ဟနွိုင်း၊စက်တင်ဘာ ၁၃
ဗီယက်နမ်နိုင်ငံ၏မြို့တော်ဟနွိုင်းတွင် တိုက်တန်းလျား မီးလောင်မှုကြောင့် လူပေါင်း ၅၆ ဦးသေဆုံးခဲ့ကြောင်းသိရသည်။ “လူပေါင်း ၅၆ ယောက်လောက်သေဆုံးသွားပြီး ၃၇ ယောက်လောက်ဒဏ်ရာရရှိခဲ့ပါတယ်” ဟုရဲတပ်ဖွဲ့ကပြောကြားခဲ့ပြီး သေဆုံးသူ ၅၆ ဦးအနက် ၃၉ ဦးကို မည်သူမည်ဝါဖြစ်ကြောင်းစုံစမ်းသိရှိရပြီဖြစ်ကြောင်းသိရသည်။
အဆိုပါမီးလောင်မှုသည် အထပ်ကိုးထပ်ရှိသည့် တိုက်တန်းလျားအဆောက်အအုံတစ်ခုတွင်ဖြစ်ပေါ်ခဲ့ပြီး လူဦးရေ ၁၅၀ ခန့်နေထိုင်သည်ဟုလည်းသိရသည်။ ပိတ်မိနေသူများအနက် အယောက် ၁၀၀ ခန့်အား ကယ်ဆယ်ရေးသမားများကကယ်တင်နိုင်ခဲ့ပြီး သက်ဆိုင်ရာတာဝန်ရှိသူများက ဆေးရုံသို့ပို့ဆောင်ကုသပေးထားကြောင်းသိရသည်။
အချို့မှာလည်း မီးဘေးမှလွတ်မြောက်ရန်အတွက် ပြတင်းပေါက်များမှခုန်ချသဖြင့် ထိခိုက်ဒဏ်ရာများရရှိမှုကြောင့် ဆေးရုံသို့ပို့ဆောင်ကုသမှုပေးနေကြောင်းသိရသည်။
သေဆုံးသူများအနက် ကလေးငယ်သုံးယောက်ထက်မနည်းပါဝင်နိုင်သည်ဟုလည်းဆိုကြသည်။
“အဲ့ဒီနားတစ်ဝိုက်မှာက အဆောက်အအုံတွေကြပ်ပိတ်နေတော့ အခုလိုအရေးပေါ်ဖြစ်လာတဲ့အခါ လွတ်ရာပြေးဖို့မလွယ်လို့ အခုလိုသေဆုံးနှုန်းများသွားရတာပါ” ဟု အနီးပတ်ဝန်းကျင်ရှိဒေသခံတစ်ဦးကပြောကြားခဲ့သည်။
အဆိုပါတိုက်ခန်းများတွင် လေသာဆောင်လက်ရန်းများကိုသံတန်းများဖြင့်ပြုလုပ်ထားပြီး အရေးပေါ်အခြေအနေအတွက်အသုံးပြုရန်လှေကားလည်းမရှိကြောင်းသိရှိရသည်။
“ကလေးတစ်ယောက်ကိုဆိုရင် သူ့မိဘတွေကအပေါ်ကနေပစ်ချပေးလိုက်ပြီး အောက်ကလူတွေကပိုက်ကွန်နဲ့ကူဖမ်းပေးကြပေမဲ့ အဲ့ကလေးအသက်ရှင်လားမရှင်လားတော့မသိပါဘူး” ဟု အခြားမျက်မြင်တွေ့သူတစ်ဦးကလည်းဆိုသည်။
အချို့မှာလွတ်မြောက်သွားကြသော်လည်း ထိခိုက်ဒဏ်ရာများရရှိကြကာ အချို့ကမူ မိသားစုဝင်များအားဆုံးရှုံးလိုက်ကြရသည်ဟုလည်းသိရသည်။
ဗီယက်နမ်သည် မီးလောင်မှုများမကြာခဏဖြစ်ပေါ်လေ့ရှိသောနိုင်ငံတစ်နိုင်ငံဖြစ်ပြီး လွန်ခဲ့သည်တစ်နှစ်ကလည်း ဟိုချီမင်းမြို့ရှိ ဘားတစ်ခု၌မီးလောင်မှုဖြစ်ပေါ်ခဲ့ရာ ၃၂ ဦးသေဆုံးခဲ့သည်ဟုလည်းသိရှိရသည်။
Source : CNA
