တရုတ်-မြန်မာနယ်စပ် ချင်းရွှေဟော်မြို့နှင့် ၂၄ ကီလိုမီတာခန့်အကွာတွင်တည်ဆောက်နေသည့် သံလွင်မြစ်ကူး (ကွမ်းလုံ)တံတားတည်ဆောက်မှု ၉၂ ရာခိုင်နှုန်းပြီးစီးနေပြီဖြစ်ကြောင်း သိရသည်။
အဆိုပါ သံလွင်မြစ်ကူး (ကွမ်းလုံ)တံတား တည်ဆောက်ရေးစီမံကိန်းကို တရုတ်ပြည်သူ့သမ္မတနိုင်ငံ ယူနန်ပြည်နယ်အစိုးရက ယွမ်ငွေသန်းပေါင်း ၁၄၀ ဒသမ ၀၀ အကုန်ကျခံကာ တည်ဆောက်ပေးခြင်းဖြစ်ကြောင်း သိရသည်။
တံတားအောက်ခြေ အုတ်မြစ်လုပ်ငန်းများနှင့် တံတားကိုယ်ထည်တိုင်လုပ်ငန်းများကို ၂၀၂၂ ခုနှစ် ဇူလိုင် ၇ ရက်တွင် ဆောင်ရွက်ပြီးစီးခဲ့ပြီး ပင်မတံတား တိုင်နှစ်တိုင်ဖြစ်သည့် P1 & P2 Pier တိုင်များမှ ရေလယ်ဘက်နှင့် ကုန်းပေါ်ဘက်သို့ တစ်ဖက်တစ်ချက်စီ ကို အပိုင်းလိုက် တစ်ပိုင်းချင်းစီ ဝန်အားကိုမျှ၍ ချိန်ညှိ သွန်းလောင်းသွားခြင်းပုံစံ Segmental Balanced Cantilever Method ဖြင့် တည်ဆောက်ခဲ့ကြောင်း သိရသည်။
သံလွင်မြစ်ကူး (ကွမ်းလုံ)တံတား၏ စုစုပေါင်း တံတားအရှည် ၂၈၆ မီတာရှိပြီး ယာဉ်သွားလမ်းအကျယ် ကိုးမီတာရှိသော နှစ်လမ်းသွားတံတား အမျိုးအစားဖြစ်ကာ လူသွားလမ်းအကျယ် တစ်ဖက် လျှင် ၁ ဒသမ ၅ မီတာစီ ပါဝင်မည်ဖြစ်ကြောင်း၊ တံတားခံနိုင်ဝန်မှာ တန် ၆၀ ဖြစ်ကာ ကွမ်းလုံဘက်ကမ်း ချဉ်းကပ်လမ်းအရှည် ၃ ဒသမ ၉၈ ကီလိုမီတာနှင့် သိန္နီဘက်ကမ်း ချဉ်းကပ်လမ်းအရှည် ၀ ဒသမ ၃၃ ကီလိုမီတာ အသီးသီးရှိကြပြီး လမ်းနှင့် တံတား စုစုပေါင်းအရှည် ၄ ဒသမ ၅၉ ကီလိုမီတာရှိကြောင်း သိရသည်။
လက်ရှိအချိန်ထိ စီမံကိန်းတစ်ခုလုံးအနေဖြင့် ၉၂ ရာခိုင်နှုန်း ဆောင်ရွက်ပြီးစီးပြီဖြစ်ရာ ဆောင်ရွက်ရန် ကျန်ရှိနေသေးသည့်လုပ်ငန်းများကို ၂၀၂၃ ခုနှစ် ဇွန်လအတွင်း အပြီးဆောင်ရွက်သွားမည်ဖြစ်ကြောင်း သိရသည်။
သံလွင်တံတား(ကွမ်းလုံ) တံတားသစ်ကြီး တည်ဆောက်ပြီးပါက လားရှိုး – သိန္နီ – ကွမ်းလုံ – ချင်းရွှေ ဟော်လမ်းသည် တရုတ်-မြန်မာ နှစ်နိုင်ငံအတွက် ကုန်သွယ်မှု အဓိကထွက်ပေါက်ဖြစ်လာမည်ဖြစ်ရာ မြန်မာနိုင်ငံဘက်ခြမ်းမှ ကြံ၊ ပဲ၊ ပြောင်းနှင့်နှမ်း အပါအဝင် အခြားလယ်ယာထွက်ကုန်ပစ္စည်းများကို တရုတ်ပြည်သူ့သမ္မတနိုင်ငံ ယူနန်ပြည်နယ်ဘက်ခြမ်းသို့ ပိုမိုတင်ပို့နိုင်မည်ဖြစ်ကြောင်း သိရသည်။
