ထိုင်းနိုင်ငံအတွင်း နိုင်ငံခြားခရီးသည်ဝင်ကြေးအား လာမည့် ဇွန်လမှစတင်၍ ကောက်ခံသွားမည်ဖြစ်ကြောင်း ဗန်ကောက်ပို့စ်၏ သတင်းတစ်ရပ်တွင် ဖော်ပြထားချက်အရသိရသည်။
အဆိုပါ ကောက်ခံမှုအား ထိုင်းနိုင်ငံလွှတ်တော်က အတည်ပြုခဲ့ခြင်းဖြစ်ကာ၊ နိုင်ငံခြားခရီးသည်ဝင်ကြေးကို ဘတ် ၁၅၀ နှင့် ဘတ် ၃၀၀ အသီးသီးကောက်ခံသွားမည်ဖြစ်ပြီး၊ နေ့ချင်းပြန် ခရီးသွားများကိုမူ ဝင်ကြေးကောက်ခံမည်မဟုတ်ကြောင်းဖော်ပြထားသည်။
နိုင်ငံခြားခရီးသည် ဝင်ကြေးကောက်ခံမှုတွင် လေကြောင်းမှဝင်ရောက်သူများအား ဘတ်ငွေ ၃၀၀ ၊ ရေကြောင်းနှင့် ကုန်းကြောင်းမှဝင်ရောက်သူများကို ဘတ်ငွေ ၁၅၀ ဟူ၍အသီးသီးကောက်ယူမည်ကြောင်းသိရသည်။
ထိုင်းနိုင်ငံအစိုးရအနေဖြင့် ယခုနှစ်အတွင်း နိုင်ငံခြားခရီးသည်ဝင်ရောက်မှုမှ ဘတ် ၃ ဒသမ ၉ ဘီလီယံ ရရှိမည်ဟုမျှော်လင့်ထားပြီး ယင်းဝင်ငွေအတွင်းမှ တစ်စိတ်တစ်ပိုင်းကို ခရီးသွားများ ထိုင်းနိုင်ငံအတွင်းနေထိုင်စဉ် ကျန်းမာရေးနှင့် မတော်တဆမှုများ၏ အာမခံအတွက်အသုံးပြုသွားမည်ဖြစ်ကြောင်း ထိုင်းခရီးသွားလုပ်ငန်းနှင့်အားကစားဝန်ကြီး Phiphat Ratchakitprakarn က ပြောကြားခဲ့သည်။
Phiphat က “အခုဝင်ကြေးက ခရီးသွားတွေကို စောင့်ရှောက်ဖို့အတွက်ပဲသုံးမှာပါ။၂၀၁၇ ခုနှစ်ကနေ ၂၀၁၉ ခုနှစ်အတွင်း ပြည်သူ့ဆေးရုံတွေမှာနိုင်ငံခြားခရီးသွားတွေအတွက်ကုန်ကျစရိတ်က ဘတ်သန်း ၃၀၀ ကနေ ၄၀၀ အထိရှိတာကြောင့်အခုလို ဝင်ကြေးကောက်လိုက်တဲ့ပိုက်ဆံတွေကနေပြန်ထေမိအောင်ပါ” ဟုဆိုခဲ့သည်။
ထိုင်းအစိုးရအနေဖြင့် ယခု ၂၀၂၃ ခုနှစ်အတွင်းနိုင်ငံခြားခရီးသွားများ သန်း ၃၀ အထိလာရောက်နိုင်ဖွယ်ရှိသည်ဟု ခန့်မှန်းထားပြီး၊ ယခင်နှစ်ထက် သုံးဆပိုများလာနိုင်သည်ဟုလည်း ခန့်မှန်းထားကြောင်းသိရသည်။
ကိုဗစ်ကပ်ရောဂါမတိုင်မီ ၂၀၁၉ ခုနှစ်၌ ထိုင်းနိုင်ငံအတွင်း နိုင်ငံခြားသားခရီးသွား သန်း ၄၀ အထိ ဝင်ရောက်ခဲ့ကြောင်း ဗန်ကောက်ပိုစ့်သတင်း၌ဖော်ပြထားသည်။
