ပဲခူးတိုင်းဒေသကြီး၊ ဝေါမြို့တွင် Express ကားပေါ်မှ ငွေကျပ် ၄၃၈၇.၅ သိန်းတန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိကြောင်း ရဲတပ်ဖွဲ့ထံမှ သိရသည်။
မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါ၀င်သော ပူးပေါင်းအဖွဲ့သည် သြဂုတ်လ (၆) ရက်ည (၉) နာရီခွဲ မိနစ်အချိန်တွင် သက်သေများနှင့်အတူ ဝေါမြို့နယ်၊ X-Ray (ညောင်ခါးရှည်) ၌ X-Ray စက်ဖြင့် တားဆီးနှိမ်နင်းရေး လုပ်ငန်းများဆောင်ရွက်စဉ် ဖမ်းဆီးရမိခဲ့ခြင်းဖြစ်ကြောင်း သိရသည်။
တောင်ကြီးမြို့ဘက်မှ မြ၀တီမြို့ဘက်သို့ ကောင်းမြတ်သော် မောင်းနှင်ပြီး ငြိမ်းချမ်း နှင့် ကျော်ဇောဟိန်း(ခ) ကျော်ကြီး တို့လိုက်ပါလာသည့် Express ခရီးသည်တင်မော်တော်ယာဉ်အား စစ်ဆေးရှာဖွေရာ ယာဉ်ပေါ်တွင် သိုဝှက်သယ်ဆောင်လာသော စိတ်ကြွရူးသွပ်ဆေးပြား ၂၉၂၅၀၀ ပြား (ဒေသကာလပေါက်ဈေး တန်ဖိုး ငွေကျပ် ၄၃၈၇.၅ သိန်း) နှင့် လက်ကိုင်ဖုန်း (၁) လုံးတို့အား တွေ့ရှိသိမ်းဆည်းရမိခဲ့ခြင်း ဖြစ်ကြောင်းလည်း သိရသည်။
ကွင်းဆက်ဖော်ထုတ်ချက်အရ သြဂုတ်လ (၇) ရက် ည (၁၁) နာရီအချိန်တွင် အဆိုပါ စိတ်ကြွရူးသွပ်ဆေးပြားများ သယ်ဆောင်ရာတွင် ပူးပေါင်းပါ၀င်သူ အောင်အောင်အား တောင်ကြီးမြို့၊ ရပ်ကွက်(၃)၊ ပိတောက်လမ်းရှိ ကားဂိတ်တွင် ထပ်မံဖမ်းဆီးရမိခဲ့ကြောင်း သိရသည်။
ထို့ကြောင့် ကောင်းမြတ်သော်(၃၃)နှစ်၊ ကျော်ဇောဟိန်း (ခ)ကျော်ကြီး(၂၇)နှစ်၊ ငြိမ်းချမ်း(၂၆)နှစ် နှင့် အောင်အောင်(၅၃)နှစ် တို့အား ဝေါမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုဖွင့် အရေးယူထားရှိပြီး ကွင်းဆက်များ ဖော်ထုတ်လျက် ရှိကြောင်း သိရသည်။
Photo – CCDAC
