တရုတ်နိုင်ငံ ရှန်ဟိုင်းအခြေစိုက် လေကြောင်းပျံသန်းရေးစက်ရုံတစ်ရုံမှ ထုတ်လုပ်လိုက်သော လျှပ်စစ်အင်အားသုံး မောင်းသူမဲ့ ဒေါင်လိုက်တက်ဆင်း(eVTOL) လေယာဉ်တစ်စင်းသည် ဘက်ထရီအားတစ်ကြိမ်သွင်းထားလျှင် ၂၅၀ ဒသမ ၃ ကီလိုမီတာအကွာအဝေးအထိ ပျံသန်းနိုင်သဖြင့် ကမ္ဘာ့စံချိန်တင်သွားသည်။
ယင်းလေယာဉ်သည် ခရီးသည် ၄ ဦးကိုတင်ဆောင်နိုင်သော မောင်းနှင်သူမလိုသည့် သူ့အလိုအလျောက် ထိန်းကျောင်းပျံသန်းသော လေယာဉ်ဖြစ်ပြီး၊ လေယာဉ်တက္ကစီအဖြစ် အသုံးပြုရန်ရည်ရွယ်ထုတ်လုပ်ထားခြင်းဖြစ်သည်။
ခရီးသည်များအပါအဝင် စုစုပေါင်း အလေးချိန် ၂ တန်ဖြင့်၊ တစ်နာရီလျှင် ကီလိုမီတာ ၂၀၀ အမြန်နှုန်းအထိပျံသန်းနိုင်သည်။
ယင်းလေယာဉ်အမျိုးအစားတွင် ယခင်က ကမ္ဘာ့စံချိန်မှာ ဘက်ထရီတစ်ကြိမ်အားသွင်းထားလျှင်၂၄၈ ဒသမ ၈ ကီလိုမီတာအကွာအဝေးအထိ ဆက်တိုက်ပျံသန်းနိုင်ခြင်းဖြစ်ပြီး၊ ကယ်လီဖိုးနီးယားအခြေစိုက် Joby Aviation ကုမ္ပဏီထုတ်လုပ်ကာ၊ ၂၀၂၁ ခုနှစ်က စံချိန်တင်ထားခြင်းဖြစ်သည်။
