု ကောလင်းမြို့အခြေစိုက် လူမှုကူညီရေးအသင်းဝင်တစ်ဦးက ပြောသည်။
ထို့ပြင် အဆိုပါနေ့ မွန်းလွှဲ (၃) နာရီခန့်တွင်လည်း ဘုတလင်မြို့၊ မြဝတီရပ်ကွက်နှင့် ခုံမင်းကြီးရပ်ကွက်များအ တွင်းသို့ လက်နက်ကိုင်အဖွဲ့ဝင်များက ရွှေတောင်ကျေးရွာအနီးနှင့်လွှဲတဲကျေးရွာဘက်မှ လက်လုပ်စိန်ပြောင်းများဖြင့် ပစ်ခတ်ခဲ့ကြကြောင်း သိရသည်။
ယင်းသို့ ပစ်ခတ်မှုကြောင့် ဘုတလင်မြို့၊ မြဝတီရပ်ကွက်ရှိ မြို့နယ်စည်ပင်ရုံး၊ ရပ်ကွက်ဘောလုံးကွင်း၊ မြို့မဈေးရှေ့နှင့် ခုံမင်းကြီးရပ်ကွက်ရှိ ဆောင်တန်းကြီးဘုန်းတော်ကြီးကျောင်းဝင်းအတွင်းတို့သို့ ကျရောက်ပေါက်ကွဲကာဆောင်တန်းကြီး ဘုန်းတော်ကြီးကျောင်းရှိ ကိုရင်ကြီးဥူးဝီရိယ(၄၀)နှစ်တွင် ဗုံးစထိမှန်ဒဏ်ရာများရရှိခဲ့ကြောင်း သိရသည်။
ထို့ကြောင့် ဗုံးစထိမှန်ဒဏ်ရာများရရှိခဲ့သည့် ကိုရင် (၂) ပါးနှင့် ကလေး(၂)ဦးတို့အား ကောလင်းမြို့ပြည်သူ့ဆေးရုံနှင့် ဘုတလင်မြို့ ပြည်သူ့ဆေးရုံသို့ ပို့ဆောင်ပေးခဲ့ရကြောင်း သိရသည်။
