ဆိုးလ်၊ဩဂုတ် ၁၈
အမေရိကန်ကင်းထောက်လေယာဉ်တစ်စင်းသည် ၎င်း၏အရှေ့ဘက်ကမ်းရိုးတန်းရှိ စီးပွားရေးဇုန်အတွင်းသို့ ကျူးကျော်ဝင်ရောက်လာသဖြင့် စစ်လေယာဉ်များ အရေးပေါ်ပျံတက်သတိပေးခဲ့ရကြောင်း မြောက်ကိုရီးယားစစ်တပ်ကပြောကြားခဲ့သည်ဟု နိုင်ငံပိုင်သတင်းအေဂျင်စီ KCNA ကဖော်ပြခဲ့သည်။
ကြာသပတေးနေ့ကဖြစ်ပွားခဲ့သည့် အဆိုပါဖြစ်ရပ်သည် အန္တရာယ်ရှိသောစစ်ရေးရန်စမှုတစ်ခုဖြစ်ပြီး မြောက်ကိုရီးယားသည် အနာဂတ်ကျုးကျော်မှုများအား ဟန့်တားနိုင်သည့်အစီအမံများကိုစဉ်းစားနေကြောင်း ကိုရီးယားပြည်သူ့တပ်မတော်စစ်ဦးစီး အရာရှိချုပ်၏ပြောရေးဆိုခွင့်ရှိသူက အစီရင်ခံစာတွင် ဖော်ပြထားသည်။
ယခုဖြစ်ရပ်သည် အမေရိက၊တောင်ကိုရီးယားနှင့်ဂျပန်တို့၏သောကြာနေ့ကပြုလုပ်သည့် ထိပ်သီးဆွေးနွေးပွဲမတိုင်ခင်က ဖြစ်ပွားခဲ့ခြင်းဖြစ်ကာ မြောက်ကိုရီးယားအနေဖြင့် ဆွေးနွေးပွဲကိုကန့်ကွက်ရန်အတွက် တိုက်ချင်းပစ်ဒုံးကျည်ပစ်လွှတ်ခြင်းနှင့်အခြားသောစစ်ရေးအရအရေးယူမှုများပြုလုပ်နိုင်ကြောင်း တောင်ကိုရီးယားလွှတ်တော်အမတ်တစ်ဦးကကြာသပတေးနေ့တွင်ပြောကြားခဲ့သည်။
မြောက်ကိုရီးယား၏ နျူကလီးယားခြိမ်းခြောက်မှုနှင့် တရုတ်၏ ဒေသတွင်းသြဇာလွှမ်းမိုးမှုကြီးထွားလာချိန်တွင် ဆိုးလ်နှင့်တိုကျိုကြားဆက်ဆံရေးနီးကပ်ရန်မျှော်လင့်လျက် ကန်သမ္မတဂျိုးဘိုင်ဒင်သည် မေရီလန်းရှိ Camp David ၌ တောင်ကိုရီးယားသမ္မတယွန်းဆော့ယော်အပါအဝင် ဂျပန်ဝန်ကြီးချုပ်ဖူမီရိုကီရှီဒါတို့နှင့်ပါတွေ့ဆုံမည်ဖြစ်သည်။
ထို့ပြင် တောင်ကိုရီးယားနှင့်အမေရိကတို့သည် တနင်္လာနေ့မှစ၍ ၁၁ ရက်ကြာ ပူးတွဲစစ်ရေးလေ့ကျင့်မှုများလည်းစတင်မည်ဖြစ်ကြောင်းသိရသည်။
Source : Reuters
