လွန်ခဲ့သည့်ရက်အနည်းငယ်အတွင်းက ဖလော်ရီဒါပြည်နယ်၌ အသက်လေးနှစ်အရွယ်ကလေးငယ်တစ်ဦးသည် ၎င်း၏နားအတွင်းမှ မခံမရပ်နိုင်အောင်ထိုးကိုက်ခြင်းအားခံစားခဲ့ရပြီး မည်သည့်အတွက်ယင်းသို့ဖြစ်သည်ကိုမည်သူမျှသတိမထားမိခဲ့ပေ။
အသားကင်ဆိုင်အတွင်း ဟမ်ဘာဂါစားနေစဉ် ၎င်း၏နားကိုကိုင်ကာ ကလေးငယ်ကစူးစူးဝါးဝါးငိုသဖြင့် မိဘများကစိတ်ပူကာဆေးရုံသို့ပိုဆောင်ပေးခဲ့သည်။သို့သော်နားအတွင်း၌ မည်သည့်ပြသနာမှမရှိကြောင်း ဆရာဝန်ကပြောကြားလျက် ပိုးသတ်ဆေးနှင့်နားသန့်ဆေးပေးလိုက်ကြောင်းသိရသည်။
သို့သော်ကလေးငယ်သည်ရက်အနည်းငယ်ကြာသည်အထိမသက်သာဘဲ ကိုယ်ပါပူလာပြီးအစားအသောက်လည်းမစားတော့ကြောင်းသိရသည်။မိဘများက ကလေးငယ်အားဆေးခန်းသို့ အရေးပေါ်ပို့ပေးရပြန်သည်။
ဆရာဝန်၏စစ်ဆေးချက်၌ ကလေးငယ်၏ညာဘက်လည်ချောင်း၌ ယောင်နေသည်ကိုသတိထားမိသဖြင့် စီအေတီစကင်မ်ရိုက်ကြည့်ခဲ့ရာ ၂ စင်တီမီတာအရွယ်အစားရှိ နန်းကြိုးမျှင်တစ်ခုအား ကလေးငယ်၏နားနှင့်လည်ချောင်း၌တွေ့ခဲ့ရသည်။
အဆိုပါအမျှင်လေးသည် အသားကင်သန့်ရှင်းရာ၌သုံးသည့် ဘရက်ရှ်မှနန်းကြိုးမျှင်လေးဖြေစ်ကြောင်းသိရသည်။အဆိုပါအရေးကြောင့်ကလေးငယ်အနေဖြင့် ချက်ချင်းခွဲစိတ်မှုပြုလုပ်ခဲ့ရပြီး ယခုအခါသက်သာသွားပြီဖြစ်ကြောင်းသိရသည်။
ဆရာဝန်ကအကင်စားသုံးသူများအနေဖြင့်ရော ရောင်းချသူများပါ စတီးဘရက်ရှ်ကိုမသုံးသင့်ကြောင်းအကြုံပြုပြောကြားခဲ့ပြီး ယခုကဲ့သို့အဖြစ်မျိုးက ဗိုက်နှင့်အစာအိမ်ကိုပါဒုက္ခပေးနိုင်ကြောင်းပြောကြားခဲ့သည်။လေ့လာမှုတစ်ခုအရ ၂၀၀၄ ခုနှစ်မှ ၂၀၁၂ ခုနှစ်အတွင်း အလားတူဖြစ်ရပ်များကြောင့် လူပေါင်း ၁,၇၀၀ နီးပါး အရေးပေါ်ခွဲစိတ်မှုပြုလုပ်ခဲ့ရကြောင်းသိရသည်။
Source : The Straitstimes
