လူကုန်ကူးခံရသူများမှာ အမျိုးသမီးများနှင့် ကလေးငယ်များအပြင်အမျိုးသားဦးရေလည်းမြင့်တက်လာ

မြန်မာ – ထိုင်း နှစ်နိုင်ငံ ပူးပေါင်းကာ လူကုန်ကူးမှုတိုက်ဖျက်ရေးအတွက် လုပ်ဆောင်ခဲ့သည်မှာ (၁၀)နှစ်ကျော်ကြာမြင့်ခဲ့ပြီဖြစ်ပြီး အဆိုပါ ပူးပေါင်းဆောင်ရွက်မှုသည် ဒေသတွင်း နိုင်ငံများအတွင်း အကောင်းဆုံးလုပ်ဆောင်နိုင်မှုပင်ဖြစ်ကြောင်း ထိုင်းနိုင်ငံ၊ လူမှုဖွံ့ဖြိုးတိုးတက်ရေးနှင့် လူသားလုံခြုံရေးဝန်ကြီးဌာန၊ ဒုတိယအမြဲတမ်း အ တွင်းဝန် Mr. Thanasunthorn Sawangsalee က ယမန် နေ့ကအစည်း အဝေးတွင် ပြောကြားသွားသည်။

ယမန်နေ့ ဖေဖေါ်ဝါရီ (၁၄) ရက်က ရန်ကုန်မြို့ ဒဂုံမြို့နယ်ရှိ Park Royal Hotel တွင် မြန်မာနိုင်ငံက အိမ်ရှင်အဖြစ် လက်ခံကျင်းပသည့် (၂၇)ကြိမ်မြောက် မြန်မာ-ထိုင်း လူကုန်ကူးခံရသူများအား ပြန်လည်လက်ခံရေး၊ ပြန်လည်ဝင်ဆံ့ပေါင်းစည်းရေးဆိုင်ရာ ဖြစ်ရပ်စီမံခန့်ခွဲမှု ညှိနှိုင်းအစည်းအဝေးတွင် Mr. Thanasunthorn Sawangsalee က ပြောကြားခဲ့ခြင်း ဖြစ်သည်။

” ယနေ့ နိုင်ငံအသီးသီးမှာ လူကုန်ကူးခံရမှုဖြစ်စဉ်များ မြင့်တက်လာခဲ့ရာ ၇၀ ရာခိုင်နှုန်းသော လူကုန်ကူးခံရသူများမှာ အမျိုးသမီးများနှင့် ကလေးငယ်များဖြစ်ကြပြီး လူကုန်ကူးခံရသူ အမျိုးသားဦးရေသည်လည်း သိသိသာသာမြင့်တက်လာပါတယ်” ဟုပြည်​ထောင်စုဝန်ကြီး ဒေါက်တာသက်သက်ခိုင်က လက်ရှိကာလအတွင်း မြန်မာအပါအဝင် နိုင်ငံတကာ၌ ဖြစ်ပေါ်နေသည့် လူကုန်ကူးခံရမှုအ​ခြေအ​နေများအား ထိုအစည်း​ဝေးတွင် ရှင်းလင်းပြောကြားခဲ့သည်။

ယခုနှစ်များအတွင်း မြန်မာ – ထိုင်းနယ်စပ်၊ တရုတ် – မြန်မာ နယ်စပ်နှင့် ထိုင်း – မြန်မာ- လာအို သုံးနိုင်ငံ နယ် စပ်ရှိ တရားမဝင် လောင်းကစားရုံများ၊ မူးယစ်ဆေးဝါး မှောင်ခိုလုပ်ငန်းများ၊ လိင်ကျွန် လုပ်ငန်များတွင် မြန်မာနိုင်ငံအတွင်းရှိ လူငယ်များ အပါအဝင် ဒေသတွင်း နိုင်ငံအချို့မှ အမျိုးသမီး၊ အမျိုးသားများ လူကုန်ကူးခံရခြင်း ၊ အဓမ္မအလုပ်စေခိုင်းခံရခြင်း ၊ တရားမဝင် လိင်ကျွန်ပြုခံရသည့် ဖြစ်စဉ်များ ကျယ်ကျယ်လောင်လောင် ဖြစ်ပေါ် နေပြီး သက်ဆိုင်ရာနိုင်ငံရဲတပ်ဖွဲ့များ၊ စုံစမ်းထောက်လှမ်း ရေးအဖွဲ့များနှင့် ပူးပေါင်း ဖော်ထုတ်ကာ ကယ်ထုတ်ခဲ့ရသည့် ဖြစ်စဉ်များ မကြာခဏ ဖြစ်ပေါ်နေခြင်း ဖြစ်သည်။

အဆိုပါ ဖြစ်စဉ်များတွင် ထိုင်း – မြန်မာနယ်စပ်ရှိ လက်နက်ကိုင်အဖွဲ့များ ထိန်းချုပ်ထားသည့် နယ်မြေအတွင်းရှိ တရုတ်လူမျိုးပိုင် တရားမဝင် လောင်းကစားရုံများတွင် ထိုင်းနိုင်ငံသားများ အပါအဝင် အိန္ဒိယ နိုင်ငံသားများနှင့် ဒေသတွင်းနိုင်ငံအချို့မှ လူငယ်အချို့ ထိုင်းနယ်စပ်မှတဆင့် လူကုန်ကူးခံရသည့်အတွက် ဝင်ရောက်ကယ်ထုတ်ခဲ့ရသည့် ဖြစ်စဉ်များ ၂၀၂၀ ခုနှစ် နောက်ပိုင်းတွင် မကြာခဏဖြစ်ပေါ်ခဲ့ကြောင်း ပြည်တွင်းပြည်ပ သတင်းအချို့၏ ဖော်ပြချက်များအရ သိရသည်။

အဆိုပါ အစည်းအဝေးတွင် လူကယ်ပြန် ဝန်ကြီးက လူကုန်ကူးခံရသူများ၏ အကျိုးစီးပွားအတွက် လူကုန်ကူးခံရသူ ဗဟိုပြုနည်းလမ်းများနှင့် နီးကပ်စွာပူးပေါင်းဆောင်ရွက်မှုများကို ဆက်လက်ထိန်းသိမ်းသွားမည်ဖြစ်ပြီး အနာဂတ်တွင်လည်း နှစ်နိုင်ငံအနေဖြင့် လူကုန်ကူးခံရသူများ၏ အခွင့်အရေးကို အပြည့်အဝ ဖော်ဆောင်ပေးနိုင်ရန် ပိုမိုပူးပေါင်းဆောင်ရွက်သွားမည်ဖြစ်ကြောင်း ပြောကြားခဲ့သည်။

Mr.Thanasunthorn Sawangsalee က လူကုန်ကူးမှုတိုက်ဖျက်ရေးကို  မြန်မာ-ထိုင်း နှစ်နိုင်ငံ သာမက နိုင်ငံပေါင်းစုံမှပါ ပူးပေါင်းဆောင်ရွက်ရမည် ဖြစ်ကြောင်းလည်းဆိုသည်။

(၂၇) ကြိမ်မြောက်အဖြစ်ကျင်းပ​သော မြန်မာ-ထိုင်း လူကုန်ကူးခံရသူများအားပြန်လည်လက်ခံရေး၊ ပြန်လည်ဝင်ဆံ့ပေါင်းစည်းရေးဆိုင်ရာ ဖြစ်ရပ်စီမံခန့်ခွဲမှု ညှိနှိုင်းအစည်းအဝေးသို့ မြန်မာဖက်မှ လူကယ်ပြန်ဝန်ကြီး ဒေါက်တာသက်သက်ခိုင် ၊ အမြဲတမ်းအတွင်းဝန် ဒေါက်တာကိုကိုနိုင်၊ ပြန်လည် ထူထောင်ရေး ဦးစီးဌာန ညွန်ကြားရေးမှူးချုပ် ဦးအောင်ကျော်မိုးအပါအဝင် ကိုယ်စားလှယ်အဖွဲ့ဝင်(၃၀)ဦး၊ ထိုင်းနိုင်ငံ၊လူမှုဖွံ့ဖြိုးတိုးတက်ရေးနှင့်လူသားလုံခြုံရေးဝန်ကြီး ဌာန၊ ဒုတိယ အမြဲတမ်းအတွင်းဝန်၊ Mr. Thanasunthorn Sawangsalee ဦးဆောင်သော ထိုင်းကိုယ်စားလှယ် အဖွဲ့ဝင်(၁၅)ဦး တက်ရောက်ခဲ့ကြကြောင်း သိရသည်။