မြန်မာနိုင်ငံမှာ ဖရဲသီး စိုက်ပျိုးရေးလုပ်ငန်း လုပ်ကိုင်နေတဲ့ တရုတ်နိုင်ငံသားတစ်ဦးဟာ သူနဲ့ အွန်လိုင်းပေါ်မှာ တစ်နှစ်ကြာတွဲခဲ့တဲ့ ရည်းစားက သူငယ်ချင်းရဲ့မိန်းမ ဖြစ်နေပြီး သူ့ဆီကနေ ငွေလိမ်ဖို့ ကြိုးစားနေမှန်း နောက်ဆုံးမှာ သိသွားခဲ့ပါတယ်။
သူ့နာမည်ကတော့ ကျိုး ဖြစ်ပြီး ဟဲနန်ပြည်နယ်သား ဖြစ်ပါတယ်။ ကျိုးဟာ မြန်မာပြည်မှာ စီးပွားရေး လုပ်ကိုင်နေတဲ့အတွက် တရုတ်ပြည်နဲ့ နှစ်အတော်ကြာ ဝေးကွာနေခဲ့တာပါ။ ဒါပေမဲ့ သူ့ သူငယ်ချင်း ရှောင်းလီ နဲ့တော့ အဆက်အသွယ်မပြတ်ခဲ့ပါဘူး။ တစ်နေ့တော့ လီနဲ့ စကားပြောဖြစ်တုန်း စီးပွားရေးလည်း အဆင်ပြေနေတဲ့ အတွက် မိန်းမကောင်း တစ်ယောက်နဲ့ တွဲကြည့်ချင်တယ်လို့ ပြောလာခဲ့ပါတယ်။
အဲဒီတော့ လီ က သူ့မိန်းမမှာ ရည်းစားမရှိတဲ့ မိန်းကလေး သူငယ်ချင်းတစ်ယောက် ရှိတဲ့အတွက် သူမိန်းမကို အကူအညီတောင်းပြီး သူတို့နှစ်ယောက်ကို မိတ်ဆက်ပေးခိုင်းမယ်လို့ ပြောလိုက်တယ်။ ဒါပေမယ့် သူ့မိန်းမ မိတ်ဆက်ပေးလိုက်တဲ့သူက အခြားသူမဟုတ်ဘဲ သူကိုယ်တိုင်ပဲ ဖြစ်နေပါတယ်။
လီရဲ့ မိန်းမဟာ ကျိုး ဆီကနေ ငွေလိမ်လည်ဖို့အတွက် ရည်းစားအဖြစ် ဟန်ဆောင်နေခဲ့တာပါ။ သူဟာ ကျိုးနဲ့ ရည်းစားဖြစ်နေတဲ့အချိန်အတွင်း အကြောင်းပြချက်အမျိုးမျိုးနဲ့ ယွမ် ၅ ထောင် တစ်ကြိမ်၊ ယွမ် ၈ သောင်း တစ်ကြိမ် တောင်းခဲ့ပါတယ်။
တစ်နှစ်ကြာပြီးတဲ့နောက် ကျိုးဟာ လီကို သူ့မိန်းမ မိတ်ဆက်ပေးတဲ့သူနဲ့ ဆက်ဆံရေး အရမ်းအဆင်ပြေတယ်လို့ ပြောလာပြီး သူ့ကို လက်ထပ်ဖို့ မွေးရပ်မြေဆီ ပြန်လာတော့မယ် ဆိုပြီး ပြောလာခဲ့ပါတယ်။ ဒါပေမယ့် ဒီနှစ်အစောပိုင်းလောက်မှာ လီဟာ ကျိုးနဲ့ တွဲနေတဲ့ သူက သူ့မိန်းမဖြစ်နေမှန်း သိရှိသွားပြီး ကျိုးဆီ အကြောင်းကြားခဲ့ပါတယ်။ လီရဲ့ ပြောဆိုပုံအရ သူ့မိန်းမဟာ တရုတ် TikTok မှာ အကောင့်သစ်ဖွင့်ပြီး ကျိုးနဲ့ ဆက်သွယ်နေတာကို မိသွားတာလို့ သိရပါတယ်။
လီဟာ ကျိုးကို သူ့မိန်းမ ယူထားတဲ့ ငွေတွေ ပြန်ပေးမယ်လို့ ကတိပေးပြီး တရားမစွဲဖို့ တောင်းဆိုခဲ့တယ်။ ဒါပေမယ့် ငွေအပြည့် ပြန်မပေးနိုင်ခဲ့တဲ့အဆုံး ကျိုး က တရား စစွဲပါတော့တယ်။ ကျိုးရဲ့ ဖြစ်ရပ်ဟာ တရုတ်ပြည်မှာ ဟိုးလေးတကျော်ကျော် ဖြစ်သွားခဲ့ပါတယ်။ စုံစမ်းမှုတွေ လုပ်ဆောင်နေဆဲပြီး အဲဒီလိမ်လည်မှုမှာ လီကိုယ်တိုင် ပါဝင် သရုပ်ဆောင်ခဲ့လား ဆိုတာကိုတော့ အခုအထိ မသိရသေးပါဘူး။
Source: Odditycentral
