ပြည်သူ့ကျန်းမာရေးဦးစီးဌာန အမျိုးသားငှက်ဖျားရောဂါတိုက်ဖျက်ရေးစီမံချက်ဖြင့် ၂၀၂၅ ခုနှစ်တွင် မြန်မာနိုင်ငံအတွင်းကူးစက်ခံရသော ဖယ်စီပါရမ် ငှက်ဖျားပိုးတွေ့သူလုံးဝမရှိစေရန် ဆောင်ရွက်လျက်ရှိသည်။
ထို့ပြင်၂၀၃၀ ပြည့်နှစ်တွင် ခြင်ကိုက်ခံရခြင်းမှတဆင့် လူအချင်းချင်းကူးစက်သော ငှက်ဖျားပိုးတွေ့လူနာလုံးဝမရှိစေရန် ကမ္ဘာ့ကျန်းမာရေးအဖွဲ့၏ ငှက်ဖျားရောဂါကာကွယ်ထိန်းချုပ်ရေးမဟာဗျူဟာ(၂၀၁၆-၂၀၃၀)(Global Technical Strategy for Malaria 2016-2030)ပါ လုပ်ငန်းစဉ်များအတိုင်းလုပ်လျက်ရှိနေသည်။
“ငှက်ဖျားရောဂါကိုရှာဖွေကုသရာမှာ ငှက်ဖျားပိုးတွေ့ရှိရင် ငှက်ဖျားရောဂါကူးစက်မှုကို ဖြတ်တောက်ဖို့အတွက် ပိုးတွေ့ရှိပြီးချိန်ကနေ ၂၄ နာရီအတွင်း သက်ဆိုင်ရာဒေသမှာရှိတဲ့ ကျန်းမာရေးဌာနကို မဖြစ်မနေသတင်းပေးဖို့လိုအပ်ပါတယ်” ဟု ပြည်ထောင်စုဝန်ကြီးဒေါက်တာသက်ခိုင်ဝင်းကပြောသည်။
မြန်မာနိုင်ငံ၌ ငှက်ဖျားရောဂါပိုးလုံးဝကင်းရှင်းစေရန်ဆောင်ရွက်လျက်ရှိနေခြင်းနှင့်ပတ်သက်၍ ကျန်းမာရေးဝန်ကြီးဌာန ပြည်ထောင်စုဝန်ကြီးဒေါက်တာသက်ခိုင်ဝင်းမှ ဖေဖော်ဝါရီ ၂၂ ရက်နံနက်ပိုင်းကပြုလုပ်ခဲ့သည့် ငှက်ဖျားရောဂါရှာဖွေခြင်း၊ကုသခြင်းတို့အတွက် မဖြစ်မနေသတင်းပေးပို့ရေးထုတ်ပြန်ကြေညာခြင်း အခမ်းအနားတွင် ပြောကြားခဲ့ခြင်းဖြစ်သည်။
ပြည်သူ့ကျန်းမာရေးဦးစီးဌာနမှဝန်ထမ်းများအနေဖြင့် ငှက်ဖျားပိုးတွေ့လူနာတွေ့ရှိပါက လူနာနှင့်ပတ်သက်သည့် သတင်းအချက်အလက်များကို တယ်လီဖုန်း၊စာတိုသတင်းပို့ခြင်း(SMS)တို့ဖြင့် ၂၄ နာရီအတွင်း မဖြစ်မနေသတင်းပေးပို့ရမည်ကို ပြည်သူများကျယ်ပြန့်စွာသိရှိရန် အသိပေးရမည်ဟုလည်း မှာကြားခဲ့သည်။
ငှက်ဖျားကူးစက်မှုပပျောက်ရေး နည်းဗျူဟာများအား အောင်မြင်စွာအကောင်အထည်ဖော်နိုင်ရန် အသိပေးဆွေးနွေးခြင်းနှင့်သင်တန်းများပို့ချခြင်း၊လုပ်ငန်းအထောက်အကူပြုအဖွဲ့များဖွဲ့စည်းခြင်း၊စီမံချက်နည်းဗျူဟာချမှတ်ခြင်း၊သတင်းအချက်အလက်စီမံခန့်ခွဲခြင်းတို့ကိုလည်း အရှိန်အဟုန်မြှင့်ဆောင်ရွက်ရမည်ဟုလည်း မှာကြားခဲ့သည်။
