ဖုန်းဆင်းကတ်များ အချက်အလက်မှန်၊ မမှန် စစ်ဆေးပြီး ဆင်းကတ်မှတ်ပုံတင်သည့် အမည်/နိုင်ငံသားစိစစ်ရေးကတ်အမှတ်တို့ကို မှန်/မမှန် စစ်ဆေးပြီး ပြင်ဆင်ရန်လိုအပ်ပါက ဇန်နဝါရီလ ၃၁ ရက်နောက်ဆုံးထား၍ ပြည်လည်ပြင်ဆင်သတ်မှတ်ရန် မိုဘိုင်းအော်ပရိတ်တာများမှ အသိပေးထားသည်။
သတ်မှတ်ရက် နှစ်ပတ်ကျော်လာသည့် ယခုအခါတွင် ပြည်တွင်း၌ အသုံးပြုနေသည့် ဖုန်းဆင်းမ်ကတ်များထဲမှ မှတ်ပုံတင်ထားခြင်းမရှိသည့် ဆင်းမ်ကတ်များကို စတင်ပိတ်သိမ်းမှုတွေပြုလုပ်နေပြီဖြစ်ကြောင်း ဖုန်းသုံးစွဲသူများထံမှ သိရသည်။
ဆက်သွယ်ရေးဝန်ကြီးဌာနက ဆင်းမ်ကတ်သုံးစွဲသူများအားပြန်လည် မှတ်ပုံတင်ခိုင်းထားပြီး မှတ်ပုံမတင်သည့် ဆင်းမ်ကတ်တွေကို ပိတ်သိမ်းသွားမည်ဖြစ်ကြောင်း ၂၀၂၂ ခုနှစ် ဒီဇင်ဘာလတွင် ကြေညာထားခြင်းဖြစ်သည်။
“ကျွန်တော်က ဆင်းကတ်နှစ်ကတ်သုံးတာပေါ့။ MPT ကတော့နဂိုကတည်းက မှတ်ပုံတင်ထားတာ။ တယ်လီနောကတော့ မှတ်ပုံမတင်မိဘူး။ အဲဒီတယ်လီနောတစ်ကတ်က ဒီနေ့နဲ့ဆို နှစ်ရက်ရှိပြီ လိုင်းမရတော့ဘူး။ ကတ်ကလုံးဝပိတ်သွားတာ။ အော်ပရေတာဆီသွားလုပ်မှ မှတ်ပုံတင်ခိုင်းပြီး ပြန်ပွင့်လာတယ်”ဟု တောင်ဥက္ကလာပမြို့နယ်တွင် နေထိုင်သူတစ်ဦးက ပြောသည်။
“MPT အပလီကေးရှင်းကနေ လုပ်ကြည့်တယ်။လုပ်ဆောင်မူအောင်မြင်ပါတယ်ပြောပေမယ့် ဆိုင်မှာပြန်စစ်တဲ့အခါ မှတိပုံတင်ကိုဓါတ်ပုံရိုက်ထားတဲ့ဘေးသားတွေပါတင်မိတဲ့အတွက် ပြန်လုပ်ရမယ်လို့ဆိုပါတယ်။ ဆိုင်မှာသွားလုပ်လိုက်တာ ပိုအဆင်ပြေပါတယ်။စျေးဝယ်စင်တာတွေမှာရှိတဲ့ ဖုန်းလိုင်းဝန်ဆောင်မူကောင်တာတွေမှာ MPTကတော့ ညနေ ၄နာရီခွဲလောက်ထိပဲ ဝန်ဆောင်မူပေးတယ်။ကျန်တာတွေကတော့ရတယ်”ဟု မြန်မာပလာဇာမှာ သွားလုပ်ခဲ့သူတစ်ဦးကပြောသည်။
အသုံးမပြုတာကြာပြီဖြစ်သောမြန်မာ့ဆက်သွယ်ရေး ဖုန်းဆင်းမ်ကတ်များ(ပျောက်ဆုံး)အတွက်ပြန်လည်လျောက်ထားလိုပါက ယခင်ထုတ်ပေးဖူးသည့် စာချုပ်၊ ဖုန်းအခွန်ငွေတောင်းသည့်စာအုပ်အနီတို့ကို ယူဆောင်လာကာ ပြန်လည်လျောက်ထားနိုင်ကြောင်းသိရသည်။
ပြည်တွင်း၌ ဆက်သွယ်ရေးအော်ပရေတာများဖြစ်သည့် အော်ရီဒူး၊ အက်တမ် (တယ်လီနော)၊ MPT ၊ Mytel စသည့် ဆင်းကတ်တွေကို မှတ်ပုံတင်ပြီးမှသာသုံးစွဲရမည်ဖြစ်ပြီး ဆင်းကတ်များမှတ်ပုံတင်ရာတွင်လည်း ဖြည့်စွက်ရမည့်အမည်၊ နိုင်ငံသားစိစစ်ရေးကတ်အမှတ် စသည့်အချက်အလက်များကို လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၏ အချက်အလက်များနှင့် တိုက်ဆိုင်စစ်ဆေး၍ အချက်အလက်မှန်ကန်စွာဖြည့်စွက်ထားခြင်းမရှိသည့် ဆင်းကတ်များကို ပိတ်သိမ်းမည်ဖြစ်ကာ လက်ကျန်ငွေကို ပြည့်သူ့ဘဏ္ဍာအဖြစ် သိမ်းဆည်းသွားမည်ဖြစ်ကြောင်း သိရသည်။
