ရှမ်းပြည်နယ်၊ကျိုင်းတုံမြို့၊ရပ်ကွက်(၃)တွင် ဆိုင်ကယ် ၃ စီးပေါ်မှ ငွေကျပ်သိန်း ၁၂၀၀ တန်ဖိုးရှိ စိတ်ကြွဆေးပြား ၃ သိန်းအား စက်တင်ဘာ ၉ ရက်မွန်းတည့်ပိုင်းကဖမ်းဆီးရမိခဲ့ကြောင်း ရဲတပ်ဖွဲ့မှသိရသည်။
ယမန်နေ့မွန်းတည့် ၁၂ နာရီခွဲခန့်က မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ဝင်များပါဝင်သော ပူးပေါင်းအဖွဲ့သည် ကျိုင်းတုံမြို့၊ရပ်ကွက်(၃) တွင် ကာဗေလှ(၂၇)နှစ်မောင်းကာ ကျာဂ(၄၈)နှစ်လိုက်လာသည့်ဆိုင်ကယ်၊ ကျထော(၃၂)နှစ်မောင်းလာသည့်ဆိုင်ကယ်နှင့် ကျာဟော်(၂၇)နှစ် မောင်းလာသည့်ဆိုင်ကယ်တို့အား တားဆီးစစ်ဆေးခဲ့ကြသည်။
ထိုသို့ စစ်ဆေးရာ ဆိုင်ကယ်များ၏ဂွကြားရှိ ဆာလာအိတ်များအတွင်းမှ ၎င်းတို့သယ်ဆောင်လာသည့် ငွေကျပ်သိန်း ၁၂၀၀ တန်ဖိုးရှိ စိတ်ကြွဆေးပြား ၃ သိန်းပြားအား ဖမ်းဆီးရမိခဲ့ကြောင်း ရဲတပ်ဖွဲ့မှသိရသည်။
ထို့ကြောင့် စိတ်ကြွဆေးပြားများနှင့်အတူ ဖမ်း ဆီးရမိသူများအား ကျိုင်းတုံမြို့မရဲစခန်းက မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရအမှုဖွင့်ကာ စစ်ဆေးလျက်ရှိကြောင်း သိရသည်။