အနာဂတ်တွင် သက်ကြီးရွယ်အို လူဦးရေများပြားလာမည်ဖြစ်၍ လူမှုကာကွယ်စောင့်ရှောက်ရေးစနစ် အားကောင်းလာရန်လို
လက်ရှိ မြန်မာနိုင်ငံ လူဦးရေမှာ ၅၅ ဒသမ ၇ သန်းကျော်ရှိပြီး လာမည့် ၂၀၃၀ ပြည့်နှစ်တွင် ၅၉ ဒသမ ၃ သန်းကျော်ခန့်ရှိလာမည်ဟု ခန့်မှန်းထားကြောင်း ဇူလိုင် (၁၁) ရက်တွင် ကျရောက်ခဲ့သည့် ကမ္ဘာ့လူဦးရေနေ့ အခမ်းအနားမှ ရရှိသည့်အချက်အလက်အရ သိရသည်။
မြန်မာနိုင်ငံ၏ လူဦးရေဆိုင်ရာ ဖြစ်ပေါ်တိုးတက်ပြောင်းလဲမှုတွင် ၂၀၁၄ ခုနှစ် သန်းခေါင်စာရင်းအချက်အလက်များကို အခြေခံ၍ လူဦးရေ ခန့်မှန်းတွက်ချက်မှုအရ ၂၀၂ ၂ခုနှစ်၊ အောက်တိုဘာ (၁) ရက်တွင် မြန်မာနိုင်ငံ၏ လူဦးရေမှာ ၅၅ ဒသမ ၇ သန်းကျော်ရှိလာခဲ့ပြီး ၂၀၃၀ ပြည့်နှစ်တွင် ၅၉ ဒသမ ၃ သန်းကျော်ခန့်ရှိလာမည်ဟု ခန့်မှန်းတွက်ချက်ထားခြင်းဖြစ်သည်။
မြန်မာနိုင်ငံအနေဖြင့် လက်ရှိကာလသည် လူဦးရေဆုလာဘ်ကို ရရှိခံစားနေရချိန်ဖြစ်ပြီး အနာဂတ်တွင် သက်ကြီးရွယ်အို လူဦးရေများပြားလာမည်ဖြစ်၍ လူမှုကာကွယ်စောင့်ရှောက်ရေးစနစ် အားကောင်းလာစေရန်နှင့် သက်ကြီးရွယ်အိုများ သင့်တင့်လျောက်ပတ်သည့် အလုပ်အကိုင်အခွင့်အလမ်းများ ဖန်တီးပေးနိုင်ရေးကိုလည်း နိုင်ငံအနေဖြင့် ကြိုတင်ပြင်ဆင်ဆောင်ရွက်ထားရန်လိုအပ်ကြောင်းလည်း သိရသည်။
ကုလသမဂ္ဂ ကိန်းဂဏန်းအချက်အလက်များအရ ကမ္ဘာလုံးဆိုင်ရာ လူဦးရေတိုးပွားမှုမှာ ဆက်လက်မြင့်တက်လျက်ရှိကာ လက်ရှိတွင် အိန္ဒိယနိုင်ငံသည် ကမ္ဘာ့လူဦးရေစာရင်း၌ ထိပ်ဆုံးတွင် ရှိနေကြောင်း သိရသည်။
အိန္ဒိယနိုင်ငံသည် ယခုနှစ်အစောပိုင်းကာလတွင် ကမ္ဘာ့လူဦးရေအများဆုံး တရုတ်နိုင်ငံကို ကျော်တက်သွားခဲ့ပြီး လက်ရှိ အိန္ဒိယနိုင်ငံ၏ လူဦးရေမှာ ၁ ဒသမ ၄ ဘီလျံရှိမည်ဟု ကုလသမဂ္ဂလူဦးရေရန်ပုံငွေအဖွဲ့က ခန့်မှန်းတွက်ချက်ထားသည်။
အခြားသော လူဦးရေအများဆုံးနိုင်ငံများတွင် လူဦးရေ (၁) ဘီလျံကျော်ရှိသော တရုတ်နိုင်ငံ၊ သန်း ၃၄၀ ရှိသော အမေရိကန်၊ ၂၇၇ ဒသမ ၅ သန်းရှိသော အင်ဒိုနီးရှားနှင့် ၂၄၀ ဒသမ ၅ သန်းရှိသော ပါကစ္စတန်နိုင်ငံတို့ ပါဝင်ပြီး ယခုအခါ ကမ္ဘာပေါ်ရှိ လူဦးရေစုစုပေါင်းမှာ ရှစ်ဘီလျံကျော်လွန်လာမည်ဖြစ်ကြောင်း ခန့်မှန်းကြသည်။
ထို့အပြင် လာမည့် ၂၀၈၀ ပြည့်နှစ်များတွင် ကမ္ဘာ့လူဦးရေမှာ ၁၀ ဒသမ ၄ ဘီလျံနီးပါးအထိ အမြင့်ဆုံးသို့ ရောက်ရှိလာနိုင်ခြေရှိကြောင်းလည်း ကုလသမဂ္ဂ ကမ္ဘာ့လူဦးရေအဖွဲ့က ခန့်မှန်းတွက်ချက်ထားသည်။
