ရှမ်းအမျိုးသား ဒီမိုကရေစီအဖွဲ့ချုပ်ပါတီအနေဖြင့် နိုင်ငံရေးပါတီအဖြစ် မှတ်ပုံပြန်မတင်ရန် ဆုံးဖြတ်လိုက်ကြောင်း ပါတီပြောရေးဆိုခွင့်ရှိသူဖြစ်သည့် ယင်းပါတီ၏ အထွေထွေ အတွင်းရေးမှူး ဦးစိုင်းလိတ်က ပေါ်ပြူလာနယူး(စ်)သို့ ပြောသည်။
SNLD ပါတီ အနေဖြင့် ဗဟိုအလုပ်အမှုဆောင်အဖွဲ့အစည်းအဝေးကို ယခုရက်ပိုင်းအတွင်း ပြုလုပ်ခဲ့ပြီး ယင်းအစည်းအဝေး၏ ဆုံးဖြတ်ချက်အရမှတ်ပုံပြန်မတင်ရန် ဆုံးဖြတ်ခဲ့ခြင်း ဖြစ်ကြောင်း သိရသည်။
SNLD ပါတီအနေဖြင့် မှတ်ပုံတင် ဥပဒေသစ်၏ ပေးထားချက်ဖြစ်သည့် (၂) လတာအတွင်း ၎င်းတို့၏ ပါတီဝင်များနှင့် တွေ့ဆုံဆွေးနွေးခွင့်ရဖို့ အချိန်ကာလအားဖြင့်၄င်း လမ်းပန်းဆက်သွယ်ရေးနှင့် လုံခြုံရေးအခြေအနေများအရ၄င်း တွေ့ဆုံနိုင်ခြင်း မရှိခဲ့သည့်အတွက် အခက်အခဲတစ်ရပ်အနေဖြင့်ရှိခဲ့ကြောင်း ပါတီပြောရေးဆိုခွင့်ရှိသူက ဆိုသည်။
ထို့အပြင် UEC ကိုယ်၌ကပင် ရွေးကောက်ပွဲကျင်းပမည့် အချိန်အတိအကျ ထုတ်ဖော်ပြောဆိုထားခြင်း မရှိသည့်အတွက် မတ်လ (၁၆) ရက်နှင့် (၁၇) ရက်တွင် ပြုလုပ်သည့် ဗဟိုအလုပ်အမှုဆောင် ကော်မတီအစည်းအဝေးက ပါတီအား မှတ်ပုံပြန်မတင်ရန် ဆုံးဖြတ်ခဲ့ခြင်း ဖြစ်ကြောင်းသိရသည်။
” မရေမရာ ဖြစ်နေတဲ့ အခြေအနေမှာ၊သာမန်အခြေအနေမဟုတ်တဲ့ ကာလမှာ ရွေးကောက်ပွဲဆိုတာထက် တိုင်းပြည်ပြန်လည်တည်ငြိမ်အေးချမ်းရေးအတွက်ကို ဝိုင်းဝန်းကြိုးပမ်းကြဖို့လိုအပ်ပါတယ်။ တိုင်းပြည် ပြန်လည်တည်ငြိမ်အေးချမ်းပြီးကာမှ ဒီမိုကရေစီအပြောင်းအလဲကို အာမခံနိုင်တဲ့ ရွေးကောက်ပွဲတစ်ခု၊ အားလုံးပါဝင်ဆောင်ရွက်နိုင်တဲ့ အခင်းအကျင်းကို ဖန်တီးနိုင်တဲ့ ရွေးကောက်ပွဲတစ်ခု ၊ ဖက်ဒရယ်ဒီမိုကရေစီခရီးလမ်းဆီကို ဦးတည်တဲ့ အခြေအနေတစ်ခုပေါ်ပေါက်ဖို့ ဝိုင်းဝန်းကြိုးပမ်းကြဖို့ လိုအပ်တယ်။ SNLD အနေနဲ့ကတော့ အဲဒီအခြေအနေပေါ်ဖို့အတွက်ဆိုရင် တတ်နိုင်တဲ့ဘက်က အမြဲတမ်းကြိုးပမ်းသွားမယ်ဆိုတာ အသိပေးတင်ပြလိုပါတယ်” ဟု ဦးစိုင်းလိတ်က ပြောသည်။
ပြီးခဲ့သည့် ၂၀၂၃ ခုနှစ် ဇန်နဝါရီ (၂၆) ရက်တွင် အသစ်ပြဌာန်းခဲ့သည့် ပါတီမှတ်ပုံတင်ခြင်း ဥပဒေအရ ယခင်ရှိရင်းစွဲ ပါတီများအနေဖြင့် နိုင်ငံရေးပါတီအဖြစ် ဆက်လက်ရပ်တည်လိုပါက (၂) လအတွင်း မှတ်ပုံပြန်တင်ရမည်ဖြစ်ပြီး အကယ်၍ မှတ်ပုံပြန်မတင်ပါက နိုင်ငံရေးပါတီအဖြစ်မှ အလိုအလျှောက် ပျက်ပြယ်မည်ဟု ပြဌာန်းထားခြင်း ဖြစ်သည်။
၎င်းတို့အနေဖြင့် ပါတီမှတ်ပုံပြန်မတင်သည့်အတွက် ပါတီမှတ်ပုံတင် အလိုအလျှောက် ပျက်ပြယ်သွားမည် ဖြစ်သော်လည်း ပါတီမှတ်ပုံမတင်ခြင်းသည် ပြစ်မှုတစုံတရာကျူးလွန်ခြင်း မဟုတ်သည့်အတွက် ထူးထူးခြားခြား ထိခိုက်နစ်နာစရာမရှိကြောင်း SNLD ဘက်ကဆိုသည်။
” နိုင်ငံရေးပါတီတစ်ရပ်က သူ့အနေနဲ့ မှတ်ပုံပြန်မတင်ဘူးဆိုရင်တော့ မှတ်ပုံတင် အလိုအလျှောက် ပျက်ပြယ်တာပေါ့ဗျာ။ သို့ပေမယ့်လို့ ကျွန်တော်တို့က ရွေးကောက်ပွဲအတွက် အဆင်သင့်မဖြစ်လို့ မှတ်ပုံဆက်မတင်လည်း ဒါဟာ ပြစ်မှုတစုံတရာကျူးလွန်တာ မဟုတ်ဘူး။ ပါတီနဲ့ ပတ်သက်လို့တော့ မှတ်ပုံတင် မရှိတော့ဘူး ။ သို့သော် ကျွန်တော်တို့ ကိုယ်တိုင်က ပြစ်မှုတစုံတရာကျူးလွန်တာ မဟုတ်တဲ့အတွက် ထူးထူးခြားခြားတော့ ထိခိုက်စရာမရှိဘူးလို့ ဒီအတိုင်းပဲ ယူဆပါတယ်” ဟု ဦးစိုင်းလိတ်က ပြောသည်။
လက်ရှိအချိန်ထိ နစက၏ ပါတီမှတ်ပုံတင်ခြင်း ဥပဒေသစ်အရ မှတ်ပုံပြန်တင်လာသည့် နိုင်ငံရေးပါတီ (၃၀) ဝန်းကျင် ရှိနေပြီး ထိုအထဲတွင် ပြည်ထောင်တစ်ဝန်း လှုပ်ရှားမည့် ပါတီမှာ (၁၀) ပါတီအောက်တွင်သာ ရှိနေသေးကြောင်း သိရသည်။
