ရန်ကုန်တိုင်း၊ ကျောက်တံတားမြို့နယ်တွင် CB ဘဏ်မှ ငွေထုတ်ကာပြန်လာသည့်ကားကို ဓားကိုင်ထားသူများကတားပြီး ဓားထောက်ကာ ငွေများ လုယက်သွားသည့် ဖြစ်စဉ်တစ်ခု ယနေ့ နံနက်ပိုင်းက ဖြစ်ပွားခဲ့ကြောင်း သိရသည်။
ဖေဖေါ်ဝါရီ (၂၄) ရက် နံနက် (၁၀) နာရီဝန်းကျင်က ရန်ကုန်မြို့လယ် ဆိပ်ကမ်းသာလမ်းနှင့် မဟာဗန္ဓုလလမ်းထောင့်တွင် ဖြစ်ပွားခဲ့ခြင်းဖြစ်ပြီး လုယက်ခံရသူများမှာ ယုံရှင်း ငွေလွှဲလုပ်ငန်းမှ ဖြစ်ကြောင်း ရန်ကုန်တိုင်းဒေသကြီး ရဲတပ်ဖွဲ့နှင့် နီးစပ်သူတစ်ဦးက ပေါ်ပြူလာနယူး(စ်)သို့ အတည်ပြုပြောကြားသည်။
” ဖြစ်တာတော့ ဟုတ်တယ်။ မနက်ကပေါ့နော်။ ဆာကူရာတာဝါက ငွေထုတ်လာတယ်လို့ ကြားတယ်။ ဆိပ်ကမ်းသာနဲ့ ဗန္ဓုလလမ်းထောင့် ရောက်တော့ လုသွားတဲ့သူတွေက ကားကိုတားပြီး ဓားထောက် လုသွားတယ်လို့ ပြောတယ်။ သိန်း ၃၀၀၀ လောက်ပါသွားတယ်လို့တော့ပြောတာပဲ။ အသေးစိတ်ကတော့ သူတို့ဆီ ဆက်မေးကြည့်မှရမယ်” ဟု ၎င်းကပြောသည်။
အမည်မသိအမျိုးသား ၅ ဦးမှ ကားပေါ်သို့တက်လာကာ ဓားဖြင့်ထောက်၍ အသင့်စောင့်နေသည့်ကားပေါ်သို့ ငွေများထည့်ထားသော ဆာလာအိတ် ၂ အိတ်အားတင်ဆောင်ကာ မောင်းနှင်ထွက်ပြေးသွားခဲ့ကြကြောင်း သိရသည်။ လုယက်သူများသည် (၅) ဦးလောက်ပါသည့် လူအုပ်စုလိုက်ဖြင့် အနုကြမ်းစီး ၊ ဓားပြတိုက်သည့်ပုံစံဖြင့် လုပ်ဆောင်သွားခြင်းဖြစ်ပြီး လက်ရှိတွင် ဖမ်းဆီးရမိရေး စုံစမ်းစစ်ဆေးမှုများ လုပ်ဆောင်လျက်ရှိကြောင်းလည်း သိရသည်။
ငွေလုယက်ခံရသူများမှာ ယုံရှင်းငွေလွှဲလုပ်ငန်းမှ စာရေးမတစ်ဦးနှင့် ယာဉ်မောင်းတို့ဖြစ်ပြီး ငွေကျပ် သိန်း (၃၀၀၀) ဝန်းကျင်ပါသွားကြောင်း လူမှုကွန်ရက်စာမျက်နှာပေါ်တွင်လည်း သတင်းပျံ့နှံ့လျက်ရှိသည်။
သတင်းအတိအကျရထားပြီးမှလုပ်သည့်ပုံစံထွက်နေကြောင်း သုံးသပ်ပြောဆိုမှုများလည်းရှိသလို အချင်းချင်းလက်ထောက်ချခြင်းမျိုးလည်းသံသယထားစုံစမ်းသင့်ကြောင်း ဝေဖန်ပြောဆိုနေကြသည်။
ပေါ်ပြူလာနယူး(စ်) အနေဖြင့် အဆိုပါ ဖြစ်စဉ်အသေးစိတ်အား သိရှိနိုင်ရန် ယုံရှင်းငွေလွှဲလုပ်ငန်းသို့ ဆက်သွယ်မေးမြန်းရန် ကြိုးစားခဲ့သော်လည်း ဆက်သွယ်၍ မရရှိသေးပေ။
