“မိုခါ”ဆိုင်ကလုန်းမုန်တိုင်းဒဏ်သင့်ဒေသများ၌ ကူညီကယ်ဆယ်ရေးနှင့်ပြန်လည်ထူထောင်ရေးလုပ်ငန်းများပြုလုပ်ရာ၌အသုံးပြုရန် တပ်မတော်နှင့်စေတနာရှင်၊အလှူရှင်များ၏ အလှူငွေပေးအပ်လှူဒါန်းပွဲကို မေ ၁၅ ရက်(ယနေ့)နံနက်ပိုင်းက ရန်ကုန်မြို့တွင်ကျင်းပရာ နစက ဥက္ကဋ္ဌတက်ရောက်၍ လက်ခံရယူခဲ့သည်။
“မိုခါ”ဆိုင်ကလုန်းမုန်တိုင်းကြောင့် ရခိုင်ပြည်နယ်၊ချင်းပြည်နယ်၊စစ်ကိုင်းတိုင်းနှင့်ဧရာဝတီတိုင်းတို့တွင် ထိခိုက်ပျက်စီးဆုံးရှုံးခဲ့မှုများကို နိုင်ငံတော်မှ ဦးဆောင်၍ ပြန်လည်ကယ်ဆယ်ရေးနှင့်ထူထောင်ရေးလုပ်ငန်းများဆောင်ရွက်လျက်ရှိကြောင်း နစက ဥက္ကဋ္ဌကပြောကြားခဲ့သည်။
မုန်တိုင်းသည် မြန်မာနိုင်ငံအတွင်း ဝင်ရောက်နိုင်သည်ကို သိလျင်သိခြင်း သတိပေးချက်များချက်ချင်းထုတ်ပြန်ကာ ပြောင်းရွှေ့မှုများနှင့် ကြိုတင်ပြင်ဆင်မှုများဆောင်ရွက်ခဲ့၍ မုန်တိုင်းကျရောက်ချိန်တွင် လူများထိခိုက်သေဆုံးမှုကို များစွာရှောင်ရှားနိုင်ခဲ့သည်ဟု ဆိုသည်။
“အခုအချိန်အထိ သိရှိရတဲ့ သတင်းအချက်အလက်တွေအရ ၅ ဦးသေဆုံးခဲ့ပါတယ်၊ ကြိုတင်ပြင်ဆင်မှုတွေကို ကောင်းမွန်အောင်ဆောင်ရွက်နိုင်ခဲ့တာကြောင့် ထိခိုက်မှုအနည်းဆုံးနဲ့ ပြင်းထန်တဲ့မုန်တိုင်းဒဏ်ကို အောင်မြင်စွာကျော်လွှားနိုင်ခဲ့ပါတယ်”ဟု နစက ဥက္ကဋ္ဌကပြောသည်။
မုန်တိုင်းဒဏ်ခံစားခဲ့ရသည့် ဒေသများ၌ပြန်လည်ထူထောင်ရေးလုပ်ငန်းများပြုလုပ်ရန် အလှူရှင်များက လှူဒါန်းမှုများအပြင် AHA Center မှတာဝန်ရှိသူများမှလည်း အကူအညီများပေးအပ်နိုင်ရန် မြန်မာနိုင်ငံသို့ ရောက်ရှိနေပြီဖြစ်ကာ အခြားနိုင်ငံများမှလည်း အကူအညီများ ပေးအပ်ရန်ကမ်းလှမ်းလာပြီး ယခုလှူဒါန်းမှုများအား ရခိုင်ပြည်နယ်အပြင် အခြားမုန်တိုင်းဒဏ်ကြောင့် ထိခိုက်ခဲ့ရသည့် ဒေသများကိုပါခွဲဝေလှူဒါန်းပေးသွားမည်ဟု ဆိုသည်။
ထို့နောက် တပ်မတော်(ကြည်း၊ ရေ၊ လေ)အရာရှိ၊စစ်သည်၊မိသားစုများ(ကိုယ်စား)စစ်ရေးချုပ် ဒု-ဗိုလ်ချုပ်ကြီးစိုးမင်းဦးက အလှူငွေကျပ်သိန်း ၁၀၀၀၀ အပါအဝင် အလှူရှင်များလှူဒါန်းသည့် အလှူငွေများအား နစက ဥက္ကဋ္ဌမှလက်ခံရယူခဲ့သည်။
ယနေ့ လှူဒါန်းမှု၌ မုန်တိုင်းဒဏ်ခဲ့ရသည့်ဒေသများ၌ ကူညီကယ်ဆယ်ရေးနှင့်ပြန်လည်ထူထောင်ရေးလုပ်ငန်းများဆောင်ရွက်ရာတွင်အသုံးပြုရန် အလှူငွေကျပ်သိန်းပေါင်း ၁၃၁၈၁၀ သိန်းလက်ခံရရှိခဲ့သည်။
