မြန်မာတစ်နိုင်ငံလုံးအတွက် အေအာတီဆေးနှင့် ဆေးပစ္စည်းများဝယ်ယူရန် နိုင်ငံတော် အစိုးရမှ ရန်ပုံငွေများ နှစ်စဉ်တိုးမြှင့်ချထားပေးလျက်ရှိရာ ၂၀၂၂-၂၀၂၃ ဘဏ္ဍာနှစ်အတွက် ART ဆေးနှင့် ဆေးပစ္စည်းများ ဝယ်ယူရန် အမေရိကန် ဒေါ်လာ ၁၆ သန်း အသုံးပြုထားကြောင်း ကျန်းမာရေးဝန်ကြီးဌာန ပြည်ထောင်စုဝန်ကြီး ပါမောက္ခ ဒေါက်တာ သက်ခိုင်ဝင်းက ပြောသည်။
ခုခံကျ/ကာလသား ရောဂါတိုက်ဖျက်ရေးစီမံချက်၏ နှစ်ပတ်လည်လုပ်ငန်း ဆန်းစစ်ဆွေးနွေးပွဲ ၂၀၂၂ ဖွင့်ပွဲ အခမ်းအနားကို သြဂုတ် (၃၁) ရက် နံနက်ပိုင်းက ကျန်းမာရေးဝန်ကြီးဌာန၌ ကျင်းပရာကျန်းမာရေး ဝန်ကြီးဌာန ပြည်ထောင်စုဝန်ကြီး ပါမောက္ခ ဒေါက်တာ သက်ခိုင်ဝင်း တက်ရောက် အမှာစကားပြောကြားရာ၌ ထည့်သွင်းပြောဆိုခဲ့ခြင်းဖြစ်သည်။
၂၀၃၀ ပြည့်နှစ်တွင် HIV ပိုး ကူးစက်မှု ကင်းဝေးသည့် လူ့အဖွဲအစည်း တစ်ရပ် ပေါ်ထွက်လာစေရန် ရည်ရွယ်ပြီး ခုခံအားကျဆင်းမှု ကူးစက်ရောဂါဆိုင်ရာ အမျိုးသားမဟာ ဗျူဟာစီမံကိန်း ၂၀၂၁-၂၀၂၅ တွင်ပါရှိသည့် ဦးစားပေးနည်းဗျူဟာ (၅)ရပ်နှင့်အညီ အိပ်ခ်ျအိုင်ဗွီ/ အေအိုင်ဒီအက်စ်ရောဂါကာကွယ်ရေးနှင့် ပြုစုကုသစောင့်ရှောက်ရေး လုပ်ငန်းများကို ဆောင်ရွက်လျက်ရှိကြောင်း ပြည်ထောင်စုဝန်ကြီးက ဆိုသည်။
၂၀၂၂ ခုနှစ်တွင် ခုခံကျ/ ကာလသားရောဂါတိုက်ဖျက်ရေး စီမံချက်အနေဖြင့် အေအာတီဆေးကုဌာန ၁၄၁ ခုနှင့် အေအာတီဆင့်ပွားကုဌာန ၃၁၀ တို့၌ အိပ်ခ်ျအိုင်ဗွီပိုးရှိ လူနာပေါင်း ၂၀၈,၀၀၀ ကျော်ကို အေအာတီ ဆေးဝါးနှင့် အခမဲ့ ကုသပေးခဲ့ကြောင်း၊ ကိုယ်ဝန်ဆောင်မိခင် ၅ သိန်းကျော်ကို အိပ်ချ်အိုင်ဗွီနှင့် ဆစ်ဖလစ်ရှိ/မရှိ စစ်ဆေးပေးခဲ့ကြောင်း၊ မူးယစ်ဆေး အကြောထဲထိုးသွင်းသူများအတွက် မူးယစ်ဆေးအစားထိုး မက်သာဒုန်းဆေးဖြင့် ကုသပေးခဲ့ကြောင်း သိရသည်။
၂၀၂၂ ခုနှစ်အကုန်အထိ ရရှိသော စာရင်းဇယားများအရ မူးယစ်ဆေးအကြောထဲထိုးသွင်းသူ ၂၆,၀၀၀ ခန့်ကို မက်သာဒုန်းဆေးကုဌာန ၉၀ တွင် မက်သာဒုန်းဆေး တိုက်ကျွေးလျက်ရှိကြောင်း ကျန်းမာရေးဝန်ကြီးဌာနမှ သိရသည်။
အဆိုပါ ဆန်းစစ်ဆွေးနွေးပွဲသို့ ကျန်းမာရေးဝန်ကြီးဌာန ဒုတိယဝန်ကြီး၊ ဌာနဆိုင်ရာအကြီးအကဲများ၊ တိုင်းဒေသကြီး/ ပြည်နယ်ပြည်သူ့ကျန်းမာရေး ဦးစီးဌာနမှူးများ၊ ပါမောက္ခ/ ဌာနမှူးများ၊ ညွှန်ကြားရေးမှူးများ၊ ဆေးရုံအုပ်ကြီးများ၊ အထူးကုဆရာဝန်ကြီးများ၊ ကာကွယ်ရေးဝန်ကြီးဌာန၊ ကျန်းမာရေးနှင့် ရောဂါနှိမ်နင်းရေး တပ်နှင့် ပြည်ထဲရေးဝန်ကြီးဌာန၊ အကျဉ်းဦးစီးဌာနတို့မှ ဖိတ်ကြားထားသူများ၊ ခုခံကျ/ ကာလသား ရောဂါတိုက်ဖျက်ရေးဌာန တာဝန်ခံများ၊ WHO၊ UNAIDS၊ UNICEF၊ UNOPS အဖွဲ့တို့နှင့် မိတ်ဖက်အဖွဲအစည်းများမှ ကိုယ်စားလှယ်များ တက်ရောက်ခဲ့ကြောင်း သိရသည်။
