မက္ကဆီကို နိုင်ငံရှိ တရားရုံးတစ်ခုသည် ၄င်းကို အဓမ္မကျင့်သူအား သတ်ခဲ့သည့် အမျိုးသမီးတစ်ဦးအား ဥပဒေအရ ခုခံပိုင်ခွင့် ကို အလွန်အကျွံ အသုံးပြုမှုဖြင့် မေလ ၁၅ ရက် တနင်္လာနေ့တွင် ထောင်ဒဏ် ၆ နှစ် ကျခံရန် အမိန့်ချမှတ်ခဲ့ကြောင်း သိရသည်။
အဆိုပါသတင်းသည် ကြားရသူအပေါင်းကို အလွန်အမင်းဒေါသထွက်စေပြီး နိုင်ငံတကာ သတင်းစာများ၏ ခေါင်းကြီးပိုင်းများတွင် တစ်ပတ်လုံးလုံး ဖော်ပြခံနေရသည်။
ထိုအမျိုးသမီး၏ အမည်မှာ ရိုဇာနာ ရူအိ့စ် ဖြစ်ပြီး မက္ကဆီနိုင်ငံ၊ နိတ်ဇာဟွာကိုယိုတို မြို့တွင် နေထိုင်သည့် အသက် ၂၃ နှစ်အရွယ် တစ်ခုလပ် မိခင်တစ်ဦးဖြစ်သည်။
ဖြစ်စဉ်မှာ ရူအိ့စ် သည် ၂၀၂၁ ခုနှစ်၊ မေလတွင် အာလူးကြော်ရောင်းသည့် အလုပ်မှ အပြန်၌ သူငယ်ချင်းတစ်ဦးနှင့်အတူ ဘီယာသောက်ထွက်ခဲ့သည်။ ထိုစဉ် သူနေထိုင်သည့် ရပ်ကွက်တစ်ဝိုက်မှ တွေ့ဖူးနေကြ အမျိုးသားတစ်ဦးနှင့် ဆုံခဲ့ပြီး ဘီယာအတူ သောက်ဖြစ်ခဲ့ကြသည်။ ထို့နောက် အဆိုပါအမျိုးသားသည် ရူအိ့စ် အား အိမ်ပြန်ပို့ပေးခဲ့ပြီး ညဉ့်နက်နေပြီဖြစ်သောကြောင့် တစ်ညလောက် တည်းခိုခွင့်ပြုရန် ခွင့်တောင်းခဲ့သည်။
အိပ်ခွင့်ရပြီးနောက် ထိုလူသည် ညသန်းခေါင်အရောက်တွင် ရူအိ့စ် ၏ အိပ်ရာပေါ်သို့ ခိုးဝင်လာပြီး ရိုက်နှက်ကာ အဓမ္မကျင့်ခဲ့သည်။ ရူအိ့စ် သည်လည်း ပြန်လည်ခုခံရင်း ထိုလူအား အင်္ကျီဖြင့် လည်ပင်းညစ်ကာ သတ်မိသွားသည်။ ထို့နောက် ကြောက်ကြောက်လန့်လန့်ဖြင့် အလောင်းအား အိတ်ထဲထည့်၍ လမ်းပေါ်သို့ တရွတ်တိုက် ဆွဲသွားချိန် ရဲများက တွေ့ရှိသွားသဖြင့် အဖမ်းခံခဲ့ရသည်။
“ကျွန်မ လုပ်ခဲ့တာအတွက် နောင်တရပါတယ်။ ဒါပေမယ့် အဲလိုတာ မလုပ်ခဲ့ရင် အခုအချိန်အထိ အသက်ရှင်လျက် ရှိနေမှာ မဟုတ်ပါဘူး” ရူအိ့စ် က အေပီ သတင်းဌာနသို့ ပြောခဲ့သည်။
ရူအိ့စ် သည် လူသတ်မှုဖြင့် ထောင်တွင် ကိုးလကြာ နေခဲ့ရပြီး တနင်္လာနေ့၌ တရားစီရင်ခံခဲ့ရာ ထောင်ဒဏ် ၆ နှစ်အပြင် အဓမ္မကျင့်သူ၏ မိသားစုအား လျော်ကြေးငွေအဖြစ် ဒေါ်လာ ၁၆,၀၀၀ ပေးဆောင်ခဲ့ရသည်။ ရူအိ့စ် ၏ ရှေ့နေကမူ ထိုစီရင်ချက်သည် တရားမျှတမှုမရှိဟု ဆိုကာ အယူခံဝင်သွားမည်ဟု ကတိပြုခဲ့သည်။
Source: Odditycentral
