လက်ရှိတွင် နစက၏ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်ရေးအဖွဲ့နှင့် နိုင်ငံရေးပါတီများအစုအဖွဲ့၏ လုပ်ငန်းအဖွဲ့ အပါအဝင် တိုင်းရင်းသား လက်နက်ကိုင်အဖွဲ့များနှင့်ပါ ၂၀၀၈ ဖွဲ့စည်းပုံ ပြင်ဆင်ရေး တွေ့ဆုံဆွေးနွေးမှုများ လုပ်ဆောင်နေလျှက်ရှိသည်။
အဆိုပါ တွေ့ဆုံဆွေးနွေးမှုအနေဖြင့် ဖေဖေါ်ဝါရီ (၁၇) ရက်က နေပြည်တော်ရှိ အမျိုးသား စည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ဗဟိုဌာနတွင် ဗိုလ်ချုပ်ရာပြည့် ဦးဆောင်သည့် ငြိမ်းချမ်းရေးဖော်ဆောင်မှု ညှိနှိုင်းရေးအဖွဲ့နှင့် ကျားဖြူပါတီ ဥက္ကဋ္ဌ ဦးစိုင်းအိုက်ပေါင်း ဦးဆောင်သည့် နိုင်ငံရေးပါတီများ အစုအဖွဲ့၏ အလုပ်အဖွဲ့တို့ တွေ့ဆုံဆွေးနွေးခဲ့ကြကြောင်း သိရသည်။
” အဲဒီရဲ့ဟာက ဘယ်မှာသွားမှာလဲဆိုတော့ နောင်လာမယ့် လွှတ်တော်ဖြစ်လာတဲ့အခါကျရင် ဒီအပေါ်မှာ တပ်မတော်က ထောက်ခံပြီးပြီဖြစ်တဲ့အတွက် ဒီအပေါ်မှာ အတည်ပြုတာကို လွှတ်တော်ထဲမှာ ချပေးလိုက်မှာပေါ့။ တပ်မတော် အနေနဲ့ကတော့ ထောက်ခံအတည်ပြုပေးမယ်လို့ အတိအလင်း ပြောပါတယ်” ဟု နိုင်ငံရေးပါတီများ အစုအဖွဲ့၏အ လုပ်အဖွဲ့တွင် ပါဝင်သည့် ဦးစိန်ဝင်းက ပြောသည်။
ဖေဖေါ်ဝါရီ (၁၇) ရက်က ပြုလုပ်သည့် ဆွေးနွေးပွဲတွင် နိုင်ငံရေးပါတီများ အစုအဖွဲ့၏ အလုပ်အဖွဲ့မှ ၂၀၀၈ ဖွဲ့စည်းပုံ အခြေခံဥပဒေမှ ဖြည့်စွက်ပြင်ဆင်လိုသည့် အချက် (၁၁) ချက် အဆိုပြုတင်ပြ ဆွေးနွေးခဲ့ကြောင်း သိရသည်။
အဆိုပါ အဆိုပြု တင်ပြချက်များကို ဒုတိယဗိုလ်ချုပ်ကြီး ရာပြည့် ဦးဆောင်သည့် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီက လေ့လာဆန်းစစ်ချက်များကို တစ်ချက်ချင်းအလိုက် အလွတ်သဘော ဆွေးနွေးခဲ့ကြပြီး နှစ်ဖက်တွေ့ဆုံဆွေးနွေးမှုများအရ ရရှိလာသည့် သဘောထားများကို သဘောထားစုစည်းချက်များအဖြစ် မှတ်တမ်းတင်ခဲ့ကြကြောင်းလည်း သိရသည်။
၂၀၂၂ ခုနှစ် ဒီဇင်ဘာ လကုန်ပိုင်းကလည်း PPST အဖွဲ့ဝင် တိုင်းရင်းသား လက်နက်ကိုင်အဖွဲ့ (၅) ဖွဲ့နှင့် ဒုတိယဗိုလ်ချုပ်ကြီး ရာပြည့် ဦးဆောင်သည့် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီတို့အကြား ၂၀၀၈ ဖွဲ့စည်းပုံပြင်ဆင်ရေး ဆွေးနွေးမှုများ လုပ်ဆောင်ခဲ့သည်။
အဆိုပါ ဆွေးနွေးမှုမှ ရရှိခဲ့သည့် သဘောတူညီချက်များကိုလည်း ဖေဖေါ်ဝါရီ (၁၇)ရက်က ပြုလုပ်သည့် ဆွေးနွေးပွဲတွင် တပ်မတော်ဘက်မှ ချပြဆွေးနွေးခဲ့ပြီး နိုင်ငံရေးပါတီများ အစုအဖွဲ့အနေဖြင့် အဆင်သင့်မဖြစ်သေးသည့်အတွက် အကျယ်တဝင့် ပြန်လည်ဆွေးနွေးနိုင်မှုမရှိခဲ့ကြောင်း သိရသည်။
” EAO တွေနဲ့ ယေဘူယျ အားဖြင့် (၁၀) ချက် သဘောတူထားတာရှိတယ်။ ဒါကိုလည်း ကျွန်တော်တို့ကို ချပြပြီးတော့ ဆွေးနွေးခိုင်းတာရှိတယ်။ အစည်းဝေးထဲမှာမှ လျှ ပ်တပြက် ချပြတဲ့အတွက် အဲဒီအပေါ်မှာတော့ ကျယ်ကျယ်ဝန်းဝန်း မဆွေးခဲ့ရဘူး” ဟု ဦးစိန်ဝင်းက ပြောသည်။
ထို့အပြင် အဆိုပါဆွေးနွေးပွဲ၌ နိုင်ငံရေးပါတီများ မှတ်ပုံတင်ခြင်း ဥပဒေသစ်အရ နိုင်ငံရေးပါတီများ ပေါ်ပေါက်လာပါက လက်ရှိ နိုင်ငံရေးပါတီများအစုအဖွဲ့၏ အလုပ်အဖွဲ့အား ပြန်လည်ပြင် ဆင်ဖွဲ့စည်းနိုင်မည့် အခြေအနေများကိုလည်း ဆွေးနွေးခဲ့ကြကြောင်း သိရသည်။
