မေလ (၁၁) ရက် နံနက်ပိုင်းတိုင်းထွာချက်များအရ ဘင်္ဂလားပင်လယ်အော် အရှေ့တောင်ပိုင်းတွင် ဖြစ်ပေါ်နေသည့် အားကောင်းသော မုန်တိုင်းငယ်သည် မြောက်- အနောက် မြောက်ဘက်သို့ ရွေ့လျားကာ ပိုမိုအားကောင်းလာပြီး ဆိုင်ကလုန်းမုန်တိုင်း (မိုခါ)အဖြစ်သို့ ရောက်ရှိနေပြီဖြစ်ကြောင်း မိုးလေဝသနှင့် ဇလဗေဒညွှန်ကြားမှု ဦးစီးဌာနမှ အသိပေးထုတ်ပြန်ထားသည်။
အဆိုပါ ဆိုင်ကလုန်းမုန်တိုင်းသည် မြန်မာနိုင်ငံ၊ ကိုကိုးကျွန်းမြို့၏ အနောက် – အနောက်တောင်ဘက် ရေမိုင် (၃၆၅) မိုင်၊ ဟိုင်းကြီးကျွန်းမြို့၏ အနောက် – အနောက် တောင်ဘက် ရေမိုင်(၄၇၅) မိုင်၊ စစ်တွေမြို့၏ တောင် – အနောက်တောင်ဘက် ရေမိုင်(၆၁၅) မိုင်၊ အိန္ဒိယနိုင်ငံ၊ နီကိုးဘားကျွန်း၏ အနောက် – အနောက်မြောက်ဘက် ရေမိုင် (၄၁၅)မိုင်၊ ပိုပလဲယားကျွန်း၏ အနောက် – အနောက် တောင်ဘက် ရေမိုင်(၂၈၀)မိုင်နှင့် ဘင်္ဂလားဒေ့ရှ် နိုင်ငံ၊ ကော့ဘဇားမြို့၏ တောင် – အနောက်တောင်ဘက် ရေမိုင် (၆၆၅)မိုင်အကွာ ပင်လယ်ပြင်ကို ဗဟိုပြုနေကြောင်း သိရသည်။
လက်ရှိအခြေအနေတွင် ဘင်္ဂလားဒေ့ရှ် – မြန်မာကမ်းရိုးတန်းကို ဦးတည် ရွေ့လျားနိုင်သည့် အခြေအနေမျိုးရှိသည့်အတွက် လိမ္မော်ရောင်အဆင့် သတ်မှတ်ထားပြီး လက်ရှိ အမြင့်ဆုံးလေတိုက်နှုန်းမှာ တစ်နာရီကို (၄၅) မိုင်နှုန်းရှိနေကြောင်း မိုး/ဇလက သတင်းထုတ်ပြန်ထားသည်။
အဆိုပါ ဆိုင်ကလုန်းမုန်တိုင်း မိုခါသည် ယနေ့ မေလ (၁၁) ရက် ညပိုင်းတွင် ပိုမိုအားကောင်းလာကာ အားကောင်းသည့် ဆိုင်ကလုန်းမုန်တိုင်း (မိုခါ) အဖြစ်သို့ ရောက်ရှိနိုင်ပြီး မေ (၁၂) ရက်တွင် မြောက် – အရှေ့မြောက်ဘက်သို့ ဆက်လက်ရွေ့လျားကာ ဘင်္ဂလားပင်လယ်အော်အလယ်ပိုင်းတွင် အားအလွန်ကောင်းသည့် ဆိုင်ကလုန်းမုန် တိုင်း (မိုခါ) အဖြစ်သို့ ရောက်ရှိလာနိုင်ကြောင်း မိုး/ဇလ က ထုတ်ပြန်ထားသည်။
ယင်း အားအလွန်ကောင်းသည့် ဆိုင်ကလုန်းမုန်တိုင်း (မိုခါ)သည် မေ (၁၄) ရက်တွင် ဘင်္ဂလားဒေ့ရှ်နိုင်ငံ အရှေ့ တောင်ပိုင်းနှင့် မြန်မာနိုင်ငံ၊ ရခိုင်ကမ်းရိုးတန်းမြောက်ပိုင်းကမ်းခြေကို ဘင်္ဂလားဒေ့ရှ် နိုင်ငံ၊ ကော့ဘဇားမြို့နှင့် မြန်မာနိုင်ငံ၊ ကျောက်ဖြူမြို့ကြားမှ ဖြတ်ကျော်ဝင်ရောက်နိုင်ကြောင်း သတိပေးထားသည်။
