ရန်ကုန်တိုင်းဝန်ကြီးချုပ်ဟောင်း ဦးဖြိုးမင်းသိန်းနှင့် ဒေါ်စန္ဒာမင်း အပါအဝင် (၄) ဦးကို ပါတီတာဝန်များမှ ရပ်ဆိုင်းကာ ပါတီဝင်အဖြစ်မှလည်း အပြီးတိုင်ထုတ်ပယ်လိုက်ကြောင်း NLD ပါတီ ဗဟိုအလုပ်ကော်မတီက ထုတ်ပြန်ကြေညာလိုက်သည်။
NLD ပါတီ ဗဟိုအလုပ်ကော်မတီက မတ်လ (၂) ရက်တွင်ပြုလုပ်သည့်အစည်းအဝေး ဆုံးဖြတ်ချက်အရ ယခုလို ဆုံးဖြတ်ခြင်းဖြစ်ကြောင်း ၎င်းတို့၏ ထုတ်ပြန်ချက်တွင် ရေးသားဖော်ပြထားသည်။
ထို့အပြင် အဆိုပါ လူပုဂ္ဂိုလ် (၄)ဦး၏ ပြောဆိုချက်၊ဆောင်ရွက်ချက်များသည် NLD ပါတီနှင့် မသက်ဆိုင်ကြောင်းလည်း အသိပေးပြောကြားထားသည်။
ယနေ့ မတ်လ (၃) ရက် ရက်စွဲဖြင့် ထုတ်ပြန်လာသည့် NLD ပါတီ၏ ထုတ်ပြန်ချက်တွင် ဖော်ပြထားချက်အရ ဥက္ကဋ္ဌ ဒေါ်အောင်ဆန်းစုကြည်အပေါ် မဟုတ်မမှန် သက်သေထွက်ဆိုသူနှင့် ပြည်သူလူထု၏ ဆန္ဒကို ကျောခိုင်းပြီး ပါတီမူဝါဒများကို ဆန့်ကျင်လုပ်ဆောင်နေသူများကို အရေးယူပေးရန် တောင်းဆိုမှုများရှိသည့်အတွက် ယခုကဲ့သို့ ဆုံးဖြတ်ခဲ့ခြင်းဖြစ်ကြောင်း ဖော်ပြထားသည်။
ယခုကဲ့သို့ ပါတီတာဝန်များ ရပ်ဆိုင်းကာ ပါတီဝင်အဖြစ်မှ ထုတ်ပယ်ခံရသူများမှာ NLD ပါတီ ဗဟိုအလုပ်အမှုဆောင် ကော်မတီဝင် ဦးဖြိုးမင်းသိန်း၊ ဗဟိုကော်မတီဝင် ဒေါ်စန္ဒာမင်း၊ ဗဟိုကော်မတီဝင် ဦးတိုးလွင်၊ ဗဟိုကော်မတီဝင် ဦးဝင်းမြင့်အောင်တို့ (၄) ဦး ဖြစ်ကြောင်း သိရသည်။
ယခုပါတီမှ ထုတ်ပယ်ခံရသူများထဲတွင် ရန်ကုန်တိုင်း ဝန်ကြီးချုပ်ဟောင်း ဦးဖြိုးမင်းသိန်းသည် ၂၀၂၁ ခုနှစ် ဖေဖေါ်ဝါရီ (၁) ရက်နေ့တွင် ဖမ်းဆီးခြင်းခံရပြီး အဂတိလိုက်စားမှု ပုဒ်မများဖြင့် အမှုဖွင့်ခံခဲ့ရသော်လည်း ငွေဒဏ် (၁) သိန်းကျပ်ဖြင့် အမှုပြီးပြတ်ခဲ့သည့်အပြင် ဒေါ်အောင်ဆန်းစုကြည်အား ဒေါ်ခင်ကြည်ဖောင်ဒေးရှင်း မြေနေရာနှင့်ပတ်သက်၍ အမေရိကန် ဒေါ်လာ ၆သိန်းနှင့် ရွှေပိဿချိန် ၇ ပိဿလာဘ်ထိုးခဲ့ရသည်ဟု ထွက်ဆိုခဲ့သည့်အပေါ်ဝေဖန်ခြင်းခံခဲ့ရခြင်းဖြစ်သည်။
ထို့အပြင် ဆိပ်ကြီးခနောင်တို အမတ်ဟောင်း ဒေါ်စန္ဒာမင်းသည်လည်း ဖမ်းဆီးအထိန်းသိမ်းခံထားရကာ နှစ်ရှည်ထောင်ဒဏ်များ ချမှတ်ခံထားရသည့် ဒေါ်အောင်ဆန်းစုကြည်နှင့် တွေ့ဆုံကာ ရွေးကောက်ပွဲဝင်ရောက်ရေးကိစ္စများ နားချပြောဆိုခဲ့ရန် ကြိုးပမ်းခဲ့သည်ဆိုသည့် သတင်းများထွက်ပေါ်ခဲ့သူဖြစ်သည်။
