သင်္ကြန်ကာလ စားသုံးဆီဖူလုံမှုရှိအောင် စီစဉ်ထားသော်လည်း အခြေခံလက်ကားရည်ညွှန်းဈေးနှုန်း ကျပ် ၁၀၀ ကျော်မြင့်တက်လာ

သင်္ကြန်ကာလအတွင်း စားသုံးသူပြည်သူများစားသုံးဆီ ဖူလုံမှုရှိစေရန် စီစဉ်ထားသော်လည်း အသင်း၏လက်ကားရည်ညွှန်းဈေးနှုန်းမှာ ပြီးခဲ့သည့်တစ်ပါတ်ထက် ကျပ် ၁၀၀ ကျော်မြင့်တက်လာသည်။

အဆိုပါ အခြေခံလက်ကားရည်ညွှန်းဈေးနှုန်းမှာ ဧပြီလ ၃ ရက်မှ ဧပြီလ ၉ ရက်အထိ တစ်ပိဿာ ၄၅၄၅ ကျပ်သတ်မှတ်ထားရာ၊ ပြီးခဲ့သည့်တစ်ပါတ်တွင် တစ်ပိဿာ ၄၄၄၀ ကျပ်ဖြစ်ပြီး ယခင်ထက် ၁၀၅ ကျပ် မြင့်တက်လာခြင်းဖြစ်သည်။

လက်ရှိတွင် လက်ကျန် စားသုံးဆီ တန်ချိန် သုံးသောင်းဝန်းကျင်ရှိပြီး သင်္ကြန်မတိုင်ခင် သင်္ဘောရှစ်စင်းနှင့် တန်ချိန် သုံးသောင်းခွဲ ထပ်ရောက်မည်ဖြစ်ကာ စုစုပေါင်း တန်ချိန် ခြောက်သောင်းခွဲရှိမည်ဖြစ်ကြောင်း၊ သင်္ကြန်ကာလအပြီးတွင်လည်း စားသုံးဆီ သင်္ဘောနှစ်စင်းနှင့် ဆီတန်ချိန် တစ်သောင်း တစ်ထောင်ကျော် ထပ်မံရောက်ရှိလာမည်ဖြစ်ပြီး ဧပြီလအတွက် ဆီတန်ချိန် ခုနစ်သောင်း ခြောက်ထောင်ဝန်းကျင်ရှိမည် ဖြစ်ကြောင်း သိရသည်။

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေဖြင့် စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံနှင့်အင်ဒိုနီးရှားနိုင်ငံတိုတွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို ထုတ်ပြန်ပေးနေခြင်းဖြစ်သည်။

ယင်းအပြင် ပြင်ပဈေးကွက်တွင်လည်း တစ်ပိဿာ ၇၀၀၀ ဝန်းကျင်အထိ အနည်းငယ် ပြန်လည်မြင့်တက်လာကြောင်း ရောင်းချသူများထံမှ သိရသည်။