မြန်မာနိုင်ငံ ဘောလုံးအဖွဲ့ချုပ် MFF မှ ဘောလုံးဖွံ့ဖြိုးရေးနှင့် လူငယ်မျိုးဆက်သစ်များအတွက် နွေရာသီ လူငယ်ဘောလုံးသင်တန်းများကို စပွန်ဆာများ၏ ပံ့ပိုးကူညီမှုဖြင့် အခမဲ့ ဖွင့်လှစ်သွားမည်ဖြစ်သည်။
၂၀၂၃ နွေရာသီ လူငယ် ဘောလုံးသင်တန်း အမှတ်စဉ် (၁)နှင့် (၂)ကို ရန်ကုန်နှင့် မန္တလေးရှိ မြန်မာနိုင်ငံဘောလုံးအဖွဲ့ချုပ် (MFF ) ဘောလုံးအကယ်ဒမီများနှင့် ဗဟန်းကွင်းတို့တွင် သင်တန်းကြေး အခမဲ့ဖြင့် ဖွင့်လှစ် ပို့ချပေးသွားမည်ဖြစ်ပြီး နိုင်ငံတဝန်းရှိ ကျောင်းသားလူငယ်များအားလက်ခံသင်ကြားပေးမည်ဖြစ်သည်။
သင်တန်း အမှတ်စဉ် (၁)အား ၂၀၂၃ခုနှစ် မတ်လ (၁) ရက်မှ ဧပြီလ (၁၀)ရက် အထိ၊ အမှတ်စဉ် (၂)အား ၂၀၂၃ ခုနှစ် ဧပြီလ (၁၉)ရက် မှ မေလ (၂၉) ရက်အထိ ဖွင့်လှစ်သွားမည်ဖြစ်ပြီး ရန်ကုန်နှင့် မန္တလေးတို့တွင် သင်တန်းသား (၂၀၀) ဦးစီကို မြန်မာနိုင်ငံဘောလုံး အဖွဲ့ချုပ်ရှိ အာရှဘောလုံးအဖွဲ့ချုပ် နည်းပြလိုင်စင်ရ သင်တန်းဆရာများက ကြီးကြပ် သင်ကြားပေးသွားမည်ဟုဆိုသည်။
အဆိုပါ အခြေခံ ဘောလုံးသင်တန်းသို့ အသက် ၉ နှစ်မှ ၁၅နှစ် အတွင်း (ကျား/မ) မည်သူမဆို တက်ရောက် သင်ယူနိုင်မည်ဖြစ်ပြီး အပတ်စဉ် တနင်္လာ၊ဗုဒ္ဓဟူးနှင့် သောကြာနေ့များတွင် ဖွင့်လှစ်မည့် သင်တန်းတွင် နံနက် ၇ နာရီ ၃၀ မိနစ်မှ ၉ နာရီ ၃၀ မိနစ်အထိ အခြေခံ ဘောလုံးပညာများ သင်ကြားရမည်ဖြစ်သည်။
ယခင်က သင်တန်းသား တစ်ဦးလျှင် သင်တန်းကြေး ကျပ် (၅၀၀၀၀) သတ်မှတ်ထားသော်လည်း ယခုအခါ စပွန်ဆာများ၏ ပံ့ပိုးကူညီမှုဖြင့် အခမဲ့ ဖွင့်လှစ်သွားမည်ဖြစ်ကာ ဝတ်စုံတစ်စုံစီနှင့် MFF အသိအမှတ်ပြု သင်တန်းဆင်း လက်မှတ်များ ပေးအပ်သွားမည်ဟု သိရသည်။
အမှတ်စဉ် (၁) သင်တန်း တက်ရောက်လိုသူများ အနေဖြင့်
https://www.mediafire.com/file/j2vvo57k0501n71/Summer_Football_classs.docx/file မှ
သင်တန်းတက်ခွင့် လျှောက်လွှာများကို ကူးယူဖြည့်စွက်၍ သင်တန်းဖွင့်လှစ်မည့် အမျိုးသား ဘောလုံးအကယ်ဒမီ (ရန်ကုန်)နှင့် မြန်မာ့ဘောလုံးအကယ်ဒမီ (မန္တလေး)သို့ ဖေဖော်ဝါရီ ၂၈ ရက်နေ့ နောက်ဆုံးထား၍ ရုံးချိန်အတွင်း လူကိုယ်တိုင်လာရောက်ဆက်သွယ် လျှောက်ထားကြရန်အသိပေးထားသည်။
ဖုန်းဖြင့်ဆက်သွယ်စုံစမ်းမေးမြန်းလိုသူများအနေဖြင့်လည်း ( ရန်ကုန် ၀၉ – ၄၀၃၇၂၅၄၂၅ ၊ မန္တလေး ၀၉ – ၄၂၆၅၅၀၀၆၆ ) သို့ ဆက်သွယ်စုံစမ်းနိုင်မည််ဖြစ်သည်။
