၂၀၂၁ ခုနှစ် နိုင်ငံရေးအပြောင်းအလဲဖြစ်စဉ်ကြောင့် ပြည်ပသို့ ထွက်ပြေးတိမ်းရှောင်နေသည့် နိုင်ငံဝန်ထမ်းများနှင့် နိုင်ငံသားများအနေဖြင့် ပြည်တွင်းသို့ ပြန်လည်ဝင်ရောက်လိုပါက အထူးသက်ညှာစွာ ဖြေလျှော့ဆောင်ရွက်ပေးမည်ဖြစ်ကြောင်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။
၂၀၂၁ ခုနှစ် ဖေဖေါ်ဝါရီ (၁) ရက်နောက်ပိုင်းတွင် နစက၏တရားစွဲဆိုမှုများ၊ ဝရမ်းထုတ်ဖမ်းဆီးမှုများကြောင့် နိုင်ငံရေးသမားများ၊ ကျောင်းသား/ကျောင်းသူများ၊ လူငယ်လူရွယ်များ၊ နိုင်ငံဝန်ထမ်းများနှင့် ပြည်သူအချို့မှာ EAO နယ်မြေများနှင့် ပြည်ပနိုင်ငံများသို့ တိမ်းရှောင်ရောက်ရှိနေကြခြင်း ဖြစ်သည်။
အဆိုပါ EAO နယ်မြေများသို့ ရောက်ရှိနေသူများနှင့် ပြည်ပနိုင်ငံများသို့ တိမ်းရှောင်ရောက်ရှိနေသူများ အနေဖြင့် နိုင်ငံအတွင်း ပြန်လည်ဝင်ရောက်ကာ မိမိတို့၏နေရပ်သို့ ပြန်လာလိုပါက သက်ညှာစွာ ဖြေလျှော့ပေးမည်ဖြစ်ကြောင်း ထိုင်းနိုင်ငံဆိုင်ရာ မြန်မာသံရုံးက ယမန်နေ့ ဖေဖေါ်ဝါရီ (၂၈) ရက် ရက်စွဲဖြင့် ထုတ်ပြန်လာခြင်း ဖြစ်သည်။
ယင်းကဲ့သို့ ပြန်လည်ဝင်ရောက်လိုသူများအနေဖြင့် လူသတ်မှု၊ မီးရှို့မှု၊ မိုင်းထောင်ဖောက်ခွဲမှု၊ လုံခြုံရေးတပ်ဖွဲ့ဝင်များနှင့် ပြည်သူ့ဝန်ထမ်းများကို ရည်ရွယ်ချက်ရှိရှိဖြင့် တိုက်ခိုက်မှု၊ အစိုးရပိုင် အဆောက်အဦနှင့် ပုဂ္ဂလိကပိုင်အဆောက်အဦးများကို ဖျက်ဆီးမှု၊ CDM လှုပ်ရှားမှုတွင် ပါဝင်ပတ်သက်ထားသူများမှအပ စိုးရိမ်စိတ်ဖြင့် တိမ်းရှောင်နေသူများအား သက်ညှာစွာဆောင်ရွက်ပေးသွားမည်ဖြစ်ကြောင်း ထိုင်းနိုင်ငံဆိုင်ရာ မြန်မာသံရုံးက ရည်ညွှန်းထုတ်ပြန်ခဲ့သည့် နစက သတင်းထုတ်ပြန်ရေးအဖွဲ့၏ ကြေညာချက်တွင် ဖော်ပြထားသည်။
ထို့အပြင် ပြည်တွင်းရှိ နေရာဒေသအသီးသီးသို့ ထွက်ပြေးတိမ်းရှောင်နေသူများအနေဖြင့် မိမိနေရပ်သို့ ပြန်လည် ဝင်ရောက်လိုပါက နီးစပ်ရာ ရပ်ကျေးအုပ်ချုပ်ရေးမှူးရုံးများ ဆက်သွယ်နိုင်ပြီး ပြည်ပသို့ ရောက်ရှိနေသူများအနေဖြင့် သက်ဆိုင်ရာသံရုံးနှင့် ကောင်စစ်ဝန်ရုံးများသို့ ဆက်သွယ်နိုင်ကြောင်းလည်း ဖော်ပြထားသည်။
ယမန်နေ့က ထုန်ပြန်ခဲ့သည့် ထိုင်းနိုင်ငံဆိုင်ရာ မြန်မာသံရုံး၏ အသိပေးထုတ်ပြန်ချက်တွင်လည်း မြန်မာနိုင်ငံမှ စိုးရိမ်စိတ်ကြောင့် ထိုင်းနိုင်ငံအတွင်း ထွက်ပြေးတိမ်းရှောင်နေကြသည့် ဝန်ထမ်းများ၊ အသိပညာရှင်၊ အတတ်ပညာရှင်များ၊ အခြားနယ်ပယ်အသီးသီးမှ ပုဂ္ဂိုလ်များ၊ နိုင်ငံသားများအနေဖြင့် မိမိတို့၏ ကိုယ်ပိုင်စိတ်ဆန္ဒအရ မြန်မာနိုင်ငံရှိ မိမိတို့၏ နေရပ်များသို့ ပြန်လည်ဝင်ရောက်လိုပါက မြန်မာသံရုံး၏ တယ်လီဖုန်းနံပါတ် ၀၆၂၉၂၁၇ ၇၁၀ နှင့် မြန်မာစစ်သံရုံး တယ်လီဖုန်းနံပါတ် ၀၆၂၉၂၃ ၀၁၆၅ တို့တွင် အသုံးပြုနေသော Viber ၊ Line Apps များသို့ စာရေးသားဆက်သွယ်ပေးပို့နိုင်ကြောင်း ဖော်ပြထားသည်။
