စာဆိုတော်ရှင်မဟာရဋ္ဌသာရ၏ ၅၅၅ နှစ်မြောက်မွေးနေ့အထိမ်းအမှတ် စာတမ်းဖတ်ပွဲအား စက်တင်ဘာ ၂၃ ရက်နံနက်ပိုင်းက နေပြည်တော်ရှိ မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန-၂ ၌ ကျင်းပခဲ့သည်။
အခမ်းအနားသို့ နစက ဥက္ကဋ္ဌနှင့်ဇနီးတို့တက်ရောက်၍ ရှင်မဟာရဋ္ဌသာရ၏ ၅၅၅ နှစ်မြောက် မွေးနေ့အထိမ်းအမှတ်ပြခန်းအတွင်း ရှင်မဟာရဋ္ဌသာရ၏ ဘဝမှတ်တမ်းများ၊မှတ်တမ်းဓာတ်ပုံများ၊ရေးသားပြုစုတော်မူခဲ့သည့် စာပေနှင့်ပေကျမ်းများ၊ခေတ်ပြိုင်စာဆိုတော်များ၊စာဆိုတော် ရှင်မဟာရဋ္ဌသာရကို ဂုဏ်ပြုရေးသားထားသည့် ဆောင်းပါးများ ခင်းကျင်းပြသထားရှိမှုကိုကြည့် ရှုလေ့လာခဲ့သည်။
ထို့နောက် စာဆိုတော်ရှင်မဟာရဋ္ဌသာရ၏ ၅၅၅ နှစ်မြောက်မွေးနေ့ အထိမ်းအမှတ်စာတမ်းဖတ်ပွဲအခမ်းအနားကျင်းပရခြင်းကို သာသနာရေးနှင့် ယဉ်ကျေးမှဝန်ကြီးဌာန ပြည်ထောင်စုဝန်ကြီးဦး တင်ဦးလွင်က ရှင်းလင်းတင်ပြခဲ့သည်။
ထို့ပြင် စာဆိုတော်ရှင်မဟာရဋ္ဌသာရ၏ ၅၅၅ နှစ် မြောက်မွေးနေ့အထိမ်းအမှတ်အဖြစ် သမိုင်းသုတေသနနှင့်အမျိုးသားစာကြည့်တိုက်များဦးစီးဌာန ညွှန်ကြားရေးမှူးဒေါက်တာ လဲ့လဲ့ဝင်းက ရှင်မဟာရဋ္ဌသာရ(သမိုင်းအမြင်ဖြင့် လေ့လာခြင်း)စာတမ်း၊ ဦးအမ်းယုမောင်(မောင်လူမွှေး- မြန်မာမှု)က သံဝရပျို့မှသင်ပုန်းကြီးရေးထုံးသင်ရိုးနှင့်သတ်ပုံရေးထုံးစာတမ်း၊ သမိုင်းသုတေ သနနှင့်အမျိုးသားစာကြည့်တိုက်များ ဦးစီးဌာန ညွှန်ကြားရေးမှူးဒေါက်တာထွန်းထွန်းဦးက မြန်မာလူမျိုးတို့လိုက်နာကျင့်သုံးရသော ကျင့်ဝတ်တ ရားတို့မှ မင်းတို့ကျင့်ရာသောတရားများစာတမ်းတို့ကိုဖတ်ကြားခဲ့ကြပြီး ပြင်ပပညာရှင်ဦးသူရဇော်မှ ရဟန်းစာဆိုရှင် ရှင်မဟာရဋ္ဌသာရအား ကဗျာ၊လင်္ကာရှုထောင့်မှ ဖတ်ရှုပူဇော်ခဲ့သည်။
ရှင်မဟာရဋ္ဌသာရသည် အင်းဝခေတ် သက္ကရာဇ် (၈၃၀)ကပေါ်ထွန်းခဲ့ကာ စံထားလောက်သည့် ဂန္ထဝင်မြောက် ပျို့၊ကဗျာ၊လင်္ကာ၊မော်ကွန်း၊တောလားအစရှိသည့် မြန်မာစာပေ၏ ကြွယ်ဝလှသည့် စာပေပုံသဏ္ဍာန်မျိုးစုံကို လောကကြောင်း၊ ဓမ္မကြောင်းများနှင့်ယှဉ်၍ ရေးသားစပ်ဆိုခဲ့သည့် စာဆိုတော်ကြီးတစ်ပါးဖြစ်သည်။
စာဆိုတော် ရှင်မဟာရဋ္ဌသာရ ရေးသားခဲ့သည့် ကဗျာလင်္ကာများအနက် မြန်မာနိုင်ငံစာပေသင်ကြားမှုသမိုင်းတွင် အထင်ကရရှိခဲ့သည့် သင်ကြားမှုနည်းစနစ်တစ်ခုမှာ “သု၊ စိ၊ ပု၊ ဘာ၊ ဝိ၊ လိ၊ သိ၊ ဓာ” “အက္ခရာစွဲသုံး ဤရှစ်လုံးကို သီကုံးပန်းသွင် နေ့တိုင်းဆင်လော့” ဟူသည့် ဆုံးမစာလင်္ကာသွားဖြစ်ပြီး ယနေ့အထိလည်း ခေတ်မီနေဆဲပင်ဖြစ်ကာ သုနေယျ- ကြားနာခြင်း၊ စိန္တေယျ-ကြံဆခြင်း၊ ပုစ္ဆေယျ-မေးမြန်းခြင်း၊ ဘာသေယျ-ပြောဆိုဆွေး နွေးခြင်း၊ ဝိစာယေယျ-စူးစမ်းဆင်ခြင်ခြင်း၊ လိခေယျ-ရေးမှတ်ခြင်း၊ သိက္ခေယျ-လေ့ ကျင့်ခြင်း၊ ဓာရေယျ-နှုတ်တက်အာဂုံဆောင်ခြင်း တို့ပင်ဖြစ်ကြောင်း သိရသည်။
![](https://www.popularmyanmar.com/wp-content/uploads/2023/09/IMG_20230923_204232_145.jpg)
![](https://www.popularmyanmar.com/wp-content/uploads/2023/09/IMG_20230923_204232_318.jpg)
![](https://www.popularmyanmar.com/wp-content/uploads/2023/09/IMG_20230923_204232_364.jpg)
![](https://www.popularmyanmar.com/wp-content/uploads/2023/09/IMG_20230923_204232_194.jpg)
![](https://www.popularmyanmar.com/wp-content/uploads/2023/09/IMG_20230923_204232_043.jpg)
![](https://www.popularmyanmar.com/wp-content/uploads/2023/09/IMG_20230923_204232_403.jpg)
![](https://www.popularmyanmar.com/wp-content/uploads/2023/09/IMG_20230923_204232_757.jpg)
![](https://www.popularmyanmar.com/wp-content/uploads/2023/09/IMG_20230923_204232_097.jpg)
![](https://www.popularmyanmar.com/wp-content/uploads/2023/09/IMG_20230923_204231_828.jpg)