ဗိုလ်ချုပ်မှူးကြီးမင်း​အောင်လှိုင်က ရုရှားသမ္မတ ပူတင်ထံ သဝဏ်လွှာပို့

မြန်မာ-ရုရှား နှစ်နိုင်ငံသံတမန်ဆက်ဆံရေး (၇၅) နှစ်မြောက် စိန်ရတုအထိမ်းအမှတ်အဖြစ် နစက ဥက္ကဋ္ဌ၊ဗိုလ်ချုပ်မှူးကြီးမင်းအောင်လှိုင်က ရုရှားသမ္မတထံသို့ သဝဏ်လွှာပေးပို့ခဲ့သည်။

၁၉၄၈ ခုနှစ်တွင် နှစ်နိုင်ငံသံတမန်ဆက်ဆံရေးစတင်ထူထောင်ခဲ့ချိန်မှစ၍ မိမိတို့နှစ်နိုင်ငံသည် အပြန်အလှန်လေးစားမှု၊နားလည်မှုတို့ဖြင့် ထူးခြားသောကာလရှည်ကြာချစ်ကြည်ရင်းနှီးမှုကို တည်ဆောက်ပိုင်ဆိုင်ထားပါ​ကြောင်း၊

နိုင်ငံတကာအခင်းအကျင်းတွင် ပြောင်းလဲမှုများရှိသော်လည်း မြန်မာနိုင်ငံနှင့်ရုရှားနိုင်ငံတို့၏ ချစ်ကြည်ရင်းနှီးမှုနှင့်မိတ်ဖက်ဆောင်ရွက်မှုတို့သည် ဆက်လက်နွေးထွေးနီးကပ်နေဆဲပင်ဖြစ်​ကြောင်း၊

ရုရှားနိုင်ငံ၌ မြန်မာကျောင်းသားများစွာ ပညာသင်ယူခဲ့၊သင်ယူဆဲရှိကာ ပြည်သူအချင်းချင်းဆက်သွယ်မှုများလည်းရှိ​နေ​ကြောင်း၊ မြန်မာနိုင်ငံသည် ရုရှားနိုင်ငံကိုအရေးကြီးပြီး ယုံကြည်အားထားရသော မိတ်ဖက်နိုင်ငံအဖြစ် အစဉ်မှတ်ယူထား​ကြောင်း၊

မြန်မာနိုင်ငံ၏ ခက်ခဲသောကာလများတွင် အစဉ်တစိုက် ထောက်ခံပေးမှုအပေါ် မြင့်မားစွာတန်ဖိုးထားကျေးဇူးတင်ရှိ​ကြောင်း၊

နှစ်နိုင်ငံအဆင့်မြင့်အပြန်အလှန်ခရီးစဉ်များနှင့် နယ်ပယ်စုံအဆင့်အသီးသီးတွင် ထိတွေ့ဆက်ဆံမှုနှင့်ပူးပေါင်းဆောင်ရွက်မှုတိုးမြင့်လာခြင်းသည် နှစ်နိုင်ငံနှင့်ပြည်သူများအတွက် အကျိုးရလဒ်ကောင်းများကိုဖြစ်ထွန်းစေခဲ့ခြင်းကို ဝမ်းမြောက်ပါ​ကြောင်း၊

၂၀၂၂ ခုနှစ်၊ စက်တင်ဘာလက မိမိ၏ခရီးစဉ်အတွင်း၌ မိမိတို့နှစ်ဦးလုံးသည် နှစ်နိုင်ငံဆက်ဆံရေးနှင့်ကဏ္ဍစုံပူးပေါင်းဆောင်ရွက်မှုကို နှစ်နိုင်ငံပြည်သူများ၏ ဘုံအကျိုးစီးပွားအတွက် ပိုမိုမြှင့်တင်သွားရန် သဘောတူခဲ့ကြသည်ကို ဝမ်းမြောက်စွာအမှတ်ရမိပြီး များမကြာမီကာလအတွင်း စိန့်ပီတာစ်ဘတ်မြို့နှင့်နိုဗိုစီဗစ်မြို့၌ မြန်မာကောင်စစ်ဝန်ချုပ်ရုံးများဖွင့်လှစ်ခြင်းဖြင့် နှစ်နိုင်ငံကြား ချစ်ကြည်ရင်းနှီးမှု၊ကုန်သွယ်ရေး၊ရင်းနှီးမြှုပ်နှံမှု၊ခရီးသွားလုပ်ငန်းနှင့်ယဉ်ကျေးမှုကဏ္ဍ ပူးပေါင်းဆောင်ရွက်မှုများကို ပိုမိုမြင့်မားသည့် အဆင့်တစ်ခုသို့ မြှင့်တင်ဆောင်ရွက်နိုင်မည်ကို အခိုင်အမာယုံကြည်​ပါကြောင်း၊

၂၀၂၃ ခုနှစ်သည် နှစ်နိုင်ငံဆက်ဆံရေးသမိုင်းမှတ်တိုင်တစ်ရပ်ကို အမှတ်ရဖော်ကျူးရန် အချိန်ဖြစ်သည့်အပြင် နှစ်နိုင်ငံဆက်ဆံရေးနှင့် နှစ်ဖက်အကျိုးဖြစ်ထွန်းစေမည့် ပူးပေါင်းဆောင်ရွက်မှုများကို ပြန်လည်သုံးသပ်၍ အားသစ်လောင်းနိုင်မည့် အချိန်အခါလည်းဖြစ်​ကြောင်း၊

ယခု အရေးပါသည့်အချိန်တွင် နှစ်နိုင်ငံဆက်ဆံရေးပိုမိုခိုင်မာစေရန်နှင့်အာရှပစိဖိတ်ဒေသနှင့်ယင်းဒေသအပြင်ဘက် တည်ငြိမ်သာယာဝပြောရေးအတွက် အထောက်အကူဖြစ်စေမည့် ဘုံအကျိုးစီးပွားဖြစ်ထွန်းစေသည့် ကဏ္ဍစုံတွင် ပူးပေါင်းဆောင်ရွက်မှုချဲ့ထွင်သွားရန် ရုရှားနိုင်ငံ အစိုးရနှင့်ပိုမိုနီးကပ်စွာ လက်တွဲလုပ်ဆောင်သွားမည့် မြန်မာနိုင်ငံအစိုးရ၏ ကတိကဝတ်ကိုလည်း ထပ်လောင်းအတည်ပြုပါ​ကြောင်း သဝဏ်လွှာ၌ရေးသားထားသည်။