ကချင်ပြည်နယ်၊ ဖားကန့်မြို့နယ်၊ ဘဇံချောက်ကျေးရွာအနီးလမ်းဘေးတွင် ဓားဖြင့်ခုတ်ခံထားရသည့် ဒဏ်ရာအများအပြားဖြင့် သေဆုံးနေသည့် အမျိုးသားတစ်ဦး၏ ရုပ်အလောင်းအား ယနေ့ စက်တင်ဘာ (၁၁) ရက် နံနက်ပိုင်းက တွေ့ရှိခဲ့ရကြောင်း သိရသည်။
ယနေ့ နံနက် (၆) နာရီကျော်ခန့်က ဖားကန့်မြို့နယ်၊ ဘဇံချောက်ကျေးရွာအနီးလမ်းဘေးတွင် ဓားဒဏ်ရာများဖြင့်သေဆုံးနေသည့် အမျိုးသားတသ်ဦး၏ရုပ်အလောင်းတွေ့ရှိကြောင်း သတင်းအရ လုံခြုံရေးအဖွဲ့ဝင်များနှင့်တာဝန်ရှိသူများက သွားရောက်စစ်ဆေးခဲ့ကြောင်း သိရသည်။
အခင်းဖြစ်နေရာ၌ အသက်(၃၀)နှစ်ခန့်ရှိ အမည်/နေရပ်လိပ်စာ(စုံစမ်းဆဲ)အမျိုးသားသည် ဝမ်းဗိုက်ပြတ်ရှ၊ညာဘက်လက်၏ လက်ချောင်းလှီး ဖြတ်ခံထားရ၊ ဘယ်ဘက်လက်ကောက်ဝတ်ပြတ်ရှ၊ ပေါင်နှစ်ဖက်ပြတ်ရှဒဏ်ရာများဖြင့် သေဆုံးနေသည်ကို စစ်ဆေးတွေ့ရှိခဲ့ရသည်။
ထို့ကြောင့် ရုပ်အလောင်းအား ဖားကန့်မြို့နယ် ပြည်သူ့ဆေးရုံသို့ ပို့ဆောင်ပေးခဲ့ကြပြီးနောက် လုံခြုံရေးအဖွဲ့ဝင်များက သေဆုံးသူ၏ အမည်/နေရပ်လိပ်စာ/ဖြစ်စဥ်ဖြစ်ပွားရသည့်အကြောင်းရင်းနှင့်ပြစ်မှုကျူးလွန်သူများအား ဖမ်းဆီးရမိရေးတို့အတွက် စုံစမ်းစစ်ဆေးမှုများပြုလုပ်လျက်ရှိကြောင်း သိရသည်။
