ရန်ကုန်တိုင်းဒေသကြီးတွင် အမျိုးသား အမျိုးသမီး Road Bike နှင့် Mountain Bike စက်ဘီးစီးပြိုင်ပွဲကျင်းပမည်သည်။
အဆိုပါပြိုင်ပွဲကို မတ်လ ၂၁ ရက်တွင် ကျင်းပမည်ဖြစ်ပြီး အသက် ၁၈ နှစ်အထက် မည်သူမဆို ၀င်ကြေးအခမဲ့ဖြင့် ၀င်ရောက်ယှဉ်ပြိုင်နိုင်ကြောင်း မြန်မာနိုင်ငံ စက်ဘီးအဖွဲ့ချုပ်ထံမှသိရသည်။
“စက်ဘီးစီးသူများလာမယ်ဆိုရင် ပြိုင်ပွဲ၀င်ဦးရေ တိုးလာပါမယ်၊ ပြီးတော့ ကျန်းမာရေးအတွက်ရယ် လောင်စာဆီခြိုးခြံချွေတာဖို့ ရည်ရွယ်ချက်နဲ့ ကျင်းပတာပါ”ဟု မြန်မာနိုင်ငံ စက်ဘီးအဖွဲ့ချုပ်မှ တာ၀န်ရှိသူတစ်ဦးက ပေါ်ပြူလာနယူး(စ်) သို့ပြောသည်။
အမျိုးသား Road Bike နှင့် Mountain Bike ပြိုင်ပွဲအတွက် မင်္ဂလာဒုံမြို့နယ်၊ ဒေဝူးအထည်ချုပ် စက်ရုံရှေ့နှင့် အမျိုးသမီးပြိုင်ပွဲအတွက် ရန်ကုန်လေဆိပ်လမ်းဆုံမှ နံနက် ၆ နာရီအချိန်တွင် တာလွှတ်မည်ဖြစ်ပြီး ပြည်သူ့ရင်ပြင်ရှေ့တွင် ပန်း၀င်မည်ဖြစ်သည်။
အမျိုးသားပြိုင်ပွဲများအတွက် ပထမဆု ၇ သိန်း၊ ဒုတိယဆု ၅ သိန်း၊ တတိယဆု ၃ သိန်း၊ စတုတ္ထဆု ၂ သိန်း၊ ပဉ္စမဆု ၁ သိန်း ကျပ်နှင့် နံပါတ် (၆ မှ ၂၅ အထိ) ၅သောင်းကျပ်စီချီးမြှင့်မည်ဖြစ်ပြီး အမျိုးသမီး Road Bike နှင့် Mountain Bike ပြိုင်ပွဲများအတွက် ပထမဆု ၃ သိန်း၊ ဒုတိယဆု ၂ သိန်း၊ တတိယဆု ၁ သိန်း၊ စတုတ္ထဆု ၇ သောင်း ငါးထောင် ၊ ပဉ္စမဆု ၇ သောင်း ငါးထောင်ကျပ် နှင့် နံပါတ် (၆ မှ ၂၀ အထိ) ၅သောင်းကျပ်စီချီးမြှင့်မည်ဟုဆိုသည်။
အဆိုပါပြိုင်ပွဲသို့ ၀င်ရောက်ယှဉ်ပြိုင်ရန် ပြိုင်ပွဲ၀င် ၃၀၀ ခန့် ရှိမည်ဟု ခန့်မှန်းထားပြီး စိတ်၀င်စားသော်လည်း ၀င်ရောက်ယှဉ်ပြိုင်ရန် စက်ဘီးအခက်အခဲရှိနေပါကလည်း အန္တရယ်ကင်းစေမည့် Helmet ဆောင်းပြီးရိုးရိုးစက်ဘီးဖြင့်၀င်ရောက်ယှဉ်ပြိုင်ခွင့်ပြုမည်ဖြစ်ကြောင်း သိရသည်။
