မြန်မာ့ကော်ဖီကို အမေရိကန်၊ နယ်သာလန်၊ပြင်သစ်နှင့် ဂျပန် အပါအဝင် ပြည်ပနိုင်ငံများသို့ တင်ပို့သွားမည်ဖြစ်ကြောင်း မြန်မာနိုင်ငံကော်ဖီအသင်းက သိရသည်။
ယခုနှစ် ကော်ဖီရာသီတွင် ဈေးနှုန်း ကောင်းမွန်နေပြီး ပြည်ပနိုင်ငံသို့တင်ပို့ရာတွင် အထူးတန်းဝင် ကော်ဖီများကို လာမည့် ဧပြီလနှင့် မေလမှစတင်ပြီး တင်ပို့သွားမည်ဖြစ်သည်။
ပြင်ဦးလွင်နှင့် နောင်ချိုဘက်မှ တန် ၁၀၀ တင်ပို့နိုင်မည်ဟု မျှော်မှန်းထားကြောင်း၊ ယခု ၂၀၂၃ ခုနှစ်ရာသီတွင် ကော်ဖီသီးအမှည့်တစ်ပိဿာလျှင် မြန်မာကျပ်ငွေ ၃၅၀၀ မှအမြင့်ဆုံး ၃၈၀၀ ကျပ်အထိရရှိပြီး Export Specialty Quality ကော်ဖီစေ့ (Green Bean) ကုန်ချော တင်ပို့ပါကတစ်တန်လျှင် ဒေါ်လာ ၈၈၀၀ အမြင့်ဆုံးစျေးရရှိကြောင်း ကော်ဖီအသင်းမှတာဝန်ရှိသူတစ်ဦးကပြောသည်။
“ကုန်ကြမ်းနဲ့ကုန်ချောစျေးကွာတာကစရိတ်တွေကွာတယ်၊ ကြားထဲက လုပ်ငန်းစဥ်တွေမှာ အဆုံးရှုံး၊အလေအလွင့်တွေရှိတယ်။အဲ့ဒါကြောင့်စျေးကွာသလိုဖြစ်နေတာ”ဟု ကော်ဖီ တင်ပို့သူတစ်ဦးကဆိုသည်။
ပြီးခဲ့သည့် နှစ်တွင် ပြည်ပသို့ ကော်ဖီတန်ချိန် ၁၅၀၀ ကျော်လောက် တင်ပို့ ရောင်းချနိုင်ခဲ့ကြောင်း မြန်မာနိုင်ငံတွင် ကော်ဖီစိုက်ဧက ၃ သောင်းကျော်ရှိပြီး ရှမ်းပြည်နယ်တွင် အများဆုံး စိုက်ပျိုးကာ မန္တလေးတိုင်း၊ မကွေးတိုင်း၊ တနင်္သာရီတိုင်း၊ဧရာဝတီတိုင်းဒေသကြီး၊ ကရင်ပြည်နယ်နှင့် ချင်းပြည်နယ်တို့တွင်လည်း စိုက်ပျိုးကြကြောင်း သိရသည်။
