ဆိုးလ်၊ဩဂုတ် ၂၆
ဖူကူရှီးမားနျူဓာတ်အားပေးစက်ရုံမှ သန့်စင်ထားသောရေဒီယိုသတ္တိကြွရေကို ဂျပန်နိုင်ငံကစွန့်ထုတ်သည့်အတွက် အဏ္ဏဝါရေဒီယိုသတ္တိကြွမှုအန္တရာယ်ရှိလာရာ ၄င်းကိုရှောင်ရှားနိုင်ရန်အတွက် အစိုးရအနေဖြင့် အရှိန်အဟုန်မြှင့်၍ လုပ်ဆောင်ပေးရန် သြဂုတ် ၂၆ ရက်တွင် တောင်ကိုရီးယားမြို့တော်၌စုဝေးဆန္ဒပြခဲ့ကြကြောင်းသိရသည်။
ဖူကူရှီးမားနျူစက်ရုံမှရေများအားဂျပန်အစိုးရက ကြာသပတေးနေ့ကစတင်စွန့်ထုတ်ခဲ့သဖြင့် ပြည်တွင်းပြည်ပငါးဖမ်းလုပ်ငန်းရှင်များနှင့်သဘာဝပတ်ဝန်းကျင်ထိန်းသိမ်းသူများက ဆန္ဒထုတ်ဖော်မှုများပြုလုပ်ခဲ့ကြသည်။
“ပင်လယ်စာထဲမှာ ချက်ချင်းဆိုသလိုမျိုးတော့ ရေဒီယိုသတ္တိကြွဘေးအန္တရာယ်ကိုမြင်ရမှာမဟုတ်ပါဘူး၊ ဒါပေမယ့် အချိန်ကြာလာတာနဲ့အမျှဒီလိုရေဆိုးစွန့်ထုတ်မှုကနေ ဒေသခံငါးဖမ်းလုပ်ငန်းကို အန္တရာယ်ဖြစ်စေနိုင်တာမို့ အစိုးရအနေနဲ့ ဖြေရှင်းချက်ပေးဖို့လိုအပ်ပါတယ်” ဟု Korea Radiation Watch အဖွဲ့မှ Choi Kyoungsook က ပြောကြားခဲ့ပြီးယခုဆန္ဒထုတ်ဖော်ပွဲအား လူပေါင်း ၅၀,၀၀၀ ကျော်ပါဝင်ခဲ့ကြောင်းလည်းသိရသည်။
သို့သော်ဂျပန်ငါးဖမ်းအေဂျင်စီကမူ ၎င်းတို့အနေဖြင့်စနေနေ့တွင် စက်ရုံအနီးရေပြင်မှငါးများကိုစမ်းသပ်ခဲ့ရာ ထရီထီယမ်မပါဝင်သည်ကိုတွေ့ခဲ့ရသည်ဟုဆိုခဲ့ကြောင်း ကျိုဒိုသတင်းဌာနကဖော်ပြခဲ့သည်။
ယခုရေထုတ်လွှတ်မှု၌ သိပ္ပံနည်းကျသည့်ပြဿနာမရှိဟု ဆိုသော်ငြားလည်း ဖြစ်နိုင်ခြေရှိသည့်သက်ရောက်မှုအားလုံးကိုမလေ့လာရသေးဟု သဘာဝပတ်ဝန်းကျင်လှုပ်ရှားသူများကလည်း စောဒကတက်ခဲ့ကြသည်။
“ဒီရေဆိုးတွေက နောက်နှစ် ၁၀၀ မှာ အဏ္ဏဝါစနစ်ကိုဘယ်လိုထိခိုက်စေမယ်ဆိုတာ ဘယ်သူမှမပြောနိုင်ပါဘူး” ဟုလည်း မစ္စတာ Choi ကဆက်လက်ပြောကြားခဲ့သည်။
ဂျပန်ကမူ ဖူကူရှီးမား၌သိုလှောင်ထားသောရေများသည် ခံနိုင်ဝန်ပမာဏသို့ရောက်လုနီးပြီဖြစ်ရာ အချိန်မှီမစွန့်ထုတ်ပါက ယိုစိမ့်မှုဖြစ်လျှင်ထိန်းချုပ်ရပိုခက်ခဲနိုင်သဖြင့် ယခုကဲ့သို့ပြုလုပ်ရခြင်းဖြစ်သည်ဟုဆိုသည်။
Source : Reuters
