ပြီးခဲ့သည့် ကော်ဖီရာသီချိန်အတွင်း မြန်မာ့ကော်ဖီသီးနှံအထွက်နှုန်း၏ (၇၅) ရာခိုင်နှုန်းကို ထိုင်းနိုင်ငံသို့ တင်ပို့ရောင်းချနိုင်ခဲ့ကြောင်း မြန်မာနိုင်ငံကော်ဖီအသင်းမှ သိရသည်။
ယင်းသို့ ထိုင်းနိုင်ငံထံ တင်ပို့ရောင်းချရာတွင် ကော်ဖီတစ်တန်လျှင် ကျပ်သိန်း (၁၅၀) မှ (၁၇၀) ခန့်အထိ ဈေးကောင်းရရှိခဲ့ကြောင်း သိရသည်။
“ အများဆုံးကတော့ ထိုင်းနိုင်ငံကိုပဲ။ (၇၅) ရာခိုင်နှုန်းလောက် တင်ပို့နိုင်ခဲ့ပါတယ်။ ကုန်ကြမ်း အသီးစိမ်းအနေနဲ့ တင်ပို့ခဲ့တာပါ ” ဟု မြန်မာနိုင်ငံကော်ဖီအသင်းမှ တာဝန်ရှိသူတစ်ဦးက ပြောသည်။
ကော်ဖီရာသီချိန်အစတွင် ထိုင်းနိုင်ငံဝယ်လက်များက ဒေသအရောက် ဝယ်ယူထုတ်လုပ်နေခြင်းကြောင့် ပြီးခဲ့သည့် ၂၀၂၂ ခုနှစ်ကထက် သုံးဆခန့် ဈေးနှုန်း ပိုမိုရရှိခဲ့ကြောင်း သိရသည်။
ပုံမှန်ကော်ဖီရာသီများတွင် ပျမ်းမျှကော်ဖီတန်ချိန် ၁၀,ဝ၀ဝ ကျော်ခန့် ထွက်ရှိခဲ့သော်လည်း ပြီးခဲ့သည့် ကော်ဖီရာသီချိန်က ရာသီဥတုမှာ ပန်းပွင့်ချိန် စောသည့်အပြင် ပုံမှန်ထက် မိုးပိုမိုရွာသွန်းခဲ့ခြင်းကြောင့် အထွက်နှုန်းလေးပုံတစ်ပုံခန့်အထိ ကျဆင်းခဲ့ကာကော်ဖီရာသီချိန်ကို စောစီးစွာ သိမ်းခဲ့ရကြောင်း သိရသည်။
ပြည်တွင်း၌ ကော်ဖီသီးနှံကို ဒီဇင်ဘာလမှ မတ်လအတွင်း ခူးဆွတ်ထုတ်လုပ်ပြီး ကော်ဖီရာသီသိမ်းသည့် ဧပြီလ နှင့် မေလနှောင်းပိုင်းမှ စတင်ကာ ထိုင်းနိုင်ငံအပါအဝင် ပြည်ပနိုင်ငံများသို့ ကော်ဖီအစေ့များအဖြစ် တင်ပို့ရောင်းချကြကြောင်း သိရသည်။
မြန်မာနိုင်ငံတွင် ကော်ဖီကို မန္တလေးတိုင်းဒေသကြီး ပြင်ဦးလွင်မြို့နှင့် ရှမ်းပြည်နယ်တို့တွင် အများဆုံး စိုက်ပျိုးပြီး အခြားတိုင်းဒေသကြီးနှင့် ပြည်နယ်အချို့တွင်လည်း အနည်းငယ် စိုက်ပျိုးကာ တစ်နိုင်ငံလုံး အတိုင်းအတာဖြင့် ကော်ဖီစိုက်ဧက ၅၀,ဝ၀ဝ ကျော်ရှိကြောင်း သိရသည်။
Photo crd-စားသုံးသူကာကွယ်ရေးဦးစီးဌာန
