၂၀၂၄ အာရှအမျိုးသမီး ယူ-၂၀ ပြိုင်ပွဲ ဒုတိယအဆင့် ခြေစစ်ပွဲ အုပ်စု (B) ပွဲစဉ်အဖြစ် ရန်ကုန်မြို့၊ သုဝဏ္ဏကွင်းတွင် ယနေ့ ဇွန် ၈ ရက်၊ မြန်မာစံတော်ချိန် ည ၆ နာရီ ၃၀ နာရီမိနစ် မြန်မာ ယူ-၂၀ အမျိုးသမီးအသင်းနှင့် တရုတ် (တိုင်ပေ) ယူ-၂၀ အမျိုးသမီးအသင်းတို့ ယှဉ်ပြိုင်ကစားခဲ့ကြရာ တစ်ဂိုး တစ်ဂိုးစီဖြင့် သရေ ရလာဒ် ထွက်ပေါ်ခဲ့သည်။
မြန်မာ ယူ-၂၀ အမျိုးသမီးအသင်းတွင် ပွဲထွက်ကစားသမားများအဖြစ် ဂိုး-ဖီးဘေ၊ နောက်တန်း- ဖြူဖြူဝင်း၊ ခင်ဌေးကြိုင်၊ ဝေဖူးအိမ်၊ ယုယုနိုင်၊ အလယ်တန်း- မေသက်မွန်မြင့်၊ သဲအိမွန်သောင်း၊ စန္ဒာလင်း၊ ဟေမာန်စိုး၊ ရှေ့တန်း- ယဉ်လွန်းအိမ်နှင့် ဇင်မိုးပြည့်တို့ ပါဝင် ကစားခဲ့ကြသည်။
နှစ်သင်းစလုံးအတွက် အရေးကြီးသောပွဲဖြစ်၍ အကြိတ်အနယ် ယှဉ်ပြိုင်ကစားခဲ့ကြပြီး မြန်မာအသင်းအတွက် ဦးဆောင်ဂိုးကို ပွဲချိန် ၂၅ မိနစ်တွင် ကျောနံပါတ် ၁၀ ဇင်မိုးပြည့်က အဝေးကန်ချက်မှ လှလှပပသွင်းယူပေးခဲ့သည်။
မြန်မာအသင်းဦးဆောင်ဂိုးရပြီး မကြာခင်မှာပင် ပွဲချိန် ၂၈ မိနစ်တွင် တရုတ်(တိုင်ပေ)အသင်းက ထောင့်ကန်ဘောမှ တစ်ဆင့် ခေါင်းတိုက်ပြီး ချေပဂိုးပြန်လည်သွင်းယူနိုင်ခဲ့သဖြင့် ပထမပိုင်း အပြီးတွင် (၁-၁)ဂိုး ဖြင့် သရေကျနေခဲ့သည်။
ဒုတိယပိုင်းတွင် နှစ်သင်းစလုံး ဂိုးရရှိရေးကြိုးစားခဲ့ကြပြီး လူစားလဲမှုများ ပြုလုပ်ခဲ့သော်လည်း ဂိုးမရရှိသဖြင့် (၁-၁)ဂိုး သရေရလဒ်ဖြင့် ပွဲပြီးဆုံးသွားခဲ့သည်။
“အနိုင်ရအောင် ကစားမယ်ဆိုတဲ့ မျှော်လင့်ချက်နဲ့ ကစားခဲ့ပါတယ်။ ဦးဆောင်ဂိုး ရယူနိုင်ခဲ့ပေမယ့် အားနည်းချက်ကြောင့် ချေပဂိုး ပြန်ပေးလိုက်ရပါတယ်။ အသင်းမှာရှိတဲ့ အားနည်းချက်တွေကို ပြန်ပြင်ဆင်သွားပါမယ်။ ပြိုင်ပွဲက မပြီးသေးတာကြောင့် ခြေစစ်ပွဲအောင်ဖို့ ကြိုးစားသွားမှာဖြစ်ပါတယ်” ဟုပွဲအပြီး သတင်းစာ ရှင်းလင်းပွဲတွင် မြန်မာ ယူ – ၂၀ အမျိုးသမီးအသင်း နည်းပြချုပ် ဒေါ်စန်းစန်းသိန်းက ပြောသည်။
တရုတ် (တိုင်ပေ) ယူ-၂၀ အမျိုးသမီးအသင်း နည်းပြချုပ်ကီဗင်ကလည်း “ပွဲကောင်းတစ်ပွဲပါပဲ။ မြန်မာအသင်းဟာ တောင့်တင်းတဲ့အသင်းဖြစ်ပါတယ်။ ကျွန်တော်တို့ကလည်း အကောင်းဆုံး တုံ့ပြန်နိုင်ခဲ့ပါတယ်။ မြန်မာအသင်းနဲ့ လာမယ့် ပြိုင်ပွဲတွေမှာလည်း ထပ်ဆုံချင်ပါသေးတယ်။ ကျွန်တော်တို့ အသင်းကို ပိုကောင်းအောင် တည်ဆောက်သွားမှာ ဖြစ်ပါတယ်။ ခြေစစ်ပွဲအောင်ဖို့ နောက်ဆုံးပွဲစဉ်ကို အာရုံစိုက် ကစားသွားမှာဖြစ်ပါတယ်” ဟု ပြောကြားခဲ့သည်။
မြန်မာအသင်းသည် ဇွန် ၁၀ ရက်တွင် တရုတ်အသင်းနှင့် ယှဉ်ပြိုင် ကစားရမည်ဖြစ်ပြီး တရုတ် (တိုင်ပေ)အသင်းမှာ နီပေါအသင်းနှင့် ယှဉ်ပြိုင်ကစားရမည်ဖြစ်သည်။
၂၀၂၄ အာရှအမျိုးသမီး ယူ-၂၀ ပြိုင်ပွဲ ဒုတိယအဆင့် ခြေစစ်ပွဲ အုပ်စုနှစ်ခုမှ အုပ်စုပထမနှင့် ဒုတိယရသော အသင်းလေးသင်းမှာ ဥဇဘက်ကစ္စတန်၊ ဂျပန်၊ မြောက်ကိုရီးယား၊ တောင်ကိုရီးယား အသင်းတို့နှင့်အတူ ခြေစစ်ပွဲ အောင်မြင်မည်ဖြစ်သည်။
ဒုတိယအဆင့် ခြေစစ်ပွဲ အုပ်စု (A)တွင် အုပ်စုပထမရသော သြစတြေးလျနှင့် ဒုတိယရသော ဗီယက်နမ်တို့မှာ ခြေစစ်ပွဲ အောင်မြင်သွားပြီဖြစ်သည်။
၂၀၂၄ အာရှအမျိူးသမီး ယူ-၂၀ ပြိုင်ပွဲကို ဥဇဘတ်ကစ္စတန် နိုင်ငံက အိမ်ရှင်အဖြစ် လက်ခံကျင်းပမည်ဖြစ်ပြီး ပထမ၊ ဒုတိယနှင့် တတိယရသော အသင်းသုံးသင်းမှာ ၂၀၂၄ ဖီဖာ အမျိုးသမီး ယူ-၂၀ ကမ္ဘာ့ဖလား ခြေစစ်ပွဲ အောင်မြင်မည်ဖြစ်သည်။
