ပါရီ၊ ဖေဖော်ဝါရီ ၁၆
ကမ္ဘာတစ်ဝန်းရှိ ကလေးနို့မှုန့်များကို ကြော်ငြာရာတွင် ဖော်ပြထားသော ကျန်းမာရေးဆိုင်ရာအကျိုးကျေးဇူးအများစုကို ခိုင်လုံသော သိပ္ပံနည်းကျ အထောက်အကျများဖြင့် သက်သေပြထားခြင်းမရှိကြောင်း လေ့လာမှုတစ်ရပ်က ဖေဖော်ဝါရီလ ၁၆ ရက် ကြာသပတေးနေ့တွင် ဖော်ပြထားသည်။
လေ့လာမှုကို ပြုလုပ်ခဲ့သော သုတေသီများသည် ကလေးနို့မှုန့်များအားအသုံးပြုခြင်းကို ဆန့်ကျင်ခြင်း မဟုတ်ကြောင်း၊ သို့ရာတွင် ခိုင်လုံသော အထောက်အထားများဖြင့် သက်သေမပြထားသော ကျန်းမာရေးကောင်းကျိုးများအား ကလေးနို့မှုန့်များတွင် ထည့်သွင်းကြေညာ၍ မိဘများအား အမြင်မှားအောင် ပြုလုပ်ခြင်းကိုမူ လုံးဝဆန့်ကျင်ကြောင်း အဆိုပါလေ့လာမှုအား ရေးသားခဲ့သူ အင်ပီရီရယ် ကောလိပ် လန်ဒန်မှ ဂုဏ်ထူးဆောင် ဝါရင့်ကထိက ဒန်နီရယ် မန်ဘလစ်က အေအက်ဖ်ပီ သတင်းဌာနသို့ ပြောခဲ့သည်။
မန်ဘလစ် နှင့် နိုင်ငံတကာ သုတေသီအဖွဲ့တစ်ဖွဲ့သည် အမေရိက၊ အိန္ဒိယ၊ ဗြိတိန်နှင့် နိုင်ဂျီးရီးယားတို့ အပါအဝင် နိုင်ငံပေါင်း ၁၅ နိုင်ငံတွင်ရှိသော ကလေးနို့မှုန့် ကုမ္ပဏီများ၏ ဝဘ်ဆိုဒ်များရှိ ထုတ်ကုန် ၆၀၈ ခုတွင် ဖော်ပြထားသော ကျန်းမာရေးဆိုင်ရာ အကျိုးကျေးဇူးများကို လေ့လာခဲ့ကြသည်။
ကလေးနို့မှုန့်များတွင် အများဆုံးဖော်ပြထားလေ့ရှိသော ကျန်းမာရေးဆိုင်ရာ အကျိုးကျေးဇူးများမှာ ဦးနှောက်ဖွံ့ဖြိုးမှုကို အထောက်အကူပြုပေးခြင်း၊ ကိုယ်ခံအားစနစ်ကို မြှင့်တင်ပေးခြင်းနှင့် ကြီးထွားနှုန်း မြန်ဆန်စေခြင်း တို့ဖြစ်ကြောင်း သိရသည်။
သို့ရာတွင် ကလေးနို့မှုန့်များ၏ ထက်ဝက်ခန့်တွင် ပါဝင်သောပစ္စည်းများသည် ဖော်ပြထားသော ကျန်းမာရေးဆိုင်ရာ အကျိုးကျေးဇူးများအား ဖြစ်ပေါ်စေသည့် ပစ္စည်းများနှင့် ဆက်စပ်မှု မရှိနေသည်ကို တွေ့ရှိခဲ့ရကြောင်း အဆိုပါ လေ့လာမှုတွင် ဖော်ပြထားသည်။
ကလေးနို့မှုန့် လေးပုံသုံးပုံသည် ၎င်းတို့တွင် ပါဝင်သော ကျန်းမာရေးဆိုင်ရာအကျိုးကျေးဇူးများ တကယ်ရရှိကြောင်းကို ထောက်ခံထားသည့် သိပ္ပံနည်းကျ အထောက်အထားများကိုလည်း ထုတ်ဖော်ပြသထားခြင်း မရှိခဲ့ပေ။
ထို့ပြင် ကလေးနို့မှုန့်များ၏ ၁၄ ရာခိုင်နှုန်းသည်သာ လူသားများဖြင့် ဆေးဘက်ဆိုင်ရာစမ်းသပ်မှုများ ပြုလုပ်ထားသည်ဟု သိရသည်။
ထို့ကြောင့် ကမ္ဘာ့ကျန်းမာရေးအဖွဲ့ (WHO) နှင့် အမေရိကရောဂါထိန်းချုပ်ရေးနှင့် ကာကွယ်ရေးဌာနများ (US CDC) တို့သည် ကလေးများအား မွေးဖွားပြီးနောက် ပထမခြောက်လအတွင်း မိခင်နို့တစ်မျိုးတည်းကိုသာ တိုက်ကျွေးရန်အကြံပြုထားသည်။
Source: CNA
