လုံခြုံရေးအဖွဲ့ဝင်များက သတင်းအရကွတ်ကီး မုန့်များအတွင်း ဆေးခြောက်များထည့်၍ အွန်လိုင်း မှတဆင့်ရောင်းချသူ ၂ ဦးကို မတ် ၈ ရက်ညနေပိုင်းက ဖမ်းဆီးရမိခဲ့သည်ဟု နစက သတင်းထုတ်ပြန်ရေးအဖွဲ့မှ သိရသည်။
ယင်းနေ့ညနေပိုင်းက လုံခြုံရေးအဖွဲ့ဝင်များသည် ရန်ကုန်တိုင်း၊လမ်းမတော်မြို့နယ်၊အမှတ်(၇) ရပ်ကွက်၊(၁၆)လမ်း၊တိုက်အမှတ်(၁၂၆)၊ ၈ လွှာရှိ တိုက်ခန်းအားဝင်ရောက်ရှာဖွေစစ်ဆေးခဲ့ကြသည်။
နေအိမ်တိုက်ခန်း၌ ထက်ရတနာစိုး(၂၄)နှစ်အား ဖမ်းဆီးရမိခဲ့ပြီး စစ်ဆေးချက်အရ ဇော်လင်းနောင် (၂၁)နှစ်အား လမ်းမတော်မြို့နယ်၊အမှတ် (၁၀)ရပ်ကွက်၊ဗဟိုရ်စည်အိမ်ရာဝင်း၊တိုက်အမှတ် (၄၀)၊ ၃ လွှာရှိ အခန်း(၁၄)တွင် ဆေးခြောက်အမှုန့် ၁၀၉ ဂရမ်၊ ဆေးခြောက်ထည့်သွင်းထားသည့် ကွတ်ကီး မုန့်အခု ၅၀၊ ဆေးခြောက်ရှူရာတွင် အသုံးပြုသည့် ဆေးဂေါက်တံ ၁ ခုတို့နှင့်အတူ ထပ်မံဖမ်းဆီးရမိခဲ့သည်။
စစ်ဆေးချက်အရ Cookie မုန့်များအတွင်း ဆေးခြောက်များထည့်၍ ဆေးခြောက်ထည့်သွင်းမှု အနည်း/အများပေါ်မူတည်ကာ Cookie မုန့်တစ်ခုလျှင် ငွေကျပ် ၆၀၀၀ မှ ၁၀၀၀၀ အထိ Online မှတဆင့်ရောင်းချခြင်းဖြစ်ပြီး ဆေးခြောက်များအား မြဝတီဘက်မှ ခရီးသည်တင်ကားများဖြင့် သယ်ဆောင်ခြင်းဖြစ်ကြောင်း ဖော်ထုတ်သိရှိခဲ့ရသည်။
ဆေးခြောက်ထည့်သွင်းထားသည့် Cookie မုန့်များအား ဝယ်ယူစားသုံးသူများသည် ရုပ်ပိုင်းဆိုင် ရာနှင့်စိတ်ပိုင်းဆိုင်ရာများ များစွာပျက်စီးစေနိုင်ကာ စတင်စားသုံးစဉ် ခွန်အားများတိုးပွားလာပြီး အိပ်ချင်စိတ်ပြေပျောက်သည်ဟု မှားယွင်းစွာထင် မြင်နေကာ နောက်ပိုင်းတွင်အစား စားချင်စိတ်နည်းပါးလာပြီး ကိုယ်အလေးချိန်ကျဆင်းလာခြင်း၊ကြွက်သားတောင့်တင်းလာခြင်း၊အသက်ရှူမြန်လာခြင်း၊အာရုံစူးစိုက်မှုနည်းလာခြင်း၊မှတ်ဉာဏ်ယိုယွင်းလာခြင်း၊စိတ်တိုဒေါသထွက်ခြင်းများဖြစ်ပေါ်လာမည်ဖြစ်သည်။
ထို့ပြင် စားသုံးသည့်ကာလကြာလာသည်နှင့်အမျှ နောက်ထပ်မစားရလျှင်မနေနိုင်အောင် စိတ်ရောကိုယ်ပါစွဲလမ်းမှုဖြစ်ပေါ်လာပြီး စိတ်ချောက်ချားခြင်း၊စိတ်ဂနာမငြိမ်ဖြစ်ခြင်း၊စိတ်ဓာတ်ကျခြင်း၊ဖျားနာလာခြင်း၊ဦးနှောက်တွင်းသွေးယိုခြင်း၊အ သက်ရှူကျပ်ခြင်း၊နှလုံးခုန်ရပ်ခြင်းများဖြစ်၍ ရုတ်တရက်သေဆုံးသည်အထိ ဆိုးကျိုးများခံစားရမည်ဖြစ်သည်။
