မြန်မာအက်ဂရိုအိတ်(စ်)ချိန်း အများနှင့်သက်ဆိုင်သော ကုမ္ပဏီလီမိတက် (MAEX PCL) က လက်ရှိတွင် အစုရှယ်ယာရှင်များအား ဦးစားပေးရောင်းချသည့် အစီအစဉ် Right Issue ဖြင့် ရှယ်ယာတစ်စောင်လျှင် (၁၅၀၀) ကျပ်ဖြင့် ရောင်းချမည်ဖြစ်ကြောင်း အသိပေးထုတ်ပြန်ထားသည်။
မြန်မာနိုင်ငံကုမ္ပဏီများဥပဒေပုဒ်မ ၆၃(ဂ) ၊ ကုမ္ပဏီရဲ့ မူလဖွဲစည်းပုံ အခြေခံစည်းမျဉ်းအပိုဒ် ၅၉ နဲ့အညီ ရန်ကုန်စတော့အိတ်(စ်)ချိန်း – YSX ကို မတက်ရောက်မီ လက်ရှိအစုရှယ်ယာရှင်များအား ဦးစားပေးအနေဖြင့် မူလအစုရှယ်ယာ (၁၀) စု ပိုင်ဆိုင်ပါက (၁) စုနှုန်းဖြင့် ထပ်မံဝယ်ယူခွင့်ပြုရန် ဆုံးဖြတ်ခြင်းဖြစ်ကြောင်း သိရသည်။
ရှယ်ယာရှင်တွေအနေဖြင့် မိမိအစုရှယ်ယာအချိုးအရ ဝယ်ယူခွင့်ရှိသည့် ရှယ်ယာတွေကို ကိုယ်တိုင်ဝယ်ယူလိုခြင်းရှိ၊ မရှိ ပြန်ကြားနိုင်ရန် Link ကို SMS ပေးပို့သွားမည်ဖြစ်ပြီး ရှယ်ယာရှင်တွေဘက်မှ မတ်လ ၁၀ ရက် (သောကြာနေ့) နောက်ဆုံးထား အကြောင်းပြန်ပေးရမည်ဖြစ်ကြောင်း ကြေညာချက်တွင် ဖော်ပြထားသည်။
ကိုယ်တိုင်ဝယ်ယူမယ်ဟု အကြောင်းပြန်ကြားသည့် အစုရှယ်ယာရှင်တွေအနေဖြင့် ဝယ်ယူမည့် ရှယ်ယာတန်ဖိုး၏ ၅၀ ရာခိုင်နှုန်းကို ပထမအရစ်အဖြစ် မတ်လ ၃၁ ရက်နေ့ နောက်ဆုံးထား ပေးသွင်းရမည်ဖြစ်ပြီး ကျန် ၅၀ ရာခိုင်နှုန်းကို ဒုတိယအရစ်အဖြစ် မေလ ၃၁ ရက်နေ့ နောက်ဆုံးထား ပေးသွင်းရမည်ဖြစ်သည်။
ပထမအရစ် ၅၀ ရာခိုင်နှုန်း ပေးသွင်းပြီး ဒုတိယအရစ် ၅၀ ရာခိုင်နှုန်း တန်ဖိုးငွေကို သတ်မှတ်ရက်အတွင်း ပေးသွင်းရန် ပျက်ကွက်သည့် ရှယ်ယာရှင်တွေအနေဖြင့် ပေးသွင်းပြီး တန်ဖိုးနှင့် ကိုက်ညီသည့် ရှယ်ယာအရေအတွက်ကိုသာ ပိုင်ဆိုင်ခွင့် ရရှိမည်ဖြစ်ကြောင်းလည်း အသိပေးထားသည်။
သတ်မှတ်ကာလအတွင်း အကြောင်းပြန်ကြားခြင်းမရှိသည့် ရှယ်ယာရှင်များ၊ ဝယ်ယူခြင်းမပြုကြောင်း ပြန်ကြားသည့် ရှယ်ယာရှင်များ သက်ဆိုင်ရာ အရစ်အလိုက် နောက်ဆုံးနေ့ရက်အထိ ငွေပေးသွင်းမှု ပျက်ကွက်သည့် ရှယ်ယာရှင်များ ဝယ်ယူခွင့်ရှိသည့် အစုရှယ်ယာတွေကို ကုမ္ပဏီဘက်က သင့်လျော်သည်ဟု ထင်မြင်သည့်အတိုင်း ဒါရိုက်တာအဖွဲ့၏ ဆုံးဖြတ်ချက်နှင့် ခွဲဝေရောင်းချပေးသွားမည်ဖြစ်ကြောင်းသိရသည်။
Right Issue တွေကို ဝယ်ယူသူတွေအနေနဲ့ ၂၀၂၂-၂၀၂၃ ဘဏ္ဍာနှစ် အမြတ်ဝေစု ခွဲဝေခြင်းနှင့် ပတ်သက်ပြီး ကြေညာခြင်းမပြုမီ ရှယ်ယာတန်ဖိုး အပြည့်အဝပေးချေပြီးပါက မူလရှယ်ယာတွေနည်းတူ အမြတ်ဝေစုဆိုင်ရာ အကျိုးခံစားခွင့် ရရှိသွားမည်ဖြစ်ကြောင်း MAEX က ကြေညာထားသည်။
