ဗြိတိန်နိုင်ငံ၊ ချက်လျှာမြို့ရှိ အယ်လ်ပရာဟမ် ရွာက အသက် ၂၁ နှစ်အရွယ် အမျိုးသမီးတစ်ယောက်ဟာ ဆက်ကျော်သက်အရွယ် မိန်းကလေး တစ်ယောက်ကို ယောက်ျားလေးလို ဟန်ဆောင်ပြီး လိမ်လည်လှည့်ဖြားကာ လိင်ဆက်ဆံမှုတွေ ပြုလုပ်ခဲ့တဲ့အတွက် တရားစွဲဆို ခံထားရတယ်လို့ သိရပါတယ်။
ဖြစ်စဉ်ကတော့ ဂျော်ဂျီယာ ဘီလမ် ဆိုတဲ့ အမျိုးသမီးဟာ ဆိုရှယ်မီဒီယာ အက်ပ်တစ်ခုဖြစ်တဲ့ Snapchat မှာ ဂျော့ချ် ပါရီ ဆိုတဲ့ ယောက်ျားလေး နာမည်နဲ့ အမည်မဖော်လိုသူ ၁၉ နှစ်အရွယ် မိန်းကလေး တစ်ယောက်ဆီ ချဉ်းကပ်ခဲ့ပါတယ်။
အဲဒီလိုနဲ့ အွန်လိုင်းမှာ စကားစပြောဖြစ်ပြီးနောက် လေးနှစ်အကြာမှာ သူတို့နှစ်ယောက်ဟာ အပြင်မှာတွေ့ပြီး စတွဲဖြစ်ခဲ့ပါတယ်။ ဘီလမ်ဟာ ၂၀၂၁ ခုနှစ် မေလကနေ အလိမ်ပေါ်သွားခဲ့တဲ့ ဩဂုတ်လအထိ နစ်နာသူ အမျိုးသမီးကို ယောကျ်ားလေးလို ဟန်ဆောင်ပြီး ချစ်သူရည်းစားအနေနဲ့ လိင်ဆက်ဆံမှုတွေ ပြုလုပ်ခဲ့တယ်လို့ သိရပါတယ်။
နစ်နာသူကတော့ ဘီလမ်ကို ယောကျ်ားလေးထင်ပြီး တွဲခဲ့တာပါ။ ဖြစ်ချင်တော့ နစ်နာသူဟာ အဝေးမှုန်ဖြစ်ပြီး မျက်မှန်ချွတ်လိုက်ရင် ဘာမှမမြင်ရတော့အထိကို မျက်စိအားနည်းတယ်လို့ သိရပါတယ်။
ဒါကို သိတဲ့ ဘီလမ်ဟာ နစ်နာသူနဲ့ တွေ့တဲ့အချိန်တိုင်း မျက်မှန်ကို အရင်ချွတ်ခိုင်းခဲ့ပါတယ်။ လိင်ဆက်ဆံရင်လည်း အလိမ်ပေါ်မှာစိုးလို့ ဘယ်တော့မှ အင်္ကျီ မချွတ်ခဲ့သလို သူ့ခန္ဓာကိုယ်ကိုလည်း ထိတွေ့ခွင့် မပေးခဲ့ဘူးလို့ သိရပါတယ်။ ဒါ့ပြင် ဘီလမ်ရဲ့ ပိပိရိရိ လိမ်ညာချက်တွေကြောင့် နစ်နာသူကလည်း သူ့ရည်းစားကို အမျိုးသမီးလို့ သံသယ မဝင်ခဲ့ပါဘူး။
ဒါပေမဲ့ ဘီလမ်ရဲ့ လိမ်ဆင်ဟာ နစ်နာသူရဲ့ အမေနဲ့ စတွေ့တဲ့ ၂၀၂၁ ခုနှစ် ဩဂုတ်လမှာတော့ ဘူးပေါ်သလို ပေါ်သွားခဲ့ပါတယ်။ နစ်နာသူရဲ့ အမေဟာ ဘဘီလမ်နဲ့ တွေ့ပြီးတဲ့နောက် မသင်္ကာလို့ လိုက်စုံစမ်းကြည့်တော့ အဖြစ်မှန်ကို သိသွားခဲ့ပါတယ်။
အဲဒီလို အလိမ်ပေါ်သွားတဲ့နောက် ဘီလမ်ဟာ နစ်နာသူကို ပြန်လည်တောင်းပန်ခဲ့ပါတယ်။ ဒါပေမယ့် နစ်နာသူဘက်ကတော့ ဘီလမ်ကို လိင်ပိုင်းဆိုင်ရာ စော်ကားမှု၊ ယောနိအတွင်း အရာဝတ္ထုတစ်ခုခုဖြင့် ထည့်သွင်းစော်ကားမှု အပါအဝင် လိင်ပိုင်းဆိုင်ရာ ပြစ်မှု ၁၇ မှုနဲ့ တရားစွဲထားပါတယ်။
အဲဒီအမှုကိုတော့ ချက်စတာ ခရောင်း တရားရုံးမှာ ဇွန်လ ၅ ရက် တနင်္လာနေ့က ရုံးတင်စစ်ဆေးခဲ့ပါတယ်။ ဘီလမ်ကတော့ စွဲချက်တွေ အားလုံးကို ငြင်းဆိုထားတဲ့အတွက် ရုံးတင်စစ်ဆေးမှုတွေကလည်း ဆက်ဖြစ်နေဦးမှာ ဖြစ်ပါတယ်။ ဒီလိုလိမ်လည်လှည့်ဖြားခဲ့တဲ့ ဘီလမ်ဟာ မိန်းမချင်း ကြိုက်လို့လား ဒါမှမဟုတ် အပျော်သက်သက်အနေနဲ့ လုပ်ခဲ့တာလား ဆိုတာကိုလည်း မသိရသေးပါဘူး။
Source: Mirror
