စီမံကိန်းနှင့် ဘဏ္ဍာရေးဝန်ကြီးဌာန၏ မြန်မာ့လယ်ယာဖွံဖြိုးရေးဘဏ်မှ တောင်သူတစ်ဦးလျင် အများဆုံးကျပ်သိန်း ၇၀၀ အထိချေးယူနိုင်သည့် စိုက်ပျိုးရေးနှင့်ကျေးလက်ဒေသဖွံဖြိုးရေး နှစ်ဆင့်ချေးငွေများကို ထုတ်ချေးပေးလျက်ရှိပြီး တောင်သူများအနေဖြင့် လျှောက်ထားနိုင်ကြောင်း သိရသည်။
အဆိုပါ ချေးငွေမှာ လယ်ယာလုပ်ငန်းသုံး ထွန်စက်ကြီး၊ ရိတ်သိမ်းခြွေလှေ့စက်၊ ထော်လာဂျီ၊ လက်တွန်းထွန်စက်၊ ဆန်စက်၊ ဆီစက်၊စားသောက်ကုန်ထုတ်လုပ်သည့် စက်များဝယ်ယူရန်နှင့် စက်ရုံ၊ သိုလှောင်ရုံ၊ ဂိုဒေါင်တည်ဆောက်/ပြုပြင်/မွမ်းမံခြင်းတို့အတွက် အရင်းအနှီးလိုအပ်သည့်တောင်သူများအား ထုတ်ချေးပေးခြင်း ဖြစ်သည်။
စိုက်ပျိုးရေးနှင့် ကျေးလက်ဒေသဖွံ့ဖြိုးရေး နှစ်ဆင့်ချေးငွေများအား (၁) နှစ်လျှင် အတိုးနှုန်း (၅)ရာခိုင်နှုန်းဖြင့် တောင်သူတစ်ဦးလျင် အများဆုံး ကျပ်သိန်း (၇၀၀)၊တောင်သူအစုအဖွဲ့ တစ်ဖွဲ့လျင်အများဆုံး ကျပ်သိန်း ၅၀၀၀ အထိ ထုတ်ချေးပေးနေခြင်းဖြစ်ကြောင်း သိရသည်။
ချေးငွေပြန်လည် ပေးဆပ်ရာတွင်လည်း ထော်လာဂျီ၊ လက်တွန်းထွန်စက် ချေးငွေအတွက် (၃) နှစ် (၃) ရစ်မှအပ ကျန်စက်ကိရိယာများအတွက် (၅) နှစ် (၅) ရစ်ပေး ဆပ်ရမည်ဖြစ်သည်။
ထို့ကြောင့် ချေးငွေရယူလိုသည့် တောင်သူများအနေဖြင့် နီးစပ်ရာ မြန်မာ့လယ်ယာဖွံ့ဖြိုးရေးဘဏ်၊ခရိုင်/မြို့နယ်ဘဏ်ခွဲများနှင့်ဆက်သွယ်၍ ချေးငွေအတွက် တင်သွင်းရမည့်အာမခံနှင့် ချေးငွေဆိုင်ရာ စည်းကမ်းသတ်မှတ်ချက်များကို စုံစမ်းမေးမြန်း၍ ချေးငွေလျှောက်ထားနိုင်ကြောင်း သိရသည်။
ထို့ပြင် ချေးငွေနှင့်ပတ်သက်၍ သိရှိလိုသည်များအား မြန်မာ့လယ်ယာဖွံ့ဖြိုးရေးဘဏ်(ရုံးချုပ်)၊အ မှတ်၂၆/၄၂၊ ပန်းဆိုးတန်းလမ်း၊ကျောက်တံတားမြို့နယ်၊ရန်ကုန်မြို့၊ဖုန်း- ၀၁၈၃၉၁၂၃၅ သို့ဆက်သွယ်မေးမြန်းနိုင်ကြောင်း သိရသည်။
