မြန်မာနိုင်ငံဆိုင်ရာ တရုတ်သံရုံး(ရန်ကုန်) တွင် တာဝန်လွှဲပြောင်းထမ်းဆောင်မည့် စီးပွားရေးသံမှူးနှင့် ကုန်သည်စက်မှုအသင်းချုပ် ဥက္ကဋ္ဌတို့ တွေ့ဆုံစဉ် တရုတ်နိုင်ငံရှိ လုပ်ငန်းရှင်များကို ပြည်တွင်းရှိလုပ်ငန်းများတွင် လာရောက်လုပ်ကိုင်ရန် ဖိတ်ခေါ်ခဲ့ခြင်းဖြစ်သည်။
တရုတ်နိုင်ငံနှင့် မြန်မာနိုင်ငံတို့အကြား စီးပွားရေး ပူးပေါင်းဆောင်ရွက်မှု မြှင့်တင်ရေးသည် အရေးကြီးကြောင်း၊ယခုနှစ်အတွင်း နှစ်နိုင်ငံအကြား စီးပွားရေးကူးလူးဆက်ဆံမှုသည် သိသာစွာတိုးတက် ပြောင်းလဲလာပြီး တရုတ်စီးပွားရေး ကိုယ်စားလှယ်အဖွဲ့များလည်း အများအပြား ဝင်ရောက်လာကြောင်း၊ နှစ်နိုင်ငံကုန်သွယ်ရေးတွင် အဓိကလိုအပ်သည့် ယွမ်-ကျပ် ငွေပေးချေမှုကို အရှိန်မြှင့်လုပ်ဆောင်စေလိုကြောင်း၊နယ်စပ် ကုန်သွယ်ရေးကို တိုးမြှင့်လုပ်ကိုင်နိုင်ရေး၊လယ်ယာထွက်ကုန်ပစ္စည်းများ၊ မွေးမြူရေးနှင့် ရေထွက်ကုန်ပစ္စည်းများပိုမိုတင်ပိုနိုင်ရေး၊ ဓာတ်မြေသြဇာအပါအဝင် လယ်ယာသုံး စက်ကိရိယာများ၊ စက်မှုလုပ်ငန်းနှင့်ကုန်ထုတ်လုပ်ငန်းသုံး ကုန်ကြမ်းများ တင်သွင်းရာတွင် လွယ်ကူချောမွေ့စွာ ဆောင်ရွက်နိုင်ရေးနှင့် CMP လုပ်ငန်းများတွင်လည်း ပိုမိုလာရောက်လုပ်ကိုင်နိုင်ရန် ဖိတ်ခေါ်လိုကြောင်း၊ ကုန်စည်ပြပွဲများကိုလည်း အပြန်အလှန်ကျင်းပ ပြုလုပ်သွားလိုပြီး လူ့စွမ်းအား အရင်းအမြစ် ဖွံဖြိုးတိုးတက်ရေးအတွက် သင်တန်းများနှင့်ပညာသင်ဆု အစီအစဉ်များလည်း ရရှိနိုင်ရန် သံရုံးဖက်မှ ကူညီဆောင်ရွက်ပေးစေလိုကြောင်း ကုန်သည်စက်မှုအသင်းချုပ် ဥက္ကဋ္ဌ ဦးအေးဝင်းက ပြောကြားခဲ့သည်။
မြန်မာနိုင်ငံဆိုင်ရာ တရုတ်သံရုံး (ရန်ကုန်) မှ စီးပွားရေးသံမှူး Mr. Tan Shufu သည် တာဝန်ပြီးဆုံး၍ တရုတ်ပြည်သူ့ သမ္မတနိုင်ငံသို့ပြန်လည်ထွက်ခွာတော့မည်ဖြစ်သဖြင့် ကုန်သည်စက်မှုအသင်းချုပ်ဥက္ကဋ္ဌ ဦးအေးဝင်းနှင့်အဖွဲဝင်များထံ လာရောက် တွေ့ဆုံ နှုတ်ဆက်ခဲ့ပြီး ၎င်းနေရာတွင် တာဝန်ထမ်းဆောင်မည့် စီးပွားရေးသံမှူးသစ် Mr. Ouyang Daobing နှင့်လည်း ၂၀၂၃ခု နှစ် ဇွန်လ ၂ ရက်နေ့တွင် အသင်းချုပ်ရုံး၌ တွေ့ဆုံမိတ်ဆက်ခဲ့သည်။
တွေ့ဆုံရာတွင် Mr. Tan Shufu က မိမိတာဝန်ထမ်းဆောင်ခဲ့စဉ်အတွင်း တရုတ် – မြန်မာ နှစ်နိုင်ငံ စီးပွားရေးဖွံဖြိုးတိုးတက်ရေးနှင့် ရင်းနှီးမြှုပ်နှံမှုများ မြှင့်တင်ရေးအတွက် အဓိက ဆောင်ရွက်ပေးခဲ့ကြောင်း၊ တရုတ်နိုင်ငံမှ ကိုဗစ်ကာလများအတွင်း မြန်မာနိုင်ငံအတွက် ကိုဗစ်ကာကွယ်ဆေးများ လှူဒါန်းပေးရာတွင် သံရုံးအနေဖြင့် ညှိနှိုင်းဆောင်ရွက်ပေးခဲ့ကြောင်း၊လူ့စွမ်းအားအရင်းအမြစ် ဖွံ့ဖြိုးတိုးတက်ရေး၊ အသေးစား၊အငယ်စား၊အလတ်စား လုပ်ငန်းများ ဖွံ့ဖြိုးတိုးတက်ရေးအတွက် ထောက်ပံ့ပေးလျက် ရှိကြောင်း၊ကုန်စည်ပြပွဲဆိုင်ရာ ပူးပေါင်းဆောင်ရွက်မှုများ ဆက်လက်လုပ်ဆောင်နေကြောင်းနှင့် ရှေ့ဆက်၍လည်း လုပ်ငန်းဆိုင်ရာ အခက်အခဲများကျော်လွှားပြီး စီးပွားရေးဝန်းကျင်ကောင်းကို ဖော်ဆောင်နိုင်လိမ့်မည် ဖြစ်ကြောင်း ပြောကြားခဲ့သည်။
ယင်းအပြင် စီးပွားရေးသံမှူးသစ် Mr. Ouyang Daobing ကလည်း အသင်းချုပ်နှင့် ပိုမိုထိတွေ့မည့်အစီအစဉ်များတိုးမြှင့် ဆောင်ရွက်သွားမည်ဖြစ်ကြောင်း၊ အသင်းချုပ်နှင့် ယခင်ကာလက ရရှိထားသည့် လက်တွဲလုပ်ကိုင်မှုနှင့် အောင်မြင်မှုများကို ဆက်လက်ထိန်းသိမ်းသွားမည် ဖြစ်ကြောင်း၊ ကုန်သွယ်မှုမြှင့်တင်ရေးနှင့်လူ့စွမ်းအားအရင်းအမြစ် ဖွံဖြိုးတိုးတက်ရေးတို့ကို ဆောင်ရွက်သွားမည်ဖြစ်ကြောင်း ပြောကြားခဲ့သည်။
ထို့ပြင် တက်ရောက်လာကြသူများမှ တရုတ်- မြန်မာ စီးပွားရေး ပူးပေါင်းဆောင်ရွက်ရေး၊ လူမှုရေး၊ပညာရေး၊ ကုန်သွယ်ရေး၊ လျှပ်စစ်နှင့် ဆိုလာကဏ္ဍများတွင် ပူးပေါင်းဆောင်ရွက်မှု မြှင့်တင်ရေးတို့ကို ဆွေးနွေးခဲ့ကြပြီး အစည်းအဝေးသို့ ကုန်သည်စက်မှုအသင်းချုပ်ဥက္ကဋ္ဌ ဦးအေးဝင်း၊ ဒုတိယဥက္ကဋ္ဌ ဒေါက်တာဝင်းစည်သူ၊ တွဲဖက်အထွေထွေ အတွင်းရေးမှူး ဒေါ်သူဇာဝင်း၊ အမှုဆောင်အရာရှိချုပ် ဒေါက်တာဇော်ဌေးတို့ တက်ရောက်ခဲ့ကြကြောင်း သိရသည်။
