ပြည်တွင်း၌ ယခုမတ်လအတွင်း ငလျင်ငယ် ၅ကြိမ်လှုပ်ခတ်ထားပြီဖြစ်သည်။မျှော်မှန်းမထားသော သဘာဝဘေးအန္တရာယ်များအတွက်သတိရှိနေဖို့ အချို့နေရာများတွင် အသိပညာဖြန့်ဝေနေကြသည်။
မတ် ၂၅ ရက်နံနက် ၁၀ နာရီက မကွေးတိုင်း၊ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနမှ ဦးဆောင်၍ ငလျင်ဘေးသဏ္ဌန်တူဇာတ်တိုက်လေ့ကျင့်ခြင်းအား မကွေးအခြေခံကျန်းမာရေးတက္ကသိုလ်၌ကျင်းပခဲ့သည်။
အဆိုပါပွဲ၌ မကွေးတိုင်းဝန်ကြီးချုပ် ဦးတင့်လွင်က မြန်မာနိုင်ငံတွင် သဘာဝဘေး အန္တရာယ်များကို ပိုမိုခံစားလာရပြီး သဘာဝဘေးအန္တရာယ်သည် တားဆီး၍မရနိုင်သော်လည်း ကြိုတင်ကာကွယ်ခြင်းနှင့်ကြိုတင်ပြင်ဆင်ခြင်းများ ဆောင်ရွက်ပါက ထိခိုက်ဆုံးရှုံးမှုများလျော့နည်းသက်သာမည်ဟု ပြောသည်။
“တစ်ဦးတစ်ယောက်တစ်ဖွဲ့တည်းနဲ့မဟုတ်ဘဲ အားလုံးဝိုင်းဝန်းပူးပေါင်းဆောင်ရွက်မယ်ဆိုရင် ပြည်သူလူထု၏ အသက်အိုးအိမ်၊စည်းစိမ်ကို ကာကွယ်စောင့်ရှောက်နိုင်မှာဖြစ်ပါတယ်”ဟု ဝန်ကြီးချုပ်ဦးတင့်လွင်ကဆိုသည်။
သဘာဝဘေးအန္တရာယ်များတွင် ငလျင်ဘေးအန္တရာယ်သည် အဖျက်စွမ်းအားကြီးမားပြီး ကြိုတင်ခန့်မှန်းနိုင်ခြင်းမရှိဘဲ အချိန်မရွေးဖြစ်ပွားနိုင်ကာ ပျက်စီးဆုံးရှုံးမှုကြီးမား၍ နောက်ဆက်တွဲဘေးများလည်းရှိသဖြင့် အားလုံးဂရုပြုကာ ကြိုတင်ပြင်ဆင်ရမည်ဟု ပြောသည်။
“သဘာဝဘေးလျော့ပါးရေးအတွက် ကြိုတင်ကာကွယ်ရာမှာ ပြည်သူလူထုကို အသိပညာပေးခြင်းက အလွန်အရေးကြီးပါတယ် ပြည်သူလူထုက ဆောင်ရန်၊ရှောင်ရန်အချက်တွေကိုသိရှိပြီး ကြိုတင်ပြင်ဆင်မှုတွေပြုလုပ်ထားရင် ဆုံးရှုံးမှုတွေ လျော့နည်းမှာဖြစ်ပါတယ်”ဟု ဝန်ကြီးချုပ်ဦးတင့်လွင်ကပြောသည်။
ထို့နောက် ငလျင်ဘေးသဏ္ဌန်တူဇာတ်တိုက်လေ့ကျင့်မှုအဖြစ် ငလျင်လှုပ်ခတ်ကြောင်း အချက်ပေးခြင်းနှင့်အတူ ကျောင်းသား/ကျောင်းသူများမှ ဝပ်၊ကာ၊ကိုင်ပုံစံဖြင့်နေရာယူခြင်း၊ ငလျင်လှုပ်ခတ်မှုငြိမ်သက်ပါက အဆောက်အဦးနှင့်လွတ်ကင်းရာ ကွင်းပြင်များတွင်နေရာယူခြင်း၊ကယ်ဆယ်ရေးအဖွဲ့ဝင်များမှ ရှာဖွေကယ်ဆယ်ရေးလုပ်ငန်း၊ကြက်ခြေနီတပ်ဖွဲ့ဝင်များမှ ရှေးဦးသူနာပြုစုခြင်း၊ကျန်းမာရေးစောင့်ရှောက်မှုအဖွဲ့များက ဆေးဝါးကုသခြင်းနှင့်ပို့ဆောင်ဆက်သွယ်ရေးလုပ်ငန်းအဖွဲ့က ယာဉ်၊ယန္တရားများဖြင့် ဘေးကင်းလုံခြုံသည့်နေရာများသို့ ပို့ဆောင်ပေးခြင်းတို့အား ပူးပေါင်းလေ့ကျင့်ခဲ့ကြသည်။
