မုန်တိုင်းကျရောက်ခဲ့သည့် ဒေသများတွင် တိကျစွာလိုက်နာရမည့် ကျန်းမာရေးဆိုင်ရာ သတိပေးချက် ထုတ်ပြန်

မုန်တိုင်းကျရောက်ခဲ့သည့် ဒေသများ၌ နေထိုင်သူများ တိကျစွာလိုက်နာရမည့် ကျန်းမာရေးဆိုင်ရာ သတိပေးချက်များအား ကျန်းမာရေးဝန်ကြီးဌာနမှ မေ (၁၆) ရက် တွင် အသိပေးထုတ်ပြန်ခဲ့သည်။

မုန်တိုင်းကျရောက်ပြီးနောက် ရုတ်တရက်ရေလွှမ်းမိုးမှု၊ရေကြီးမှု၊ မိုးကြိုးအန္တရာယ်၊ မြေပြိုမှု၊ ထိခိုက်ဒဏ်ရာရရှိမှု၊ လျှပ်စစ်ဓာတ်လိုက်မှု၊ မြွေဆိုးကိုက်မှု၊ အအေးမိ၍ ဖျားနာခြင်း၊ အဆုတ်ရောင်ခြင်း၊ ခြင်မှတစ်ဆင့်ကူးစက်သော သွေးလွန်တုပ်ကွေးနှင့် ငှက်ဖျားရောဂါ၊ မသန့်ရှင်းသောရေနှင့်အစာကြောင့်ဖြစ်ပွားတတ်သည့် ဝမ်းပျက်ဝမ်းလျော ရောဂါ၊ အစာအဆိပ်သင့်ရောဂါနှင့် အခြားကျန်းမာရေးဆိုင်ရာ ပြဿနာများဖြစ်ပွားတတ်ကြောင်းလည်း ကျန်းမာရေးဝန်ကြီးဌာနမှ သတိပေးထားသည်။

ထို့ကြောင့် ဒေသဆိုင်ရာ အုပ်ချုပ်ရေးအဖွဲ့များမှ အချိန်နှင့်တစ်ပြေးညီ ထုတ်ပြန်သည့် သတိပေးချက်များကို တိကျစွာ လိုက်နာရန်၊ ရေလွှမ်းမိုးနေချိန်တွင် ချိုင့်ခွက်နှင့်မြောင်းများအတွင်းချော်ကျ၍ ရေနစ်နိုင်သည့် အန္တရာယ်နှင့် ထိခိုက်ဒဏ်ရာရနိုင်သည့် အန္တရာယ်များလည်းရှိ၍ သတိပြုသွားလာရန်လည်း သတိပေးထားသည်။

ထို့ပြင် ဓာတ်လိုက်မှု အန္တရာယ်ရှိ၍ သတိပြုသွားလာရန်၊မြေပြင်ပေါ်ပြတ်ကျနေသော(သို့) ရေထဲသို့ ကျနေသော လျှပ်စစ်ဓာတ်ကြိုးများအနီးသို့ သွားလာခြင်းကို ရှောင်ကြဉ်ရန်နှင့် ကလေးငယ်များကို သတိပေးခြင်းများပြုလုပ်ရန်၊ မြွေဆိုးအန္တရာယ် သတိပြုရန်၊ အန္တရာယ်ရှိသည့် ပျက်စီးနေသော အဆောက်အအုံအတွင်းသို့ သွားလာခြင်းမပြုရန်၊ မသန့်ရှင်းသော အစားအစာနှင့် ရေမှတဆင့် ဝမ်းပျက်ဝမ်းလျောရောဂါအပါအဝင် ကူးစက်တတ်သောရောဂါများဖြစ်ပွားနိုင်၍ FDA အသိအမှတ်ပြု သောက်ရေသန့်(သို့)ကျိုချက်ထားသောရေ(သို့)ရေသန့်စင်ဆေးပြား စနစ်တကျခပ်ထားသောရေ(သို့)ကလိုရင်း ဆေးခတ်၍ သန့်စင်ထားသောရေကိုသာ သောက်သုံးရန်၊ မြစ်ရေ၊ချောင်းရေနှင့် မသန့်ရှင်းသော ရေများကို လုံးဝမသောက်ရန်လည်း သတိပေးထားသည်။

အစာအဆိပ်သင့်မှု မဖြစ်စေရန် ရေမျောအစားအစာများ၊စည်သွတ်ဘူးများ၊ ရက်လွန်အစားအစာ၊ သိုးနေသော၊မှိုတက်နေသော အစားအစာ၊ အမှည့်လွန်အသီးများနှင့်သန့်ရှင်းမှုမရှိသော အစားအစာများကို မစားရန်၊ အစားအစာများ ကိုင်တွယ်ပြင်ဆင်ခြင်းမပြုမီ၊ အစားမစားမီနှင့်အိမ်သာအသုံးပြုပြီးချိန်တိုင်း၌ ဆပ်ပြာနှင့် ရေကိုအသုံးပြု၍ အနည်းဆုံး စက္ကန့် (၂၀)ကြာ လက်ကိုစနစ်တကျ ဆေးကြောရန်၊ တစ်ကိုယ်ရေသန့်ရှင်းရေး ဂရုပြုဆောင်ရွက်ရန်၊ သန့်ရှင်းသော ယင်လုံအိမ်သာများ အသုံးပြုရန်၊ သော က်သုံးရေသိုလှောင်ရာနေရာများနှင့် ရေတွင်းရေကန်များအနီး အညစ်အကြေးမစွန့်ရန်၊ အမှိုက်သရိုက်များကို စနစ်တကျစွန့်ပစ်ရန်၊ အမှိုက်များကို မြေမြုပ်ခြင်း၊ မီးရှို့ခြင်း၊အမှိုက်ပုံကို ထုံးဖြူးခြင်းတို့ကို ဆောင်ရွက်ရန်လည်း သတိပေးထားသည်။

အအေးမမိစေရန် အမိုးအကာအောက်တွင် နေရန်၊ ရာသီဥတုနှင့် ကိုက်ညီသည့် နွေးထွေးသော အဝတ်များ ဝတ်ဆင်ရန် (ကလေးငယ်များကို အထူးဂရုစိုက်ပါ)၊ ကိုဗစ်(၁၉) ရောဂါကာကွယ်ဆေးထိုးလုပ်ငန်းများ၊ ပုံမှန် ကာကွယ်ဆေးထိုးလုပ်ငန်းများ၊ ကျန်းမာရေးစောင့်ရှောက်မှုလုပ်ငန်းများတွင် ပူးပေါင်းပါဝင်ဆောင်ရွက်ရန်လည်း ကျန်းမာရေး ဝန်ကြီး ဌာနက တိုက်တွန်းထားသည်။

ခြင်အန္တရာယ်သတိပြုရန်၊ မည်သည့်အချိန်တွင်မဆို ခြင်ထောင်ဖြင့်သာ အိပ်စက်ရန်၊ ခြင်ကျား၊ ပိုးလောက်လမ်းနှင့် ခြင်နှိမ်နင်းရေး လုပ်ငန်းများတွင် ပူးပေါင်းပါဝင်ဆောင်ရွက်ရန်၊ ထိခိုက်ဒဏ်ရာရရှိခြင်းအပါအဝင် ကျန်းမာရေးပြဿနာ တစ်စုံတစ်ရာခံစားရပါက နီးစပ်ရာ ကျန်းမာရေးဌာန(သို့) ကျန်းမာရေးစောင့်ရှောက်ပေးနေသည့် ဆေးခန်းသို့ အမြန်ဆုံးသွားရောက်ပြသရန်လည်း ကျန်းမာရေးဝန်ကြီးဌာနက သတိပေးထားသည်။