မန္တလေးတိုင်းဒေသကြီး၊ ပုသိမ်ကြီးမြို့နယ်ရှိ ပုံစံ (၇)ရရှိပြီး လယ်ယာမြေများအား အကွက်ရိုက်၍ တရားမဝင်ရောင်းချနေသည့်အပေါ် အရေးယူ ဆောင်ရွက်မည်ဖြစ်ကြောင်း အောင်မြေသာစံ ခရိုင်စီမံအုပ်ချုပ်ရေးကောင်စီက မေ (၂၇) ရက်တွင် အသိပေးထုတ်ပြန်ထားသည်။
ပုသိမ်ကြီးမြို့နယ်ရှိ လယ်ယာမြေများနှင့် ပုံစံ(၇) ရရှိပြီး လယ်ယာမြေများပေါ်တွင် လယ်ယာမြေဥပဒေနှင့်အညီ စိုက်ပျိုးမှုမရှိခြင်း၊ လယ်ယာမြေများကို ခိုင်လုံသောအကြောင်းပြချက်မရှိဘဲ လှပ်ထားခြင်း၊ လယ်ယာမြေများကို ခွင့်ပြုမိန့်မရှိဘဲ အခြားနည်းသုံးစွဲခြင်း၊ အခြားနည်းအသုံးပြုခွင့် ရရှိထားသော်လည်း လျှောက်ထားသည့်နည်းလမ်းအတိုင်း လုပ်ကိုင်ဆောင်ရွက်မှုမရှိဘဲ ကျော်လွန်ဆောင်ရွက်နေခြင်းများအား စီစစ်တွေ့ရှိရသည်ဟု အဆိုပါ ထုတ်ပြန်ချက်တွင် ရေးသားထားသည်။
ထို့ပြင် လယ်ယာမြေများပေါ်တွင် မြေဖို့ခြင်း၊ကွက်စိပ်ရိုက်ခြင်း၊ ကွန်ကရစ်လမ်းခင်းခြင်း၊ အုတ်တံတိုင်းကာရံခြင်း၊ ကွန်ကရစ်တိုင်စိုက်ထူ၍ ခြံစည်းရိုးကာရံခြင်း၊ နေအိမ်ဆောက်လုပ်ခြင်း၊ ဈေးဆိုင်ခန်းများ ဆောက်လုပ်ခြင်းနှင့် တရားမဝင် မြေအရောင်းအဝယ်ပြုလုပ်ခြင်းများကိုလည်း စိစစ်တွေ့ရှိရသည်ဟု ဆိုသည်။
ယင်းကဲ့သို့ ဥပဒေနှင့် ညီညွတ်မှုမရှိသည့် လုပ်ဆောင်မှုများအား စီမံခန့်ခွဲရေးနည်းလမ်းအရ အရေးယူခြင်း၊ လယ်ယာမြေဥပဒေ ပုဒ်မ-၁၉ အရ အမိန့်တစ်ရပ်ကိုဖြစ်စေ၊အမိန့်တစ်ရပ်ထက်ပို၍ဖြစ်စေ ချမှတ်ခြင်း၊ လိုက်နာခြင်းမရှိပါက လယ်ယာမြေ ဥပဒေ ပုဒ်မ-၂၀(က) အရ သက်ဆိုင်ရာ တရားရုံးတွင် တရားစွဲဆိုခြင်း၊ လယ်ယာမြေ ဥပဒေပုဒ်မ-၁၇ (ဃ)အရ လယ်ယာမြေ လုပ်ပိုင်ခွင့်ကို ရုပ်သိမ်းခြင်း၊ လယ်ယာမြေအား အခြားနည်းအသုံးပြုရန် ခွင့်ပြုချက်ကို ပယ်ဖျက်ခြင်းများဖြင့် အရေးယူသွားမည်ဟုအောင်မြေသာစံ ခရိုင်စီမံအုပ်ချုပ်ရေးကောင်စီက အသိပေးထုတ်ပြန်ထားခြင်း ဖြစ်သည်။
“ပုသိမ်ကြီးဖက်က လယ်မြေတွေကို အကွက်ရိုက်ရောင်းနေတာတွေရှိတယ်။ တစ်ချို့ဆိုရင် အရစ်ကျနဲ့ ရောင်းနေကြတာ။ အဲဒီလို ရောင်းနေတာတွေက လယ်မြေတွေဖြစ်တဲ့အတွက် ခိုင်မာမှုမရှိဘူးဗျ”ဟု မန္တလေးမြို့ခံတစ်ဦးကပြောသည်။
ပုသိမ်ကြီးမြို့နယ်သည် လမ်းပန်း ဆက်သွယ်ရေး ကောင်းမွန်ခြင်း၊မန္တလေးမြို့၌ လူနေသိပ်သည်းမှုများပြားလာ၍ လူနေထိုင်ရန် (သို့) စီးပွားရေးလုပ်ငန်းများလုပ်ကိုင်ရန် စိတ်ဝင်စားမှု မြင့်တက်လာကာ နယ်မြေအေးချမ်း၍ မြေကွက်ဝယ်ယူသူများ များပြားလာခြင်းဖြစ်ကြောင်းလည်း သိရသည်။
