ငွေစက္ကူအသစ် ကျပ် (၂၀၀၀၀) တန်သည် အလုံးအရင်းဖြင့် ထုတ်မည့် ပိုက်ဆံမဟုတ်ဘဲ အထိမ်းအမှတ်အနေဖြင့်ထုတ်သော ငွေစက္ကူဖြစ်သည့်အတွက် ဈေးကွက်အတွင်းအလုံးအရင်းဖြင့် ဝင်ရောက်လာမည်မဟုတ်ကြောင်း နစက သတင်းထုတ်ပြန်ရေး အဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောသည်။
(၂၀၀၀၀) တန် ငွေစက္ကူအသစ် ရိုက်နှိပ်ထုတ်ဝေမည်ဟု ဇူလိုင်လ (၂၃) ရက်တွင် ဗဟိုဘဏ်မှ အသိပေးထုတ်ပြန်ပြီးနောက် ဖြစ်ပေါ်လာသည့် ကောလာဟလသတင်းများနှင့် ပတ်သက်၍ ၎င်းက ပြန်လည်ရှင်းလင်းခြင်း ဖြစ်သည်။
“မြန်မာနိုင်ငံမှာ ငွေစက္ကူကို အထိမ်းအမှတ်အနေနဲ့ ထုတ်လုပ်ခဲ့တာမရှိပါဘူး။ ဒါပေမဲ့ (၇၅)နှစ်ပြည့် စိန်ရတုလွတ်လပ်ရေးနေ့ အထိမ်းအမှတ်အနေနဲ့ ရွှေဒင်္ဂါးပြားတွေ ထုတ်ဝေခဲ့တာရှိပါတယ်။ အဲဒီအချိန်တုန်းကလည်း သတ်မှတ်ထားတဲ့ ငွေကြေးပမာဏပေးပြီး ဝယ်လို့ရတယ်ဆိုပေမယ့် များများစားစား ဝယ်လို့ရတာ မဟုတ်ပါဘူး။ အခုကိစ္စမှာလည်း ဒီလိုပဲ အတူတူပါပဲ” ဟု ဗိုလ်ချုပ်ဇော်မင်းထွန်းက ပြောသည်။
ထို့ပြင် ဗဟိုဘဏ်၏ ထုတ်ပြန်ချက်အတွင်းပါသည့် ငွေစက္ကူ ကျပ် (၂၀၀၀၀) တန်အသစ်သည် အ ထိမ်းအမှတ်အနေဖြင့်ထုတ်ဝေသည့် ငွေစက္ကူဖြစ်၍ ယင်းပိုက်ဆံနှင့် တန်ဖိုးတူညီသော ငွေပမာဏကို ဘဏ်၌သွင်းပြီးမှသာ ငွေစက္ကူကျပ် (၂၀၀၀၀) တန်အသစ်ကို ထုတ်ပေးမည်ဖြစ်ပြီး ထုတ်ပေးရာတွင်လည်း အကန့်အသတ်ဖြင့်သာ ထုတ်ပေးမည်ဟု ပြောကြားသည်။
“ဘဏ်ကိုသွားပြီး အခုထုတ်လိုက်တဲ့ ငွေစက္ကူကျပ် (၂၀၀၀၀) တန်အသစ် သိန်းတစ်ရာလိုချင်လို့ဆိုပြီး ကိုယ့်ရဲ့ငွေစက္ကူအဟောင်း သိန်းတစ်ရာနဲ့ သွားပြီးလဲရင်လည်းသိန်းတစ်ရာ ထုတ်မပေးနိုင်ပါဘူး။ တစ်ဦးကို (၃) ရွက်ပဲ ထုတ်ပေးမှာပါ။ အဲဒီ (၃) ရွက်ကိုလည်း အလကားထုတ်ပေးမှာ မဟုတ်ပါဘူး။ မြန်မာစကားပုံနဲ့ အားလုံးနားလည်အောင် လွယ်လွယ်ပြောရမယ်ဆိုရင် ဆန်ပေးမှ ဆီရမယ်လို့ပဲ ပြောရမှာဖြစ်ပါတယ်” ဟု ဗိုလ်ချုပ်ဇော်မင်းထွန်းကပြော သည်။
ယင်း ငွေစက္ကူများကိုလည်း ငွေစက္ကူအဟောင်းနှင့် လဲလှယ်နိုင်ရန် လုပ်ဆောင်ခြင်းသာဖြစ်ပြီး လာရောက်လဲလှယ်သည့် ငွေစက္ကူအဟောင်းများကို ဗဟိုဘဏ်မှ အကုန်လုံးဖျက်ဆီးပစ်လိုက်မည်ဖြစ်၍ ငွေရေးကြေးရေးဈေးကွက်အတွင်းသို့ ငွေစက္ကူ ကျပ် (၂၀၀၀၀) တန်အသစ်များ အလုံးအရင်းဖြင့် ဝင်ရောက်လာမည်ဆိုခြင်းမှာ လုံးဝမဖြစ်နိုင်ကြောင်း အာမခံသည်ဟု ၎င်းက ဆက်လက် ပြောကြားသည်။
“ကျွန်တော်တို့ အစိုးရအနေနဲ့ ဖွဲ့စည်းပုံအခြေခံဥပဒေ (၂၀၀၈) ကို လက်ခံထားတဲ့ အစိုးရဖြစ်တယ်။ ဖွဲ့စည်းပုံအခြေခံဥပဒေ (၂၀၀၈) ပုဒ်မ ၃၆(ဃ)မှာပါတဲ့ စီးပွားရေးဆိုင်ရာလုပ်ငန်းတွေကို နိုင်ငံပိုင်သိမ်းယူခြင်းမပြုဆိုတဲ့အချက်နဲ့ ပုဒ်မ ၃၆(စ)မှာပါတဲ့ တရားဝင်ထုတ်ဝေထားတဲ့ ငွေကြေးကို တရားမဝင်ငွေကြေးအဖြစ် သတ်မှတ်ခြင်းမပြုဆိုတဲ့ အချက်တွေနဲ့ အာမခံပြီးဖြစ်တယ်” ဟု ဗိုလ်ချုပ်ဇော်မင်းထွန်းက ပြောသည်။
ယခင် တရားဝင်ထုတ်ဝေထားပြီး တရားဝင်အသုံးပြုနေသည့်ငွေကြေးများကို တရားမဝင်ငွေကြေးအဖြစ် မည်သည့်အခါမှ သတ်မှတ်မည်မဟုတ်ဘဲ အစိုးရအနေဖြင့်လည်း စီးပွားရေးလုပ်ငန်းများနှင့် ပတ်သက်၍ ကောင်းစွာထိန်းသိမ်းနိုင်သော အခြေအနေတွင်ရှိကြောင်းလည်း ၎င်းက ဆိုသည်။
ထို့ကြောင့် ပြည်သူလူထုအနေဖြင့် မိမိတို့၏ လူမှုစီးပွားဘဝဖွံ့ဖြိုးတိုးတက်ရေးလုပ်ငန်းများကို ယုံကြည်စိတ်ချစွာ လုပ်ကိုင်ကြရန် မိမိတို့အနေဖြင့် အာမခံသည်ဟုလည်း ဗိုလ်ချုပ်ဇော်မင်းထွန်းက ပြောကြားခဲ့သည်။
Photo – The Asian Age
