ကျန်းမာရေးဝန်ကြီးဌာန အထူးကု ဆေးကုသရေးအဖွဲ့သည် ရှမ်းပြည်နယ် တောင်ပိုင်း ၊ တောင်ကြီးမြို့တွင်ကွင်းဆင်းဆေးကုသမူများ လုပ်ဆောင်ပေးခဲ့ရာ သြဂုတ် (၅) ရက်နှင့် (၆) ရက်တွင် မြို့နယ်အသီးသီးမှ ပြည်သူ (၅၄၉) ဦးလာရောက်ပြသခဲ့ကြောင်း သိရသည်။
အဆိုပါ လာရောက်ပြသသူများအား ရန်ကုန်မြို့ရှိ မြောက်ဥက္ကလာပ ပြည်သူ့ဆေးရုံကြီးနှင့် သင်္ဃန်းကျွန်းပြည်သူ့ဆေးရုံကြီးတို့မှ နှလုံးရောဂါဆေးပညာ၊ အစာအိမ်နှင့်အူလမ်းကြောင်းဆေးပညာ၊ ဦးနှောက်နှင့် အာရုံကြော ဆေးပညာ၊ ဦးနှောက်နှင့် အာရုံကြော ခွဲစိတ်ပညာ၊ ဆီးချိုနှင့် ဟော်မုန်းဆေးပညာ၊ သွေးရောဂါ ပညာရပ်ဆိုင်ရာ ပါမောက္ခ/အထူးကု ဆရာဝန်ကြီးများ၊ စဝ်စံထွန်းပြည်သူ့ဆေးရုံကြီးနှင့် အမျိုးသမီးနှင့် ကလေးအထူးကု ဆေးရုံကြီး(တောင်ကြီးမြို့)တို့မှ ပါမောက္ခ/အထူးကု ဆရာဝန်ကြီးများက စမ်းသပ်စစ်ဆေးကုသပေးခဲ့ကြကြောင်း သိရသည်။
လာရောက်ပြသသူများထဲတွင် နှလုံးရောဂါဆိုင်ရာ (၈၁) ဦး၊ အစာအိမ်နှင့် အူလမ်း ကြောင်းဆိုင်ရာ (၄၇) ဦး၊ ဦး နှောက်နှင့် အာရုံကြော ဆေးကုသမှုဆိုင်ရာ (၇၃) ဦး၊ ဦး နှောက်နှင့် အာရုံကြော ခွဲစိတ်ကုသမှုဆိုင်ရာ (၆) ဦး၊ ဆီးချိုနှင့် ဟော်မုန်းဆိုင်ရာ (၁၃၂) ဦး၊ သွေးရောဂါဆိုင်ရာ (၂၇) ဦး၊ အထွေထွေရောဂါဆိုင်ရာ (၁၀၂) ဦး၊ မျက်စိရောဂါလူနာ (၆) ဦး၊ သားဖွားမီးယပ်လူနာ (၄) ဦး၊ အရိုးရောဂါလူနာ (၂၆) ဦး၊ ခွဲစိတ် (၂၉) ဦး၊ နား၊ နှာခေါင်း၊ လည်ချောင်းလူနာ (၃) ဦး၊ သွားနှင့်ခံတွင်းလူနာ (၁) ဦး၊ အရေပြားလူနာ (၄) ဦး၊ ကလေးလူနာ (၈) ဦးစုစုပေါင်းလူနာ (၅၄၉) ဦးတို့ ပါဝင်ကြောင်းလည်း သိရသည်။
အဆိုပါ လူနာများအနက် နှလုံးပုံရိပ်ဖော်စက်ဖြင့် ကြည့်ရှုခြင်း (၄၃) ဦး၊ အစာအိမ်နှင့်အူလမ်းကြောင်းမှန်ပြောင်းကြည့်ရှုခြင်း (၁၀) ဦး၊ အူမကြီးမှန်ပြောင်းကြည့်ရှုခြင်း (၂) ဦး၊ ကွန်ပျူတာဓာတ်မှန်ဖြင့်စစ်ဆေးခြင်း (၁) ဦး၊ ဓာတ်မှန်ဖြင့်ရောဂါရှာဖွေခြင်း (၁၀၃) ဦး၊ ဓာတ်ခွဲစမ်းသပ်သူ (၂၃၉) ဦး၊ သွေးချိုဓာတ်တိုင်းတာခြင်း (၁၁၅) ဦး၊ Ultrasound ရိုက်ကူးခြင်း (၇၄) ဦး၊နှလုံးစက်ဖြင့်စစ်ဆေး ခြင်း (၃၀) ဦး၊ ဆီးချိုကြောင့်မျက်စိထိခိုက်မှု ရှိ/မရှိစစ်ဆေးခြင်း (၂၀)ဦး၊ဆီးချိုကြောင့် ခြေထောက်အာရုံကြော ထိခိုက်မှု ရှိ/မရှိစစ်ဆေးခြင်း (၂၀) ဦး တို့ကို စမ်းသပ်စစ် ဆေးပေးခဲ့ကြောင်း သိရသည်။
ထို့ပြင် ဦးနှောက်နှင့် အာရုံကြောဆေးကုသမှု ဆက်လက်ခံယူရန်လိုအပ်သည့် လူနာ (၁) ဦးကို ဦးနှောက်နှင့် အာရုံကြောဆေးကုဌာန၊ ရန်ကုန် ပြည်သူ့ဆေးရုံကြီး၊ နှလုံးရောဂါ ဆက်လက်ဆေးကုသရန် လိုအပ်သည့် လူနာ(၁)ဦးကို မြောက်ဥက္ကလာပ ပြည်သူ့ဆေးရုံကြီးနှင့် နှလုံးရောဂါခွဲစိတ်ရန်လိုအပ်သည့် လူနာ (၁) ဦးကို ရန်ကုန်ပြည်သူ့ဆေးရုံကြီးတို့သို့ လွှဲပြောင်းကုသနိုင်ရန် စီစဥ်ပေးခဲ့ကြကြောင်းလည်း သိရသည်။
